KALANSEN 11
I bɛ se ka nafaba bɔ Bibulu la cogo min na
Yala i delila k’a ɲini ka baaraba dɔ kɛli daminɛ, nka i y’a miiri ko o baara ka gɛlɛn kojugu wa? Walasa o kɛli kana gɛlɛya i ma koguju, i bɛ se ka o baara tilatila ka a kɛ dɔɔnin-dɔɔnin, o la a kɛli bɛ nɔgɔya i ma. Bibulu kalanjɛ kɛli bɛ o cogo de la fana. I bɛ se ka i yɛrɛ ɲininka ko: ‘Ne b’a daminɛ yɔrɔ jumɛn?’ Nin kalansen in kɔnɔ, an bɛna fɛn nɔgɔnman dɔw ye i bɛ se ka minnu kɛ ni olu bɛna i dɛmɛ walasa Bibulu kalanjɛ kɛli ani Bibulukalan kɛli ka diya i ye.
1. Mun na an ka kan ka to ka Bibulu kalanjɛ kɛ tuma bɛɛ?
Mɔgɔ min bɛ Bibulu walima Jehova “ka sariya” kalanjɛ kɛ tuma bɛɛ, o tigi bɛ nisɔndiya sɔrɔ wa a ka ko kɛtaw bɛ ɲɛ. (Zaburu 1:1-3 kalan.) Walasa ka o kɛli daminɛ, a ɲini ka to ka Bibulu kalanjɛ kɛ miniti damadɔ dɔrɔn kɔnɔ don o don. Ni i bɛ ka Ala ka Kuma dɔn ka ta’a fɛ, Bibulu kalanjɛ kɛli bɛ diya i ye ka ta’a fɛ.
2. Mun de bɛna i dɛmɛ i ka nafa bɔ Bibulu kalanjɛ la?
Walasa ka nafaba bɔ Bibulu kalanjɛ la, an ka kan ka to ka an jɔ ani ka an hakili jagabɔ fɛnw kan, an bɛ ka minnu kalan. An ka kan ka to ka Bibulu kalanjɛ kɛ ani ka “miiri a la”. (Josue 1:8) Ka i to Bibulu kalanjɛ la, nin ɲininkali suguw kɛ i yɛrɛ la: ‘Nin bɛ ne kalan mun de la Jehova Ala ko la? Ne bɛ se ka nin waleya cogo di ne ka ɲɛnamaya kɔnɔ? Ne bɛ se ka baara kɛ ni nin tɛmɛsiraw ye cogo di walasa ka mɔgɔ wɛrɛw dɛmɛ?’
3. I bɛ se ka waati sɔrɔ tuma jumɛn Bibulu kalanjɛ kama?
Yala i bɛ ka siɲɛ ta walasa ka waati sɔrɔ Bibulu kalanjɛ kɛli kama wa? An caman bɛ ka o kɛ. A ɲini ka i “ka waati kunmabɔ”. (Efesekaw 5:16) I bɛ se ka o kɛ i kɛtɔ ka waati kɛrɛnkɛrɛnnen dɔ boloda Bibulu kalanjɛ kɛli kama don o don. Mɔgɔ dɔw bɛ waati sɔrɔ ka Bibulu kalanjɛ kɛ sɔgɔmada joona fɛ. Dɔ wɛrɛw b’a kɛ tile kɔnɔna na, laala u ka poziw waatiw la midi yan fan fɛ. Dɔw wɛrɛw fana bɛ Bibulu kalanjɛ kɛ sufɛ sani u k’u da. Waati jumɛn de bɛ kɛ waati bɛɛ la ɲuman ye e bolo?
DƆ FARA I KA DƆNNIYA KAN
An k’a ɲini k’a dɔn i bɛ se ka min kɛ walasa i ka Bibulu kalanjɛ ka diya kosɛbɛ. An b’a lajɛ fana i bɛ se ka i labɛn koɲuman cogo min na walasa i ka nafaba bɔ i ka Bibulukalan na.
Iko an bɛ se k’an dege cogo min na dumuni suguya caman dunni ka diya an ye, an bɛ se k’an dege fana Bibulu kalanjɛ kɛli ka diya an ye
4. A ɲini ka Bibulu kalanjɛ kodiya i yɛrɛ ye
A bɛ se ka kɛ ko Bibulu kalanjɛ kɛli daminɛ ma nɔgɔn. O bɛɛ n’a ta, an bɛ se ka o kɛli “nege” don an na iko mɔgɔ bɛ se ka dumuni kura dunni diya don a yɛrɛ la cogo min na. 1 Piɛrɛ 2:2 kalan, o kɔ aw ka baro kɛ nin ɲininkaliw kan:
Yala e hakili la, ni i tora ka Bibulu kalanjɛ kɛ don o don, o b’a to a ka diya i ye wa? Ani yala o bɛ kɛ sababu ye i k’a ɲini ka to ka a kalan ka ta’a fɛ wa?
A’ye WIDEYO lajɛ walasa k’a dɔn cogo min na mɔgɔ dɔw y’a daminɛ ka Bibulu kalanjɛ kodiya u yɛrɛw ye. O kɔ aw ka baro kɛ nin ɲininkaliw kan:
Wideyo kɔnɔ, funankɛw ye se sɔrɔ gɛlɛya jumɛnw de kan?
