Ni bɔnɛ donna furu kɔnɔ

Hali n’i ye i se bɛɛ kɛ walasa ka furu ni denbaya hɛrɛma sɔrɔ, ko balilen dɔw bɛ se ka na min bɛ se k’a to a bɛ gɛlɛya i bolo ka i ka nisɔndiya mara. (Waajulikɛla 9:11) Ala bɛ dɛmɛ di an ma ni kanuya ye ni gɛlɛya bɛ an kan. Sariyakolow minnu bɛ Bibulu kɔnɔ ni i bɛ olu waleya, e ni i ka denbaya bɛna se ka gɛlɛyaw ɲɛnabɔ, hali n’a y’a sɔrɔ kogɛlɛnbaw don.

1 DANNAYA DA JEHOVA KAN

BIBULU BƐ NIN DE FƆ: “A’ ye aw hami kow bɛɛ da ale kan, katuguni a bɛ a janto aw la.” (1 Piɛrɛ 5:7) Aw ye aw hakili to a la tuma bɛɛ ko Ala nɔ tɛ aw ka gɛlɛyaw ye. (Yakuba 1:13) Ni aw bɛ gɛrɛ ale la, a bɛna aw dɛmɛ cogo bɛɛ la fisama na. (Esayi 41:10) Aw ye “aw kɔnɔna kow bɛɛ fɔ a ye k’a foori.”—Zaburu 62:9

Aw fana bɛna dususaalo sɔrɔ n’aw bɛ aw ka Bibulu kalan don o don. O bɛn’a to aw bɛna a ye Jehova ‘bɛ aw dusuw saalo aw ka tɔɔrɔw bɛɛ la’ cogo min na. (2 Kɔrɛntekaw 1:3, 4; Romɛkaw 15:4) Ala ye layidu ta ‘k’a ka hɛrɛ min bɛ tɛmɛn mɔgɔw ka miiriliw bɛɛ kan’, k’a bɛ o di aw ma.—Filipekaw 4:6, 7, 13.

I BƐ SE KA MIN KƐ:

• Delili kɛ walasa ka Jehova ka dɛmɛ sɔrɔ, i madalen ka to ani ka miiri cogo bɛnnen na.

• Fɛɛrɛ minnu sɔrɔ la aw fɛ, a’ye olu bɛɛ jate minɛ, o la min bɛ bɛn aw ma koɲuman a’ye o sugandi

2 AW Y’AW JANTO AW YƐRƐ LA ANI AW KA DENBAYA LA

BIBULU BƐ NIN DE FƆ: “Hakilitigi dusukun bɛ dɔnniya sɔrɔ. Mɔgɔ hakiliman tulo bɛ dɔnniya ɲini.” (Ntalenw 18:15) Ko minnu kɛra olu bɛɛ dɔn. I ka denbaya kɔnɔ mɔgɔ kelen kelen bɛɛ mago bɛ min na a ɲini ka o dɔn. Kuma u fɛ. U lamɛn—Ntalenw 20:5.

I bɛ mun kɛ n’i ka sɔkɔnɔmɔgɔ dɔ min ka di i ye kosɛbɛ sara? Kana siran k’i dusukunnata fɔ. I hakili to a la ko hali “Yesu kasira.” (Yuhana 11:35; Waajulikɛla 3:4) K’i sɛgɛnlafiyɛnbɔ ani ka sunɔgɔ o fana nafa ka bon. (Waajulikɛla 4:6) O bɛna kɛ sababu ye ka gɛlɛya ɲɛnabɔ nɔgɔya la.

I BƐ SE KA MIN KƐ:

• Sani bɔnɛ ka na, i yɛrɛ dege kumaɲɔgɔnya la i ka denbaya fɛ. O la ni gɛlɛyaw nana, u bɛna kuma i fɛ ni hakililatigɛ ye

• Kuma mɔgɔw fɛ o gɛlɛya ɲɔgɔn delila ka minnu sɔrɔ

3 AW YE DƐMƐ SƆRƆ AW MAGO BƐ MIN NA

BIBULU BƐ NIN DE FƆ: “Teri sɛbɛ bɛ mɔgɔ kanu tuma bɛɛ, a bɛ kɛ i balimakɛ ye tɔɔrɔ waati la.” (Ntalenw 17:17) I teriw b’a fɛ k’i dɛmɛ, nka a bɛ se ka kɛ k’u t’a dɔn u bɛ min kɛ. I mago bɛ min na tigitigi kana siran ka o fɔ u ye. (Ntalenw 12:25) Ani fana dɛmɛ ɲini alako ta fan fɛ ka bɔ mɔgɔw yɔrɔ minnu bɛ Bibulu faamu. U bɛ min fɔ i ye ka bɔ Bibulu kɔnɔ o bɛna i dɛmɛ.—Yakuba 5:14.

I mago bɛ dɛmɛ min na i bɛna o sɔrɔ ni i bɛ fara mɔgɔw kan tuma bɛɛ minnu bɛ dannaya da Ala kan tiɲɛna ani minnu dalen bɛ a ka layidu talen na. I fana bɛna nisɔndiyaba sɔrɔ ni i bɛ mɔgɔw dɛmɛ minnu mago bɛ dususaalo la. Dannaya min bɛ i la ka ɲɛsin Jehova ma ani a ka layidu ma, o tila i ni u cɛ. Mɔgɔ minnu mago bɛ dɛmɛ la taa a fɛ ka olu dɛmɛ, i ko ka di mɔgɔ minnu ye ani minnu bɛ u janto i la i kana i mabɔ olu la.—Ntalenw 18:1; 1 Kɔrɛntekaw 15:58.

I BƐ SE KA MIN KƐ:

• Kuma i teri sɛbɛ fɛ ani a to a k’i dɛmɛ

• I mago bɛ min na o ɲɛfɔ k’a jɛya