“Jɔnkɛ dannamɔgɔ hakiliman” jɔyɔrɔ

Yesu de ye Krecɛn jɛkulu kuntigi ye. (Efesekaw 5:23) Bi bi in na, Yesu bɛ sankolo la, a bɛ ka tɛmɛn “jɔnkɛ dannamɔgɔ hakiliman” fɛ walasa ka a nɔfɛmɔgɔw ɲɛminɛ dugukolo kan. (Matiyu 24:45 kalan.) Yesu Krisita yɛrɛ de ye o jɔnkɛ sigi ani ka yamaruya di a ma a ka latigɛli dɔw kɛ. O bɛɛ n’a ta, o jɔnkɛ in ka kan ka Krisita kan minɛ ani ka baara kɛ Krisita balimaw ye. O jɔnkɛ in ye jɔni de ye? O jɔnkɛ bɛ ka a janto an na cogo jumɛn na?

1. “Jɔnkɛ dannamɔgɔ hakiliman” ye jɔni de ye?

Jehova furadama ye baara kɛ ni cɛ dɔ walima kulunin dɔ, min kɔnɔmɔgɔw bɛɛ ye cɛw ye walasa ka a ka jamakulu ɲɛminɛ. (Malaki 2:7; Heburuw 1:1) Yesu ka saya kɔfɛ, cidenw ani diinɛ maakɔrɔ minnu tun bɛ Jerusalɛm, olu de tun bɛ krecɛn tɔw ɲɛminɛ. (Kɛwalew 15:2) O cogo kelen na bi fana, diinɛ maakɔrɔ kulunin dɔ bɛ ka ɲɛminɛli kɛ. Olu de bɛ wele Jehova Seerew ka Ɲɛmɔgɔ kulu. U bɛ ka dumuni di mɔgɔw ma alako ta fan fɛ ani ka waajulibaara ɲɛminɛ. O kulu de ye “jɔnkɛ dannamɔgɔ hakiliman” ye, Yesu ye min sigi. (Matiyu 24:45a) Ɲɛmɔgɔ kulu mɔgɔw bɛɛ ye krecɛn munnenw de ye. U jigi bɛ a kan ka taa fara Krisita kan walasa ka mara kɛ ni a ye a ka sankolola masaya la. Ni u ka ɲɛnamaya banna dugukolo kan waati min na, u bɛ taa sankolo la o waati de la.

2. Jɔnkɛ dannamɔgɔ bɛ ka dumuni sugu jumɛn de di alako ta fan fɛ?

Yesu y’a fɔ ko jɔnkɛ dannamɔgɔ bɛna a krecɛn ɲɔgɔnw “ka dumuni ko ɲɛnabɔ a waati latigɛlen na”. (Matiyu 24:45b) An bɛ dumuni min dun, o bɛ an dɛmɛ farikolo ta fan fɛ an ka fanga sɔrɔ ani ka to kɛnɛya la. O cogo kelen na, dumuni alako ta fan fɛ, ni o ye bilasiraliw ye minnu bɛ bɔ Ala ka Kuma kɔnɔ, olu fana bɛ fanga di an ma. Olu bɛ fanga di an ma an mago bɛ min na walasa ka to kantigiya la Jehova kɔ ani Yesu ye baara min kalifa an ma an ka ta’a fɛ ka o kɛ. (1 Timote 4:6) O dumuni alako ta fan fɛ, an bɛ o sɔrɔ nin fɛnw sababu fɛ: Lajɛw, tile kelen lajɛbaw, tile saba lajɛbaw, gafe minnu sinsinnen bɛ Bibulu kan ani wideyow. Olu bɛɛ bɛ an dɛmɛ an ka Ala sago dɔn ani ka an ni a ka teriya barika bonya.

DƆ FARA I KA DƆNNIYA KAN

3. Jehova ka jamakulu labɛnnen ka kan ka kɛ

Yesu ka ɲɛminɛli kɔrɔ, Ɲɛmɔgɔ kulu bɛ ka Jehova Seerew ka baaraw labɛn. Yesu ye krecɛn fɔlɔw ɲɛminɛ o cogo kelen na fana. A’ye WIDEYO lajɛ.

WIDEYO: Jehova bɛ a ka mɔgɔw labɛn (6:18)

1 Kɔrɛntekaw 14:33, 40 kalan, o kɔ aw ka baro kɛ nin ɲininkali kan:

• Nin tɛmɛsiraw b’a jira cogo di ko Jehova b’a fɛ a ka Seerew ka kɛ mɔgɔw ye minnu ka kow labɛnnen bɛ?