Mun de y’u dɛmɛ u ka ta’a fɛ ka to ka Bibulu kalanjɛ kɛ tuma bɛɛ?
U ye mun de kɛ walasa u ka Bibulu kalanjɛ ka diya kosɛbɛ?
Hakilinaw, walasa k’i dɛmɛ i ka Bibulu kalanjɛ kɛli daminɛ:
Bibulu sugandi min bayɛlɛmana ka kɛɲɛ ni sisan kanw fɔcogo ye ani o ka kɛ Bibulu ye min ka kuma jɛlen don. Ni Traduction du monde nouveau bɛ aw ka kan na, i ka o kalan k’a lajɛ walima Bibulu wɛrɛ min bɛ sɔrɔ kan na, i bɛ min dɔn ka ɲɛ.
Bibulu yɔrɔ minnu ka di i ye kosɛbɛ, a daminɛ ni olu kalanni ye. Walasa ka hakilinaw sɔrɔ, nin tablo lajɛ: “Bibulu kalanjɛ kɛli daminɛ.”
I ye fɛn minnu kalan ka ban, olu sɛbɛn. Baara kɛ ni nin tablo ye: “I ka Bibulu kanlanjɛ taabolo kɔlɔsi”, o tablo bɛ nin gafe in kɔnɔ.
Baara kɛ ni JW Library® application ye. I mana kɛ yɔrɔ o yɔrɔ, i bɛ se ka Bibulu kalan walima ka a kan talen lamɛn kan caman na ni i ka telefɔni smartphone walima masinmafɛn wɛrɛ ye o application sababu la.
Baara kɛ ni Ala ka kuma kalanni ɲɛminɛlan gafenin ye. Kartiw ani tablow b’a kɔnɔ minnu bɛ se ka i ka Bibulu kalanjɛ diya kosɛbɛ.
5. To ka i ka Bibulukalan labɛn
Zaburu 119:34 kalan, o kɔ aw ka baro kɛ nin ɲininkali kan:
Mun na a ka ɲi i ka to ka delili kɛ fɔlɔ sani i ka Bibulu kalanjɛ kɛ walima sani i k’i ka Bibulukalan labɛn?
I bɛ se ka nafaba bɔ i ka Bibulukalanw bɛɛ la cogo di? Ni i bɛ ka kalansen dɔ labɛn nin Bibulukalan gafe in kɔnɔ, i ka nin fɛn ninnu kɛ k’a lajɛ:
Dakun minnu bɛ kalansen daminɛ na, olu bɛɛ kalan.
Tɛmɛsiraw ɲini ani ka u kalan, ani a ɲini k’a dɔn jɛɲɔgɔnya min bɛ o tɛmɛsiraw ni o kalansen kumaw cɛ.
Tiiri ci daɲɛ kolomaw walima kumasen kolomaw kɔrɔ minnu bɛ ɲininkaliw bɛɛ kelen-kelen jaabiw di. O bɛna i dɛmɛ e ni i ka kalanbaga ka baro la o kalansen kan.
I tun bɛ nin dɔn wa?
Jehova Seerew ye baara kɛ ni Bibulu bayɛlɛmalen caman ye. O n’a ta bɛɛ La Bible. Traduction du monde nouveau ko ka di an ye kɛrɛnkɛrɛnnenya la, ka d’a kan a ka kumaw ye tiɲɛ ye, a ka kumaw jɛlen don ani Ala tɔgɔ b’a kɔnɔ.—Nin barokun lajɛ jw.org kan “Les Témoins de Jéhovah ont-ils leur Bible à eux ?”
MƆGƆ DƆW B’A FƆ KO: “Bibulukalan ka gɛlɛn kojugu. O kɛwaati tɛ ne bolo walima o kɛli fanga tɛ ne la.”
E hakilina ye mun ye Bibulukalan ko la?
BAKURUBAFƆLI
Walasa ka nafaba bɔ Bibulu la, waati boloda a kalanni kama, delili kɛ walasa i bɛ fɛn minnu kalan i ka olu faamu, ani to ka i ka Bibulukalanw labɛn.
Seginnkanni
Mun de bɛna i dɛmɛ i ka nafaba bɔ Bibulu la?
I bɛ se ka waati sɔrɔ tuma jumɛn Bibulu kalanjɛ ani Bibulukalan kama?
Mun na a ka ɲi i ka to ka i ka Bibulukalanw labɛn?
NINNU LAJƐ
Bibulu kalanjɛ kɛcogo saba lajɛ.
“Bibulu bɛ se ka ne dɛmɛ cogo di?—Yɔrɔ 1: Bibulu kɔnɔkow sɛgɛsɛgɛ” (jw.org barokun dɔ)
A lajɛ i bɛ se ka min kɛ walasa ka i ka Bibulu kalanjɛ diya.
“Bibulu bɛ se ka ne dɛmɛ cogo di?—Yɔrɔ 2: Bibulu kalanjɛ kɛli diya i yɛrɛ ye” (jw.org barokun dɔ)
Kalankɛ hakilina dɔw sɔrɔ ka bɔ mɔgɔw yɔrɔ minnu bɛ ka Bibulu kalanjɛ kɛ a bɛ san caman bɔ.