Cidenyabaara magannaw bɛ baara nafama kɛ
1 “U yɛrɛw y’a jira ko tiɲɛ na u ye cɛw ye minnu y’u yɛrɛ di, n’u ka limaniya dakɛnɛmayara u ka timinandiya fɛ Masaya baara la, ani mɔgɔ wɛrɛw dɛmɛni na walisa u ka sabati limaniya la.” Organisés pour bien remplir notre ministère gafe bɛ kuma o cogo de la cidenyabaara magannaw kan, a ɲɛ 57nan na. Cidenyabaara magannaw bɛ hakili ta fan fɛ misali min jira, o ni ladegeli ka kan. N’an ni olu ni maakɔrɔw bɛ baara kɛ ɲɔgɔn fɛ, o b’a to “farikolo bɛɛ bɛ jiidi ka dɔ fara a yɛrɛ kan kanuya la.”—Efe. 4:16.
2 Cidenyabaara magannaw bɛ baara nafamaba de kɛ jɛkulu kɔnɔ. An ka miiri u ka baaraw bonya ma! U b’u mago don jatew la, sɛbɛnw, sɔn-ni-sɔn gafeninw ani u bakurubasanni la, ani danyɔrɔ koɲɛ la. Tuma dɔw la, u ye mɔgɔw kunbɛnbagaw ye. U bɛ baara kɛ kan bonyalan na, ani ka Masaya So to minɛcogo ɲuman na. U sen bɛ Ala-ka-marako Cidenyabaara Kalan ni Baara ka Lajɛ la. U dɔw yɛrɛ bɛ se ka foroba jɛmu kɛ walima ka jɛkulu ka lajɛ dɔw ɲɛminɛ. Iko farikolo yɔrɔw bɛ cogo min na, an mago bɛ fɛn minnu na, cidenyabaara magannaw bɛ u kɛ an ye.—1 Kɔr. 12:12-26.
3 Ka cidenyabaara magannaw ni maakɔrɔw ye ka baara kɛ ɲɔgɔn fɛ bɛn kɔnɔ i n’a fɔ magannaw kulu kelen kɔnɔmɔgɔw, ɲɔgɔn bonya kɔnɔ ni faamuyali ye, o bɛ mɔgɔ tɔw dusu lamin k’o ɲɔgɔn kɛ. (Kol. 2:19) N’u b’u jɔyɔrɔ fa ni kantigiya ye dɔgɔkun o dɔgɔkun, k’a jira k’u yɛrɛ b’u mago don tɔw la, u bɛ dɔ kɛ jɛkulu ka ɲɛtaa la hakili ta fan fɛ.
4 An bɛ se ka mun kɛ walisa k’a jira ko cidenyabaara magannaw ka timinandiya baara ko ka bon an bolo? Ci minnu binna u kan, an ka kan k’olu dɔn ka ɲɛ. N’u mago b’an ka dɛmɛ na tuma min na, an ka kan k’a jira k’an labɛnnen don ka baara kɛ n’u ye. An ka kuma an’an ka wale fɛ, an bɛ se k’a jira k’u ka baara ko ka bon an bolo. (Nta. 15:23) Mɔgɔ minnu bɛ kisɛya baara la an ye, u ka kan n’an ka waleɲumandɔn jɛlen ye.—1 Tes. 5:12, 13.
5 Cidenyabaara magannaw jɔyɔrɔ ani ko minnu wajibiyara u ma, Ala ka Kuma bɛ o kow sigi. (1 Tim. 3:8-10, 12, 13) Jɛkulu taabolo ko tɛ ɲɛ u ka baara senuma sɔngɔba kɔ. Ka to u bɛ “Matigi ka baara la tuma bɛɛ k’a caya”, o mɔgɔ suguw ka kan n’an ka dusulamin ye tuma bɛɛ.—1 Kɔr. 15:58.