Gɛlɛyaw bɛ ɲɛnabɔ cogo di?

Ni aw fila y’a daminɛ ka ɲɛnamaya kɛ ɲɔgɔn fɛ, gɛlɛya suguya caman bɛna aw sɔrɔ. Ka d’a kan, aw hakilinataw tɛ kelen ye, aw dusukunnataw tɛ kelen ye ani aw ka ɲɛnamaya ko kɛtaw tɛ kelen ye. Walima o gɛlɛyaw sababu bɛ se ka kɛ kow ye, minnu bɛ bɔ yɔrɔ wɛrɛw la ani ko balilenw bɛ se ka aw sɔrɔ.

Laala o tiɲɛ tɛna diya aw ye, nka Bibulu ladilikanw b’a to an ka gɛlɛyaw kunbɛn. (Matiyu 5:23, 24) Aw na ɲɛnabɔ cogo ɲuman sɔrɔ aw ka gɛlɛyaw la aw kɛtɔ ka Bibulu sariyakolow waleya.

1 A’YE KUMA GƐLƐYA KAN

BIBULU BƐ NIN DE FƆ: ‘Fɛn bɛɛ ni a waati . . . kuma ni a tuma.’ (Waajulikɛla 3:1, 7) A’ye aw jija ka waati ta ka kuma gɛlɛyaw kan. A to i furuɲɔgɔn k’a dɔn sɛbɛ yɛrɛ la i dusukunnata ye min ye ani i miirinata ye min ye ka ɲɛsin aw ka barokun ma. Tuma bɛɛ a’ye “tiɲɛ fɔ” aw furuɲɔgɔn ye. (Efesekaw 4:25) Hali n’o y’a sɔrɔ aw bɛna kuma ko gɛlenw de kan min bɛna ni dusubɔ ye, i yɛrɛ minɛ walasa i kana kɛlɛ kɛ. Jaabi ɲuman b’a to kuma ɲɔgɔnya gasan tɛ se yɔrɔ jan fo ka se kɛlɛ ma.—Ntalenw 15:4; 26:20.

Hali n’a y’a sɔrɔ k’i ma sɔn i furuɲɔgɔn ta ma, i dusu madalen to, wa kana ɲinɛ abada k’i ka kanuya n’i ka bonya jira i furuɲɔgon na. (Kolosekaw 4:6) A ɲini joona ka fura sɔrɔ gɛlɛyaw la ni o bɛ se ka kɛ ani fana i kana kumaɲɔgɔnya tigɛ aw ni ɲɔngɔn cɛ.—Efesekaw 4:26.

I BƐ SE KA MIN KƐ:

• Waati bɛnnen ɲini walasa ka kuma gɛlɛyaw kan

• Ni e de ka kan ka lamɛnni kɛ i jija i kana i furunɔgɔn ka kuma tigɛ. I fana ka kuma waati bɛna se

2 LAMƐNNI ANI FAMUYALI KƐ

BIBULU BƐ NIN DE FƆ: “Aw ka ɲɔgɔn kanu i n’a fɔ balimaw. Aw ka ɲɔgɔn dan ɲɔgɔn bonyali la.” (Romɛkaw 12:10) I ka lamɛnnikɛ cogo nafa ka bon kosɛbɛ. A ɲini ka i furuɲɔgɔn hakilinata faamu ‘hinɛ . . . ni majigin’ kɔnɔ. (1 Piɛrɛ 3:8; Yakuba 1:19) Kana lamɛnni kɛ ni tugubanciya ye. Ni o bɛ se ka kɛ, i bɛ baara min na o bila ka i furuɲɔgɔn lamɛn koɲuman, walima a ɲininka ni aw bɛ se ka kuma kɔfɛ. N’i tɛ i furuɲɔgɔn jate i n’a fɔ i jugu nka n’i b’a jate i n’a fɔ i baarakɛɲɔgɔn o b’a to ‘i dusu tɛna bɔ joona.’—Waajulikɛla 7:9.

I BƐ SE KA MIN KƐ:

• Taa a fɛ ka lamɛnni kɛ ni hakilimaya ye, hali n’a y’a sɔrɔ i ­tulo bɛ min na o mandi i ye

• A ɲini k’a faamu a b’a fɛ ka min fɔ a ka kumafɔta kɔnɔna na. I furuɲɔgɔn kɛcogoya ni a kumacogo jate minɛ

3 AN KA KOLATIGƐTAW WALEYA

BIBULU BƐ NIN DE FƆ: “Nafa bɛ baara sifa bɛɛ la, nka kuma gansan bɛ kɔli lase mɔgɔw ma.” (Ntalenw 14:23) Ka bɛnkan ɲuman sɔrɔ o dɔrɔn tɛ bɔli kɛ. Nka aw fila mana ko min latigɛ aw ka kan ka o waleya. O tɛ se ka kɛ fo aw ka baaraba ni cɛsiribaw kɛ, nka aw bɛn’a ye ko kunba bɛ o kɛli la. (Ntalenw 10:4) Ni aw bɛ baara kɛ ɲɔgɔn fɛ, aw bɛna “ tɔnɔ ɲuman sɔrɔ” aw ka baaraba kɛli la.—Waajulikɛla 4:9.

I BƐ SE KA MIN KƐ:

• Aw bɛɛ kelenkelen k’a latigɛ aw bɛna min kɛ walasa ka aw ka gɛlɛyaw ɲɛnabɔ

• Tuma kelen kelen na , aw ye ɲɛtaga minnu kɛ aw ye jateminɛ kɛ olu kan