4. Jɔnkɛ dannamɔgɔ bɛ waajulibaara kow labɛn

Waajulibaara de kɛra baaraw bɛɛ la nafama ye krecɛn fɔlɔw ye min kɛ. Kɛwalew 8:14, 25 kalan, o kɔ aw ka baro kɛ nin ɲininkaliw kan:

• Krecɛn fɔlɔw cɛla, jɔni de tun bɛ waajulibaara kow ɲɛminɛ?

• Piɛrɛ ni Yuhana ye mun de kɛ ka ɲɛsin bilasiraliw ma ciden tɔw ye minnu di?

Waajulibaara de ye baaraw bɛɛ la nafama ye Ɲɛmɔgɔ kulu bɛ ka min kow labɛn. A’ye WIDEYO lajɛ.

WIDEYO: U sinsinnen tora waajulibaara kan (1:​24)

Yesu y’a jira ko waajuli nafa ka bon kosɛbɛ. Marka 13:10 kalan, o kɔ aw ka baro kɛ nin ɲininkaliw kan:

• Mun na waajulibaara nafa ka bon kosɛbɛ Ɲɛmɔgɔ kulu bolo?

• O baara bɛ kɛ diɲɛ fan bɛɛ, mun na an mago b’a la “jɔnkɛ dannamɔgɔ hakiliman” ka o baara kow labɛn?

5. Jɔnkɛ dannamɔgɔ bɛ bilasiraliw di

Ɲɛmɔgɔ kulu bɛ bilasiraliw di krecɛnw ma diɲɛ fan bɛɛ. Ɲɛmɔgɔ kulu bɛ bilasirali minnu di, a bɛ olu ko latigɛ cogo di? An k’a lajɛ krecɛn fɔlɔw ka Ɲɛmɔgɔ kulu tun bɛ o kɛ cogo min na. Kɛwalew 15:1, 2 kalan, o kɔ aw ka baro kɛ nin ɲininkaliw kan:

• Sɔsɔliba donna krecɛn fɔlɔ dɔw ni ɲɔgɔn cɛ fɛn jumɛn de ko la?

• Paul ni Barnabasi ani mɔgɔ wɛrɛw taara jɔniw de yɔrɔ walasa ka o ko ɲɛnabɔ?

Kɛwalew 15:12-18, 23-29 kalan, o kɔ aw ka baro kɛ nin ɲininkali kan:

• Sani o krecɛn fɔlɔw ka Ɲɛmɔgɔ kulu ka latigɛli dɔ kɛ, a ye mun de kɛ walasa ka Ala ka ɲɛminɛli sɔrɔ o ko kan?​—Tilayɔrɔdenninw 12, 15 ani 28 lajɛ.

Kɛwalew 15:30, 31 ani 16:4, 5 kalan, o kɔ aw ka baro kɛ nin ɲininkaliw kan:

• Ɲɛmɔgɔ kulu ye bilasirali minnu di, krecɛn fɔlɔw ye mun de kɛ ka ɲɛsin olu ma?

• Jehova dubara u ka kanminɛli ye cogo jumɛn na?

2 Timote 3:16 ani Yakuba 1:5 kalan, o kɔ aw ka baro kɛ nin ɲininkali kan:

• Bi bi in na, Ɲɛmɔgɔ kulu bɛ ɲɛminɛli ɲini yɔrɔ jumɛn ni u bɛ latigɛliw kɛ?

BAKURUBAFƆLI

Ɲɛmɔgɔ kulu de ye “jɔnkɛ dannamɔgɔ hakiliman” ye, Krisita ye min sigi. O Ɲɛmɔgɔ kulu bɛ bilasiraliw ani alako dumuni di krecɛnw ma diɲɛ fan bɛɛ.

Seginnkanni

• Jɔni de ye “jɔnkɛ dannamɔgɔ hakiliman” sigi?

• Ɲɛmɔgɔ kulu bɛ a janto an na cogo di?

• Yala i dalen b’a la ko Ɲɛmɔgɔ kulu de ye “jɔnkɛ dannamɔgɔ hakiliman” ye wa?

NINNU LAJƐ

A lajɛ Ɲɛmɔgɔ kulu labɛnnen bɛ cogo min na a ka baara kɛli kama.

“Jehova Seerew ka Ɲɛmɔgɔ kulu ye mun de ye?” (jw.org barokun dɔ)

Ɲɛmɔgɔ kulu mɔgɔw bɛ mun de miiri baara ko la Yesu ye min kalifa u ma?

Bonyaba dɔ, min ko ka di an ye (7:​04)

An ka lajɛw ani an ka lajɛbaw b’a jira cogo di ko Jehova bɛ ka Ɲɛmɔgɔ kulu ɲɛminɛ?

Jehova bɛ a ka mɔgɔw kalan (9:​39)