KALANSEN 55
I bɛ jɛkulu min kɔnɔ, o dɛmɛ
Diɲɛ fan bɛɛ, mɔgɔ miliyɔn caman bɛ Jehova bato nisɔndiya la jɛkulu waa caman kɔnɔ. U bɛ kalan ani ɲɛminɛli minnu sɔrɔ, u bɛ waleɲumandɔn jira olu ko la. U b’a bɔ u yɛrɛ la fana ka u ka jɛkulu dɛmɛ sira caman fɛ. Yala i fana nisɔndiyalen don ka kɛ jɛkulu kɔnɔ ani i bɛ waleɲumandɔn jira o kosɔn wa? Yala i kɔrɔtɔlen don ka jɛkulu dɛmɛ wa?
1. I bɛ se ka baara kɛ ni i ka waati ani i ka fanga ye sira minnu fɛ ka jɛkulu dɛmɛ, olu dɔw ye jumɛnw ye?
An bɛɛ bɛ se ka dɛmɛ don jɛkulu kɔnɔ. Misali la, yala aw ka jɛkulu kɔnɔmɔgɔ dɔw ye cɛkɔrɔbaw, musokɔrɔbaw walima lujuratɔw ye wa? Yala i bɛ se ka u dɛmɛ ka na ni u ye lajɛw la wa? Walima, yala i bɛ se ka u dɛmɛ cogo wɛrɛw la wa? Misali la, ka u ka dumunifɛnw san ani fɛn wɛrɛw u mago bɛ minnu na, walima ka u ka sow jɔɔsi? (Yakuba 1:27 kalan.) An bɛ se k’a bɔ an yɛrɛ la fana ka dɛmɛ don an ka Masaya So saniyali ani a ladonni na. Mɔgɔ si tɛ an jagoya ka o kow kɛ. Kanuya min bɛ an na ka ɲɛsin Ala ani an balimaw ma, o de bɛ an bila an k’a fɔ ko: “Ne, i ka ne ci.”—Esayi 6:8.
Weleweledala batiselenw bɛ se ka jɛkulu dɛmɛ sira caman wɛrɛw fɛ. Bibulu b’a ɲini balimakɛw fɛ u ka fɛn dɔw kɛ walisa u ka se ka kɛ diinɛ maakɔrɔw kankɔrɔsigiw walima diinɛ maakɔrɔw ye. Balimakɛ minnu ye o laɲinitaw dafa, olu bɛ se ka kɛ diinɛ maakɔrɔw kankɔrɔsigiw ye ani taalen ɲɛ ka kɛ diinɛ maakɔrɔw ye. Balimakɛw ani balimamusow bɛɛ lajɛlen bɛ se ka dɛmɛ don kosɛbɛ waajulibaara la u kɛtɔ ka kɛ tutigɛbagaw ye. Jehova Seere dɔw bɛ u yɛrɛ labila walasa ka dɛmɛ don batolikɛyɔrɔw jɔli la walima ka yɛlɛma ka taa yɔrɔ wɛrɛ la walasa ka jɛkulu dɔ dɛmɛ min mago bɛ dɛmɛ na sira wɛrɛw fɛ.
2. An bɛ se ka baara kɛ ni an bolofɛnw ye cogo di walasa ka jɛkulu dɛmɛ?
An bɛ se ka Matigi Jehova “bonya ni [an] bolofɛnw ye”. (Ntalenw 3:9) Nisɔndiyako don an bolo ka an ka wari ani an bolofɛn wɛrɛw di walasa ka an ka yɔrɔ jɛkulu dɛmɛ ani ka waajulibaara fana dɛmɛ min bɛ ka kɛ diɲɛ fan bɛɛ. (2 Kɔrɛntekaw 9:7 kalan.) Baara bɛ kɛ ni an ka bolomafaraw ye fana ka kasaaratɔw dɛmɛ. Jehova Seere caman bɛ “wari dɔ bila a dan na” u ka so tuma bɛɛ walasa ka o kɛ bolomafara ye. (1 Kɔrɛntekaw 16:2 kalan.) An bɛ se ka bolomafaraw bila buwatiw kɔnɔ minnu bɛ an ka batolikɛyɔrɔw la. An bɛ se ka bolomafaraw di fana intɛrinɛti kan donate.jw.org kan. Ka baara kɛ ni an ka wari ani an bolofɛnw ye walasa ka jɛkulu dɛmɛ, o ye cogo dɔ ye min fɛ an b’a jira ko an bɛ Jehova kanu.
DƆ FARA I KA DƆNNIYA KAN
I bɛ se ka jɛkulu dɛmɛ sira minnu fɛ, an ka olu dɔw sɛgɛsɛgɛ.
3. An bɛ se ka an bolofɛnw di
Mɔgɔ minnu bɛ nili kɛ ni nisɔndiya ye, olu ko ka di Jehova ye. Misali la, Yesu ye muso cɛ salen dɔ tanu, o min tun ye faantan ye, o bɛɛ n’a ta, a ye fɛn dɔ di Jehova ma. Luka 21:1-4 kalan, o kɔ aw ka baro kɛ nin ɲininkaliw kan:
Yala an ka kan ka fɛn caman de di walasa an ko ka diya Jehova ye wa?
