Yali i bɛ sɔn-ni-sɔn gafeninw kalan wa?
1 Afriki kɔnɔ, ciden fila minnu tun furulenw bɛ ɲɔgɔn ma, u ye nin fɔ sɔn-ni-sɔn gafeninw ko la: “La Tour de Garde b’an dɛmɛ ka to an ɲɛ na alako ta fan fɛ an ka danyɔrɔ la. An bɛ dusulamin ani fanga sɔrɔ ka bɔ a bɔko kelen-kelen bɛɛ la.” Yali o waleɲumandɔn kelen b’i la ka ɲɛsin an ka kibarobɔlaw ma wa? Yali i kɔrɔtɔlen don k’u kalan wa?
2 Waati caman de bɛ ta walisa ka sɔn-ni-sɔn gafenin barokunw labɛn, barokun minnu bɛ se ka kalan sanga damadɔw dɔrɔn kɔnɔ. I kɛlen k’o dɔn, yali i bɛna barokunw kalan teliya la, ka jaw lajɛ, walima sɔn ni sɔn, ka barokun dɔ kalan min bɛ se ka diya i ye wa? An bɛ kɛ hakilitigiw ye n’an b’a kɛ ka tɛmɛ o kan. An ka kan ka waati ta k’an ka bɔko kelen-kelen bɛɛ barokun kelen-kelen bɛɛ kalan k’u sɛgɛsɛgɛ. La Tour de Garde de y’an ka sɛbɛnw bɛɛ la fɔlɔ ye min b’an balo hakili ta fan fɛ waati bɛnnen na. Réveillez-vous! bɛ kuma barokun nafamaw kan, barokun minnu bɛ kunnafoniw di kumakun sifa caman kan. An kɛtɔ k’u kalan, an bɛ min dege, o tɛ fanga dɔrɔn di an ma hakili ta fan fɛ dɛ, nka, cogo nafama na, u b’an labɛn fana k’an seko bonya kosɛbɛ cidenyabaara la. N’an yɛrɛ y’u kalanbaga jɔnjɔnw ye, an ka nisɔndiya bɛna bonya walisa k’u jira tɔw la.
3 An b’an kɛcogo fisaya kalan ta fan fɛ cogo min na: Sɔn-ni-sɔn gafeninw kalanni ta fan fɛ, yali i bɛ se k’i kɛcogo fisaya wa? Hakilina fila bɛ yan minnu bɛ mɔgɔ caman nafa. 1) Waatibolodali basigilen dɔ sigi kalan kama. N’i bɛ sanga 10 walima sanga 15 dɔrɔn ta don o don walisa ka kalan kɛ, i bɛ hakɛ min kalan dɔgɔkun kelen kɔnɔ o bɛna i kabakoya. 2) I ka fɛɛrɛ dɔ sɔrɔ walisa i ye fɛn min kalan, i ka taamasyɛn kɛ o la. I bɛ barokun kelen o kelen min kalan, i bɛ se ka taamasyɛn kɛ o daminɛ na. N’o sababu tɛ, a bɛ se ka kɛ k’i bɛna ɲinɛ ka barokun dɔw kalan walima sɛbɛn mumɛ yɛrɛ bɛɛ. Kalan ta fan fɛ, ka deliko dɔ sɔrɔ min bɛ bɛn i ma ani k’i nɔɔrɔ o la, o nafa ka bon.—A suma ni Filipekaw 3:16nan ye.
4 “Jɔnkɛ dannamɔgɔ hakilima” ye hakilitigiya baara kɛ ka ɲɛsin waati yɛlɛmani ma, a kɛtɔ ka barokunw bɔ minnu bɛ bɛn mɔgɔw mago jɔnjɔnw ma. (Mat. 24:45) Tiɲɛ na, sɔn-ni-sɔn gafeninw bɛ nɔ bila an ka ɲɛnamaya la. Tuma caman na, hakili ta fan fɛ, an ka ɲɛtaa teliya bɛ bɔ an delikow la ka ɲɛsin an ka ala-ka-marako kalan ma. Barajiba maralen bɛ mɔgɔw ɲɛ, mɔgɔ minnu bɛ waati ta ka sɔn-ni-sɔn gafeninw bɛɛ kalan.