KALANSEN 59
I bɛ se ka to kantigiya la hali ni mɔgɔw bɛ ka i tɔɔrɔ
A mɛn o mɛn, mɔgɔw bɛna a ɲini ka krecɛnw bɛɛ kelen-kelen kɛlɛ walima yɛrɛ ka u tɔɔrɔ? Yala o ka kan ka an lasiran wa?
1. Mun na an ka kan ka sigi n’a ye ko mɔgɔw bɛna an tɔɔrɔ?
Bibulu b’a fɔ k’a jɛya ko: “Minnu b’a fɛ ka taama Ala ɲɛsiran na Krisita Yesu la, tugu na kɛ olu bɛɛ la ten ka u tɔɔrɔ.” (2 Timote 3:12) Mɔgɔw ye Yesu tɔɔrɔ ka d’a kan a tun tɛ Sitanɛ ka diɲɛ ta ye. Anw fana tɛ nin diɲɛ taw ye, o la ni nin diɲɛ gofɛrɛnɛmanw ani a ka diinɛ kɔnɔmɔgɔw bɛ an tɔɔrɔ, o tɛ bali an na.—Yuhana 15:18, 19.
2. An bɛ se ka an yɛrɛ labɛn cogo di tɔɔrɔw kama?
An ka kan ka an ka dannaya barika bonya Jehova la kabini sisan. An ka to ka waati ta don o don ka Jehova deli ani ka a ka Kuma kalan. An ka lajɛw taali matarafa tuma bɛɛ. O kow kɛli bɛna fanga di an ma an mago bɛ min na walasa ka tɔɔrɔ suguw bɛɛ muɲu ni jagɛlɛya ye, hali ni o tɔɔrɔw bɔra an somɔgɔw yɔrɔ. Mɔgɔw tun bɛ to ka ciden Paul tɔɔrɔ tuma caman, ale y’a sɛbɛn ko: “Ne dɛmɛbaa ye Matigi [Jehova] de ye, ne tɛna siran.”—Heburuw 13:6.
An bɛ se ka an ka jagɛlɛya barika bonya fana an kɛtɔ ka waajuli kɛ tuma bɛɛ. Waajuli kɛli bɛ an dege an ka an jigi da Jehova kan ani ka se sɔrɔ mɔgɔ ɲɛsiran kan. (Ntalenw 29:25) I ja gɛlɛya ka to ka waajuli kɛ kabini sisan. O bɛna i labɛn ka ɲɛ waajuli kɛli kama ni gofɛrɛnɛmanw b’a ɲini ka i bali o baara kɛli la.—1 Tesalonikekaw 2:2.
3. An bɛ nafa jumɛn sɔrɔ tɔɔrɔw muɲuli la?
Tiɲɛ don ko, mɔgɔw ka an tɔɔrɔ, o tɛ nisɔndiyako ye an bolo. Nka ni an ye muɲuli kɛ ka se sɔrɔ tɔɔrɔw kan, an ka dannaya barika bɛ bonya ka ta’a fɛ. An gɛrɛlen bɛ kɛ Jehova la kosɛbɛ bawo an b’a ye ko a ye an dɛmɛ waati la, min kɔnɔna na an tun b’a miiri ko an barika ka dɔgɔ. (Yakuba 1:2-4 kalan.) K’a ye ko an bɛ ka tɔɔrɔ, o bɛ Jehova dusu kasi, nka a bɛ nisɔndiya k’a ye ko an ye muɲuli kɛ. Bibulu b’a fɔ ko: “Ni i tɔɔrɔla i ka kɛwale ɲumanw kosɔn, ni i ye o muɲu, o ye tanuli sababu ye Ala ɲɛ kɔrɔ.” (1 Piɛrɛ 2:20) Ni an tora kantigiya la, Jehova bɛna an sara ni ɲɛnamaya banbali ye diɲɛ kura kɔnɔ. O la, minnu bɛɛ bɛna ɲɛnamaya kɛ yen, olu bɛna Jehova bato ani mɔgɔ si tɛna u kɛlɛ o kɛli kama.—Matiyu 24:13.
DƆ FARA I KA DƆNNIYA KAN
An ka segin k’a lajɛ kun min na an bɛ se ka to kantigiya la Jehova kɔ hali ni mɔgɔw bɛ ka an tɔɔrɔ ani a bɛna an sara cogo min na.
4. Ni i somɔgɔw bɛ i kɛlɛ, i bɛ se ka o muɲu
Yesu tun b’a dɔn k’a jɛya ko an somɔgɔ dɔw tɛna sɔn an ka Jehova bato. Matiyu 10:34-36 kalan, o kɔ aw ka baro kɛ nin ɲininkali kan:
Denbaya kɔnɔmɔgɔ dɔw bɛ se ka mun fɔ walima ka mun kɛ ni u somɔgɔ dɔ y’a latigɛ ka Jehova bato?
