Yali i bɛ se ka dɛmɛ don wa?
1 Ciden Pol ye jɛkulu kɔnɔmɔgɔw laadi walisa u ‘k’u jan to ɲɔgɔn na cogo kelen na.’ (1 Kɔr. 12:25) O la sa, an ka kan k’an mago don mɔgɔ kelen-kelen bɛɛ la, ka ɲɛsin ɲɔgɔn ma. N’a ka kan tuma min na, an ka sɔn ka dɛmɛ don ni kanuya ye. Misali la, an balimamusow hakili ta fan fɛ, minnu b’an cɛma, olu dɔw bɛ k’u denw lamɔ tiɲɛ kɔnɔ, u kelen. K’u denw lamɔ hakili ta fan fɛ, o sangatigiya bɛɛ doni de b’an balimamuso ninnu kan. Siga t’a la, u ka kan n’an ka dusulamin n’an ka dɛmɛ nafama ye “ka kɛɲɛ n’u magow ye.” (Rom. 12:13a, NW) Yali i bɛ se ka dɛmɛ don u ma wa?
2 I bɛ se ka dɛmɛ don sira minnu fɛ: Walisa ka taa lajɛw ni jamalajɛw la, mɔgɔ dɔw dulonnen don foroba bolifɛnw na. N’i y’a ɲini o mɔgɔw fɛ k’u ta i ka bolifɛn na, o bɛ se ka kɛ sababu ye o denbaya bolo ka wari caman mara. N’i ye denba dɔ dɛmɛ k’i mago don a den fitininw na lajɛw la, o tigi bɛ se ka nafa dafalen sɔrɔ kalan na. O cogo kelen na fana, n’a b’a denw ta ka taa foro baara la, n’i y’a ɲini a fɛ k’a dɛmɛ, o bɛ se ka lafiya dɔ lase a ma. I b’a jira k’i bɛ mago jɔnjɔn don denw na, n’i bɛ teriya sama n’u ye. O bɛ se ka nɔ bila denmisɛnw na cogo nafama la. Ka dentigi dɔ n’a ka denbaya wele sɔn ni sɔn ka na i ka denbaya ka kalan na, o bɛ se ka dusu don o denbaya kɔnɔ, hakili ta fan fɛ.
3 Kɛ mɔgɔ hakilima ye: An ka kan k’an kɔlɔsi walisa an kana mɔgɔ dɔ diyagoya k’an b’a dɛmɛ, k’a sɔrɔ a tigi b’a miiri k’a mago tɛ dɛmɛ na. K’an to denbaya dɔ dɛmɛni na, an t’a fɛ fana k’an sen don a ka sokɔnɔkow la. A jɛlen bɛ ko a bɛnnen don balimamusow ni mɔgɔ furulenw de ma ka balimamuso dɔ dɛmɛ min bɛ gɛlɛya la.
4 Krecɛnw bɛɛ dusu laminna u ka “dunanw ladon.” (Rom. 12:13b) An bɛ se k’a jira sira caman fɛ ko Krista ka kanuya ɲɔgɔn b’an cɛma. O sira ninnu dɔ la kelen ye ka dɛmɛ don mɔgɔw ma minnu y’an balimakɛw n’an balimamusow ye hakili ta fan fɛ.—Yuh. 13:35.