Yala tuma dɔ la i bɛ i yɛrɛ ye i kelen na ani siran bɛ i minɛ wa?

Cɛnin fitinin in lajɛ ja kan. A yecogo la, a bɛ a kelen na ani a sirannen don, o tɛ tiɲɛ ye wa? Yala o ma deli ka kɛ e la wa?​​— O bɛ kɛ mɔgɔ bɛɛ la tuma dɔw la. Bibulu bɛ kuma Jehova teriw kan minnu tora u kelen na ani siran ye minnu minɛ. U dɔ la kelen tun ye Eli ye. An k’a ɲini ka Eli dɔn.

Eli ye ɲɛnamaya kɛ san caman Israɛl kɔnɔ sani Yesu ka bange. Israɛl masakɛ Akab tun tɛ Ala sɛbɛma bato, ni o ye Jehova ye. Akab ni a muso Jezabɛl tun bɛ Baal de bato ni o ye Ala nkalonma ye. O la Israɛlkaw caman fana y’a daminɛ ka Baal bato. Masamuso Jezabɛl tun ka jugu kosɛbɛ ani a tun b’a fɛ ka Jehova batobagaw bɛɛ faga, hali Eli yɛrɛ fana sen tun bɛ o la! Yala e b’a dɔn Eli ye min kɛ wa?​​—

Eli bolila! A bolila ka taa fo kungo kɔnɔ, ka a dogo kuluwo dɔ kɔnɔ. E hakili la mun na a ye o kɛ?​​— Ɔwɔ, a tun sirannen don. Nka Eli tun man kan ka siran. Mun na? Ka d’a kan a tun b’a dɔn ko Jehova bɛ se ka a dɛmɛ. Jehova ye a ka seebaya jira Eli la ka tɛmɛ. Jehova ye Eli ka delili jaabi a kɛtɔ ka tasuma jigin ka bɔ sankolo la yɔrɔnin kelen. O la siga t’a la ko Jehova tun bɛ se ka Eli dɛmɛ o waati la!

Tuma min na Eli tun bɛ kuluwo kɔnɔ, Jehova kumana a fɛ ani k’a ɲininka ko: ‘E bɛ ka mun de kɛ yan?’ Eli y’a jaabi ko: ‘Ne kelenpe de tora i kɔ ka i bato. Ne bɛ n’kelen na, ani ne sirannen don, u bɛna ne faga.’ Eli tun hakili la ko Jehova batobagaw bɛɛ fagara ka ban. Nka Jehova y’a fɔ Eli ye ko: ‘Ayi, o tɛ tiɲɛ ye. Maa 7000 wɛrɛw bɛ yen, minnu tora ka ne bato. I ja gɛlɛya. Baara caman bɛ ne bolo ka di i ma walisa i k’a kɛ!’ E hakili la o kuma mɛnni diyara Eli ye wa?​​—

Ko minnu ye Eli sɔrɔ, e bɛ se ka kalansira jumɛn bɔ o la?​​— Kana miiri abada ko i bɛ i kelen na ani kana siran. Teriw bɛ i bolo minnu bɛ Jehova kanu ani u bɛ i kanu. Ani fana, fangaba bɛ Jehova bolo ani a bɛna i dɛmɛ fo abada! K’a dɔn ko tiɲɛ yɛrɛyɛrɛ la i tɛ i kelen na tuma si, yala o diyara i ye wa?​​—