Walasa ka o misali dɔ ye, a’ye WIDEYO lajɛ, o kɔ aw ka baro kɛ nin ɲininkali kan:
I bɛ mun de kɛ ni i somɔgɔ dɔ walima i teri dɔ b’a ɲini ka i fari faga Jehova batoli la?
Zaburu 27:10 ani Marka 10:29, 30 kalan. Tɛmɛsira kelen-kelen bɛɛ kalannen kɔ, a’ye baro kɛ nin ɲininkali kan:
Nin layidu in bɛ se ka i dɛmɛ cogo di ni i somɔgɔ dɔw walima i teri dɔw b’a ɲini ka i ka Jehova batoli bali?
5. Ta’a fɛ ka Jehova bato hali ni tɔɔrɔw bɛ i kan
Ni mɔgɔ dɔw bɛ k’a ɲini ka an bali Jehova batoli la, an mago bɛ jagɛlɛya la walasa ka ta’a fɛ ka o kɛ. A’ye WIDEYO lajɛ, o kɔ aw ka baro kɛ nin ɲininkali kan:
Misali minnu jirala nin wideyo kɔnɔ, e ye fɛn jumɛnw sɔrɔ olu kɔnɔ minnu bɛ jagɛlɛya di i ma?
Kɛwalew 5:27-29 ani Heburuw 10:24, 25 kalan. Tɛmɛsira kelen-kelen bɛɛ kalannen kɔ, a’ye baro kɛ nin ɲininkali kan:
Mun na a nafa ka bon kosɛbɛ an ka ta’a fɛ ka Jehova bato hali ni gofɛrɛnɛmanw y’a fɔ ko an ka waajulibaara ani lajɛw kɛli dabila?
6. Jehova bɛna i dɛmɛ ka muɲuli kɛ
Diɲɛ fan bɛɛ, Jehova Seerew, minnu si hakɛw tɛ kelen ye, olu bɛ ka ta’a fɛ ka Jehova bato kantigiya la hali ni mɔgɔw bɛ ka u tɔɔrɔ. Walasa k’a ye fɛn min bɛ ka u dɛmɛ, a’ye WIDEYO lajɛ. O kɔ aw ka baro kɛ nin ɲininkali kan:
Jehova Seere minnu jirala wideyo kɔnɔ, mun de ye olu dɛmɛ ka muɲuli kɛ?
Romɛkaw 8:35, 37-39 ani Filipekaw 4:13 kalan. Tɛmɛsira kelen-kelen bɛɛ kalannen kɔ, a’ye baro kɛ nin ɲininkali kan:
Nin tɛmɛsira b’a jira i la k’a jɛya cogo di, ko i bɛ se ka kɔrɔbɔli suguw bɛɛ muɲu?
Matiyu 5:10-12 kalan, o kɔ aw ka baro kɛ nin ɲininkali kan:
Mun na i bɛ se ka kɛ nisɔndiya la hali ni mɔgɔw bɛ ka i tɔɔrɔ?
Jehova batobaga miliyɔn caman taara a fɛ ka a bato kantigiya la hali k’a sɔrɔ mɔgɔw tun bɛ ka u kɛlɛ. E fana bɛ se ka o kɛ!
MƆGƆ DƆW B’A FƆ KO: “Ne tɛna se ka tɔɔrɔ muɲu.”
Tɛmɛsira jumɛnw de bɛ se k’a to o tigilamɔgɔw ka da a la ko u bɛ se ka tɔɔrɔ muɲu?
BAKURUBAFƆLI
An bɛ cɛsiri minnu kɛ walasa ka Jehova bato hali tɔɔrɔw kɔnɔna na, Jehova bɛ nafaba don olu la. Ni Jehova ka dɛmɛ ye, an bɛna se ka muɲuli kɛ ka ɲɛ!
Seginnkanni
Mun na krecɛnw ka kan ka sigi ni u tɔɔrɔli ye?
I bɛ se ka mun de kɛ sisan walasa i labɛnnen ka kɛ tɔɔrɔw waati la?
Mun de bɛ se ka i dɛmɛ i ka d’a la ko i bɛ se ka Jehova bato hali kɔrɔbɔli suguw bɛɛ kɔnɔna na?
NINNU LAJƐ
Balimakɛ funankɛ dɔ donna kaso la ka d’a kan a ma sɔn k’a sen don politikiko la. O balimakɛ lamɛn a kɛtɔ k’a ɲɛfɔ Jehova y’a dɛmɛ cogo min na k’a to kaso la.
A lajɛ fɛn min ye furuɲɔgɔnma dɔw dɛmɛ u ka ta’a fɛ ka Jehova bato kantigiya la san caman kɔnɔ hali k’a sɔrɔ mɔgɔw tun bɛ ka u kɛlɛ.
A lajɛ i bɛ se ka jagɛlɛya sɔrɔ cogo min na tɔɔrɔw waati la.
Ni an ka denbaya kɔnɔmɔgɔw bɛ an kɛlɛ, an ka kan ka o ye cogo di? O bɛ na ni gɛlɛya minnu ye, an bɛ se ka se sɔrɔ o gɛlɛyaw kan cogo di?