An bɛ se k’a kɛ cogo di walasa bɛn ka to an n’an somɔgɔw cɛ?

Furu bɛ kɛ sababu ye ka denbaya kura de sigi. O bɛɛ na ta aw ka kan ka kɛ aw sɔmɔgɔw fɛ ani ka u bonya, nka sisan i furuɲɔgɔn de ye mɔgɔ nafamaba ye i bolo dugukolo kan. A bɛ se ka gɛlɛya i sɔmɔgɔ dɔw bolo ka sɔn o ma. Nka Bibulu sariyakolow bɛ se ka i dɛmɛ ka basigi sɔrɔ, o cogo la hɛrɛ bɛ se ka to i ni i sɔmɔgɔw cɛ i kɛtɔ ka baaraba kɛ walasa ka jɛɲɔgɔnya labɛn i ka denbaya kura kɔnɔ.

1 HAKILINAN ƝUMAN KA KƐ AW LA KA ƝƐSIN AW SƆMƆGƆW MA

BIBULU BƐ NIN DE FƆ: “I ka i fa ni i ba bonya.” (Efesekaw 6:2) Aw mana kɔrɔ cogo o cogo, aw mago b’a la halisa ka bonya da aw sɔmɔgɔw kan. A dɔn k’a fɔ ko i n’a fɔ denkɛ walima denmuso mago b’a la k’a janto a bangebagaw la cogo min na, i furuɲɔgɔn fana mago b’a la k’a janto a bangɛbagaw la o cogo kelen na. ‘Kanuya tɛ keleya’, o la jɛɲɔgɔnya min bɛ i furuɲɔgɔn ni a bangebagaw cɛ o kana i jɔrɔ abada.—1 Kɔrɛntekaw 13:4; Galasikaw 5:26.

I BƐ SE KA MIN KƐ:

• I yɛrɛ tanga kuma damatɛmɛlenw fɔli ma i n’a fɔ, “i sɔmɔgɔw tɛ ne jate tuma si” walima “ne ka kokɛtaw ma deli ka diya i ba ye abada”

• A ɲini ka kow ye i n’a fɔ i furuɲɔgɔn b’u ye cogo min na

2 KUMA GƐLƐN FƆ NI A KA KAN

BIBULU BƐ NIN DE FƆ: “Cɛ na a fa ni a ba bila ka nɔrɔ a muso la, u na kɛ farisogo kelen ye.” (Jenɛse 2:24) Aw mana furu a bɛ se ka kɛ aw sɔmɔgɔw kɔnɔ ko olu de ka kan ka jɔ ni aw ye halisa, ani u bɛ se k’a ɲini ka u sen don aw ka furu la fo k’a dama tɛmɛ.

E ni i furuɲɔgɔn de ka kan k’a latigɛ aw ka kan ka min kɛ, o la aw b’a fɛ u jɔyɔrɔ ka kɛ min ye aw bɛ o jira u la ni kanuya ye. Aw bɛ se ka kuma ni jɛlenya ni tilennenya ye k’a sɔrɔ aw ma o kɛ ni gɛlɛya ye. (Ntalenw 15:1) Yɛrɛmajiginlenya ni ɲumaya ani muɲuli bɛna aw dɛmɛ ka jɛɲɔgɔnya ɲuman sɔrɔ aw ni aw sɔmɔgɔw cɛ ani k’a to “aw ka ɲɔgɔn ka kow muɲu ni kanuya ye.”—Efesekaw 4:2.

I BƐ SE KA MIN KƐ:

• Ni i jɔrɔlen don ko aw sɔmɔgɔw bɛ k’u sen don aw ka ɲɛnamaya la k’a dama tɛmɛ, kuma o kan n’i furuɲɔgɔn ye tuma min na ni kow basigira

• Aw ye bɛn o kow ɲɛnabɔ cogo kan