Tutigɛbagaw bɛ tɔw dɛmɛ
1 Yesu tun y’a fɔ ko: “Suman tigɛta ka ca, nka baarakɛlaw ka dɔgɔ. Aw dun ka suman tigi deli ko a ka baarakɛlaw bila ka taa a ka suman tigɛ.” Ikomi san kɛmɛ fɔlɔ baarakɛlaw hakɛ tun ka dɔgɔ ani ikomi danyɔrɔ kɛta tun ka bon, Yesu tun bɛ se k’a fɔ u ye k’u ka taa kibaru duman lase mɔgɔ caman ma u se la, a kɛtɔ k’u kelen-kelen ci. Sanni a k’o kɛ, a ye “u fila fila ci.” (Luka 10:1, 2) Mun na fila fila?
2 O kalandenw tun ye kuraw ye, u dɔnko fana tun man bon. U kɛtɔ ka baara kɛ ɲɔgɔn fɛ, u bɛ se ka ɲɔgɔn kalan ka ɲɔgɔn dusu lamin. Iko Salomɔn y’a fɔ cogo min na, “mɔgɔ fila ka fisa kelen ye.” (Waaj. 4:9, 10) Hali hakili senu jiginnen kɔfɛ Pantekɔte don na, san 33nan na, Pol ni Barnabasi ani dɔ wɛrɛw tun b’u dannakɛ ɲɔgɔnw bila sira cidenyabaara la. (Kɛw. 15:35) Ka kelennakalan sɔrɔ o cɛ senkolaw fɛ, o tun ka kan ka kɛ bonya ye dɔw bolo!
3 Kalan bolodasira ɲuman: Iko a bɔɲɔgɔnko min tun bɛ yen san kɛmɛ fɔlɔ la, bi Krecɛnw ka jɛkulu ye waajuli jɛkulu de ye. A b’an kalan fana. O kama, an bɛɛ kelen-kelen dusukun sago ka kan ka kɛ kibaru duman jirali ye cogo nafaman na, an se la. Walisa weleweledala caman ka se k’u ka baara kɛ ka ɲɛ, dɛmɛ bɛ sɔrɔ.
4 Masaya Cidenyabaara Kalan min kɛra kɔsa in na, o senfɛ, Tɔn ye bolodasira dɔ kofɔ ka ɲɛsin tutigɛbagaw ma, tɔw dɛmɛni ko la foro kɔnɔ baara la. O mago bɛ yen wa? Ɔwɔ, a bɛ yen. Weleweledala miliyɔn kelen ni kɔ de batisera san saba tɛmɛnenw na, wa u la mɔgɔ caman mago b’a la ka kalan walisa u ka se waajuli baara la koɲuman. Jɔni bɛ se k’o mago wasa?
5 Waati-dafalen tutigɛbagaw bɛ se ka dɛmɛ don. Jehowa ka jamakulu bɛ laadilikan caman ni kalan di u ma. Tutigɛbagaw ye kalan sɔrɔ min bɛnnen don u magow ma, kalan min kɛra u kun dɔgɔkun fila Tutigɛbaga ka Baara Kalan senfɛ. U ye tɔnɔ fana sɔrɔ lajɛw la u ni kafo ni kafoba lakɔlɔsibagaw ye minnu kɛ ɲɔgɔn fɛ, ka fara maakɔrɔw ka laadilikanw kan. Hali k’a sɔrɔ tutigɛbagaw bɛɛ tɛ Pol ni Barnabasi bɔ dɔnniya la, u ye kalan nafaman sɔrɔ, a ka di u ye ka min tila.