Jehova ni Yesu bɛ kɛ cogo di ni an bɛ nili kɛ ni an dusukun bɛɛ ye?
Walasa k’a dɔn baara bɛ kɛ ni an ka bolomafaraw ye cogo min na, a’ye WIDEYO lajɛ. O kɔ aw ka baro kɛ nin ɲininkali kan:
Baara bɛ ka kɛ ni an ka bolomafaraw ye cogo di walasa ka jɛkuluw dɛmɛ diɲɛ fan bɛɛ?
4. An bɛ se k’a bɔ an yɛrɛ la ka baara kɛ
Bibulu sɛbɛn waatiw la, Jehova batobagaw tun tɛ dan dɔrɔn ka wari di ka kɛ bolomafaraw ye. Nka u tun bɛ baaraba kɛ ni jijaliba ye fana walasa ka u ka batolikɛyɔrɔw ladon. 2 Tilew Kibaru 34:9-11 kalan, o kɔ aw ka baro kɛ nin ɲininkali kan:
Israɛlkaw kelen-kelen bɛɛ ye dɛmɛ don cogo di Jehova ka so walima batolikɛyɔrɔ dilanni na?
Walasa k’a ye Jehova Seerew bɛ ka tugu o misali kɔ cogo min na, a’ye WIDEYO lajɛ. O kɔ aw ka baro kɛ nin ɲininkaliw kan:
Mun na a nafa ka bon an k’an ka Masaya So saniyalen to ani k’a ladon ka ɲɛ?
I bɛ se ka dɛmɛ don o kow kɛli la sira jumɛnw fɛ?
5. Balimakɛw bɛ se k’a ɲini ka baara kɛ walasa ka jɔyɔrɔw fa jɛkulu kɔnɔ
Bibulu bɛ dusu don krecɛn cɛw kɔnɔ, u k’a ɲini ka u seko bɛɛ kɛ walasa ka baara kɛ jɛkulu ye. Walasa ka o misali dɔ ye, a’ye WIDEYO lajɛ. O kɔ, aw ka nin ɲininkali jaabi:
Wideyo kɔnɔ, Ryan ye mun de kɛ walasa ka baara kɛ kosɛbɛ jɛkulu ye?
Bibulu bɛ laɲinitaw ɲɛfɔ balimakɛw ka kan ka minnu dafa walasa ka kɛ diinɛ maakɔrɔw kankɔrɔsigiw ani diinɛ maakɔrɔw ye. 1 Timote 3:1-13 kalan, o kɔ aw ka baro kɛ nin ɲininkaliw kan:
Mun de ɲininen bɛ balimakɛw fɛ minnu b’a fɛ ka kɛ diinɛ maakɔrɔw kankɔrɔsigiw ani diinɛ maakɔrɔw ye?
Mun de ɲininen bɛ u ka denbaya kɔnɔmɔgɔw fɛ? —Tilayɔrɔdennin 4 ani 11 lajɛ.
Ni balimakɛw bɛ u seko kɛ ka o laɲinitaw dafa, o bɛ jɛkulu kɔnɔmɔgɔw bɛɛ nafa cogo di?
MƆGƆ DƆ BƐ SE KA NIN ƝININKALI KƐ: “Jehova Seerew bɛ wari bɔ yɔrɔ jumɛn walisa ka u ka diinɛ baaraw kɛ?”
I bɛ o tigi jaabi cogo di?
BAKURUBAFƆLI
Jehova bɛ nisɔndiya kosɛbɛ k’a ye, ko an bɛ ka cɛsiriw kɛ walasa ka jɛkulu dɛmɛ ni an ka waati, an fanga ani an bolofɛnw ye.
Seginnkanni
An bɛ se ka baara kɛ ni an ka waati ani an fanga ye cogo jumɛn na walasa ka jɛkulu dɛmɛ?
An bɛ se ka jɛkulu dɛmɛ ni an bolofɛnw ye cogo jumɛn na?
A bɛ diya i ye ka jɛkulu dɛmɛ sira jumɛnw fɛ?
NINNU LAJƐ
Cɛ minnu batisera, Bibulu bɛ jɔyɔrɔ dɔw kalifa olu la. Nka ni mago jɔra muso batiselen dɔ la, o ka o jɔyɔrɔw dafa dun?
“Kuntigiya min kalifara mɔgɔw ma jɛkulu kɔnɔ, a ɲini ka o ko faamu” (w21.02)
A lajɛ Jehova Seere dɔw bɛ cɛsiriba minnu kɛ walasa ka gafew lase u krecɛn ɲɔgɔnw ma.
Gafe minnu sinsinnen bɛ Bibulu kan, u bɛ olu lase mɔgɔw ma Kɔngo jamana na (4:25)
An ka diinɛ baaraw bɛ kɔkɔrɔdon ni wari ye cogo min na, o kɛcogo ni diinɛ tɔw ta tɛ kelen ye, o lajɛ.
“Jehova Seerew ka diinɛ baaraw bɛ kɔkɔrɔdon ni wari ye cogo di?” (jw.org barokun dɔ)