Dawuda tun tɛ siran

E bɛ mun kɛ ni i siran na?⁠​— Laala i bɛ taa i ba walima i fa fɛ walisa ka dɛmɛ sɔrɔ. Nka mɔgɔ wɛrɛ bɛ yen min bɛ se ka i dɛmɛ fana. Seba bɛ o ye ka tɛmɛ fɛn bɛɛ kan. Yala i b’a dɔn o ye jɔni ye wa?⁠​— Ɔwɔ, o ye Jehova de ye. An ka kuma kamalennin dɔ kan min ko fɔlen bɛ Bibulu kɔnɔ, ni o tɔgɔ ye ko Dawuda. A tun b’a dɔn ko Jehova tun bɛ se ka a dɛmɛ tuma bɛɛ, o de la a tun tɛ siran.

Tuma min na Dawuda tun ye denyɛrɛnin ye, a bangebagaw ye Jehova kanuya don a dusukun na. O ye Dawuda dɛmɛ a kana siran hali ni siran ko dɔw tun bɛ a sɔrɔ. A tun bɛ a dɔn ko Jehova ye ale teri ye ani ko a tun bɛ se ka ale dɛmɛ. Siɲɛ dɔ la, tuma min na Dawuda bɛ ka a ka saga dɔw kɔlɔsi, waraba belebeleba dɔ nana saga dɔ ta a ka sagaw cɛma. Yala i b’a dɔn Dawuda ye min kɛ wa? A bolila waraba kɔ ani a bɔlen b’a fɛ k’a ye waraba faga ni a bolow dɔrɔn ye! Wa tuma min na ursi wara ko a bɛ se a ka sagaw ma, Dawuda ye o fana faga! E hakili la jɔni ye Dawuda dɛmɛ?​​— Jehova de tun don.

Dawuda ye jagɛlɛya jira kɛrɛnkɛrɛn- nenyala waati dɔ wɛrɛ kɔnɔ. Israɛlkaw tun ka kan ka mɔgɔw kɛlɛ minnu bɛ wele ko Filisitikaw. Filisitikaw ka sɔrɔdasi kelen tun bɛ yen, o tun ye cɛ janmanjanba ye. A tɔgɔ tun ye ko Goliyati. O cɛ janmanjanba in tun bɛ i ɲagaribɔ Israɛlkaw ka sɔrɔdasiw la ani Jehova la. Goliyati ye a ja gɛlɛya ka Israɛlkaw ka sɔrɔdasiw wele, u ka na kɛlɛ kɛ ale fɛ. Nka Israɛlkaw bɛɛ fana tun sirannen don ka kɛlɛ kɛ a fɛ. Tuma min na Dawuda ye o mɛn, a y’a fɔ Goliyati ye ko: ‘Ne bɛna i kɛlɛ! Jehova bɛna ne dɛmɛ, wa ne bɛna se sɔrɔ i kan!’ Yala e hakili la, Dawuda tun ja ka gɛlɛn wa?​​— Ɔwɔ, a ja tun ka gɛlɛn kosɛbɛ. Yala i b’a fɛ k’a dɔn fɛn min kɛra o kɔfɛ wa?

Dawuda ye a ka ntanfura ani kabakurun nugulen duuru ta. Ntanfura ye fɛn ye kabakurun bɛ kɛ min kɔnɔ walasa ka bonni kɛ. Olu talen kɔ, Dawuda taara cɛ janmanjanba in kɛlɛ. Tuma min na Goliyati y’a ye ko Dawuda yɛrɛ tɛ dɔ wɛrɛ ye kamalennin ko, a ye i ɲagaribɔ a la. Nka Dawuda y’a fɔ a ye ko: ‘I bɛ na ne kama ni npan ye, nka ne bɛ taa i kama ni Jehova tɔgɔ ye!’ O yɔrɔnin bɛɛ Dawuda ye kabakurun kelen don a ka ntanfura kɔnɔ, ka boli ka taa Goliyati fan fɛ, ani ka o kɛ ka a bon a ɲɛda la. Kabakurun ye Goliyati gosi a ten na a ɲɛw furancɛ la. Cɛ janmanjanba in binna duguma ka sa! Filisitikaw siran na, u bɛɛ bolila. Dawuda ɲɔgɔn kamalennin sera ka se sɔrɔ nin cɛ janmanjanba in kan cogo di?​​— Jehova ye a dɛmɛ, ani a ye seba di a ma ka tɛmɛ janmanjanba in kan!

I bɛ se ka kalansira jumɛn sɔrɔ Dawuda ka maana na?​​— Seba bɛ Jehova ye ka tɛmɛ fɛn bɛɛ kan. Wa i teri don. O la ni siran bɛ i kan waati min, i hakili to a la ko Jehova bɛ se ka i dɛmɛ walisa i ja ka gɛlɛya!