Seereya kɛ ni taamacogo ɲuman ye
1 Bi yɛrɛmabila diɲɛ in kɔnɔ, funankɛ hamintanw caman y’u ka hadamadenya tiɲɛ ni dɔrɔguw, jantaraya, murutili ani farinya ye. Fan wɛrɛ fɛ, Krecɛn jɛkulu funankɛ kɛnɛmanw taamacogo ye misali ye min yeli bɛ dususuma kɛ ani siga t’a la, min yeli fana ye fɛn cɛɲi ye Jehowa fɛ. O ye seereyaba ye min bɛ se ka mɔgɔ wɛrɛw sama ka na tiɲɛ na.—1 Piɛ. 2:12.
2 Ko kɛlenw caman y’a jira ko Krecɛn funankɛw taamacogo ɲuman ye nɔ ɲuman bila u filɛbagaw la. A kɛtɔ ka kuma Seere funankɛ dɔ kan min tun y’a ka kalanden ye, lakɔli karamɔgɔmuso dɔ y’a fɔ kalanbon mɔgɔw bɛɛ ɲɛ na ko nin denmusonin ka Ala, Jehowa ye Ala lakika de ye. A y’o fɔ katuguni denmusonin taamacogo la, a bɛ mɔgɔ bonya tuma bɛɛ. Lakɔli karamɔgɔ dɔ wɛrɛ ye sɛbɛn ci Tɔn ma, k’a fɔ ko: “Denmisɛn ɲuman minnu bɛ aw ka diinɛ na, ne b’a fɛ k’aw fo olu ko la. . . . Aw ka funankɛw ye ɲɛjirabaga lakikaw de ye. U b’u kɔrɔw bonya. U cogo ka ɲi. U ka fini doncogo bɛrɛ bɛnnen don. Wa u b’u ka Bibulu dɔn kosɛbɛ dɛ! Diinɛ ka kan ka kɛ ten yɛrɛ de!”
3 Seere dɔ min si ye san wolonwula ye, a taamacogo ye lakɔli karamɔgɔmuso wɛrɛ dusu minɛ, a tun bɛ o min ka kalanbon kɔnɔ. Karamɔgɔmuso samana cɛnin ka dususumalenya an’a jogo fɛ min tun ka di mɔgɔ ye. O fɛn ninnu de tun y’a fara ka bɔ cɛmanin tɔw la. Karamɔgɔmuso dusu minɛna a ka basigilenya fɛ a ka diinɛ kalansiraw ko la. A tun tɛ maloya k’a ni tɔw tun tɛ kelen ye k’a sababu kɛ a ka dannakow ye. Karamɔgɔmuso tun bɛ se k’a ye ko cɛnin dusukun tun kolola ani k’o de kɔsɔn, a tun bɛ se ka “ko ɲuman ni ko jugu faranfasi.” (Heb. 5:14) A laban na, cɛnin ba taara bɔ karamɔgɔmuso ye, ani Bibulu kalan daminɛna. Taalen ɲɛ, karamɔgɔmuso ye batɛmu ta. O kɔfɛ, a kɛra kɔfɛ tutigɛbaga basigilen ye!
4 Seere dɔ taamacogo ɲuman ye nɔ bila kamalennin dɔ la u ka kalanso la. O sungurunnin ni tɔw tun tɛ kelen ye tiɲɛ yɛrɛ la. A tun bɛ mɔgɔ bonya. Kalankɛla tun don, wa tuma bɛɛ a ka fini donta tun bɛrɛ bɛnnen don. Kɔdɔn ɲɔgɔnna na ni sungurunnin tɔw ye, a tun tɛ kamalen tigɛ abada. Kamalennin tun bɛ se k’a ye k’a ka ɲɛnamaya tun sinsinen don Bibulu sariyakolow kan. Kamalennin y’a ɲininka a ka diinɛ kalansiraw la. A ye min mɛn, o ye cɛ kabakoya kosɛbɛ. A ye kalan daminɛ. A ma mɛn a ye batɛmu ta. A labanna ka kɛ tutigɛbaga ye cidenyabaara la ani ka kɛ Betɛl baarakɛla ye.
5 N’i ye Krecɛn funankɛ dɔ ye min b’a fɛ ka seereya ɲuman di tɔw ma, i kɔlɔsi i taamacogo la a ɲɛ bɛɛ la. I kana i yɛrɛ bila abada i kɛtɔ ka kɛ mɔgɔ ye min bɛ sɔn nin yɛrɛmabila diɲɛ in jogow, a ka ko yecogow la, walima a ka hadamadenya kɛcogow la. I ka kɛ ɲɛjirabaga ye min kɔrɔtalen don a kumacogo la, a ka fini dontaw la, ani a yecogo la. I kana o kɛ dɔrɔn tuma min na i bɛ foro kɔnɔ waajuli baara la ani jɛkulu lajɛw la, nka fana, kalanso la ani tuma min na i b’i ɲɛnajɛ (1 Tim. 4:12). I bɛna nisɔndiya yɛrɛ-yɛrɛ de sɔrɔ tuma min na mɔgɔ dɔ bɛna a mago don tiɲɛ la, k’a d’a kan k’i ye ‘i ka yeelen bɔ’ i ka taamacogo ɲuman fɛ.—Mat. 5:16.