6 Jɔni bɛna nafa sɔrɔ a la? Yali nin bolodasira bilalen don weleweledala kuraw wala batiselen kuraw dama kama wa? Ayi dɛrɛ! A dabɔra mɔgɔ kuraw ni kɔrɔlenw ye minnu bɛ tiɲɛ dɔn kabini san damadɔw nka ni a ka di u ye ka dɛmɛ sɔrɔ cidenyabaara ɲɛ dɔ la. Dɔw bɛ baara ɲuman kɛ sɛbɛnw jɛnsɛnni na, nka a ka gɛlɛn u ma ka segin-ka-bɔnyew kɛ wala ka Bibulu kalanw daminɛ. Dɔ wɛrɛw bɛ Bibulu kalan daminɛ ni nɔgɔya ye nka u b’a kɔlɔsi k’u ka kalandenw tɛ taa ɲɛ. Mun de b’u bali? A bɛ se ka ɲini tutigɛbaga dɔnkotigiw fɛ u ka na ni dɛmɛ ye o yɔrɔw la. Tutigɛbaga dɔw bɛ se ka mago jiralen sɛnɛ, ka Bibulu kalanw daminɛ ani ka kalanden kunsin jamakulu ma. U ka dɔnko bɛna kɛ nafa ye nin bolodasira kura in na.
7 E bolo, yali i ka waatibolodacogo t’e yamaruya ka jɛkulu ka foro kɔnɔ baara basigilen ka lajɛw kɔkɔrɔdon ka caya i sago la wa? A dɔ rɔ, e ni tutigɛbaga dɔ bɛ se ka baara kɛ ɲɔgɔn fɛ waati min na weleweledala wɛrɛw tɛ sɔrɔ.
8 Nafa bɛ jɛ-ka-baara la: Siɲɛ fila san kɔnɔ, maakɔrɔw na mabɛnw kɛ weleweledalaw ye minnu b’a fɛ ka dɛmɛ sɔrɔ, walisa u sen ka ye Tutigɛbagaw bɛ tɔw dɛmɛ bolodasira la. N’i sɔnna o dɛmɛ sugu ma, e ni tutigɛbaga weleweledala min ka kan k’i dɛmɛ, aw ka baara bolodacogo nɔgɔnman dilan ka nɔrɔ o la. I ka ɲɔgɔn-kunbɛn kelen-kelen bɛɛ labato. N’aw bɛ baara kɛ ɲɔgɔn fɛ tuma min na, i ka kibaru duman jiracogo ɲumanw lakɔlɔsi. I ka sɛgɛsɛgɛli kɛ k’a lajɛ mun na kuma kuntacogo dɔw ka ɲi. Tutigɛbaga weleweledala bɛ hakilina minnu di i ma, i k’u jate walisa i k’i ka kuma kuntacogo ɲɛ. N’i ye fɛn kalannenw sirataama, i ka ɲɛtaa cidenyabaara la, o na jɛya e ni tɔw bɛɛ ye. (1 Timote 4:15 lajɛ.) A’ ye baara kɛ ɲɔgɔn fɛ tuma caman aw se la, k’aw ni don cidenyabaara ɲɛw bɛɛ la, senfɛtɔ seereya b’o la, nka i b’a fɛ ka dɛmɛ sɔrɔ yɔrɔ kɛrɛnkɛrɛnnenw minnu na, i k’i sinsi olu kan.
9 Baara lakɔlɔsibaga ka sira bɛ ɲɛtaa la min bɛna kɛ. Sɔn-ni-sɔn, a bɛna sɛgɛsɛgɛli kɛ Jɛkulu ka Bibulu Kalan Ɲɛminɛbagaw kɛrɛfɛ k’a lajɛ cogo min na i bɛ bolodasira nafa sɔrɔ. Kafo lakɔlɔsibaga na i dɛmɛ fana tuma min na a bɛ bɔ i ka jɛkulu ye.
10 Jehowa b’a fɛ a ka jama ka kɛ jama kalannen ye ani min “labɛnnen don baara ɲuman bɛɛ kama.” (2 Tim. 3:17, NW) I ka Tutigɛbagaw bɛ tɔw dɛmɛ mabɛn mafilɛ iko fɛɛrɛ ɲuman ye min tigɛra walisa ka mɔgɔw dɛmɛ, mɔgɔ minnu b’a fɛ ka dɔ fara kuma waajuli ɲɛdɔn kan. N’a bonya kɛra i ye i k’i sen don a la, a kɛ ni waleɲumandɔn ni majiginnenya ni nisɔndiya ye.