Samuɛl tora tilennenya kan

Tuma min na Samuɛl tun ye denmisɛnnin ye, a ye ɲɛnamaya kɛ ani ka baara kɛ finiso la, ni o tun ye yɔrɔ ye mɔgɔw tun bɛ taa Jehova bato yɔrɔ min na. Yala i b’a dɔn Samuɛl taara min kɛ finiso la wa? An k’a ɲini ka Samuɛl ba dɔn fɔlɔ ni o ye Ane ye.

A bɛ waati jan bɔ, Ane tun tɛ se ka den sɔrɔ hali ni o y’a sɔrɔ a tun ka di a ye kosɛbɛ ka den kelen sɔrɔ. O kama a ye Jehova deli ani ka deliliba kɛ walisa a ka a dɛmɛ. A ye layidu ta ko n’a ye den sɔrɔ, k’a bɛ o bila ka taa ɲɛnamaya kɛ finiso la ani ka baara kɛ yen. Jehova ye a ka delili jaabi ka denkɛ di a ma. A ye o tɔgɔ da ko Samuɛl. Wa ka kɛɲɛ ni Ane ka layidu talen ye, Samuɛl kɛlen ka san saba walima san naani sɔrɔ, a ye a bila ka taa finiso la walasa a ka baara kɛ Ala ye yen.

Eli tun ye finiso sarakalasebaa ye. A denkɛ fila fana tun bɛ baara kɛ yen. I hakili bɛ a la ko finiso tun ye Ala bato so ye, o min kɔrɔ ko mɔgɔw tun ka kan ka fɛn ɲuman de kɛ o yɔrɔ la. Nka Eli denkɛw tun bɛ kojuguba de kɛ. U tun bɛ min kɛ Samuɛl ye o ye. Yala Samuɛl ye kojugu kɛ i n’a fɔ Eli denkɛw tun b’a kɛ cogo min na wa?​​— Ayi, a tora tilennenya kan i n’a fɔ a bangebagaw y’a kalan o kɛli la cogo min na.

E hakili la Eli tun ka kan ka mun de kɛ ka ɲɛsin a denkɛ fila ma?​​— A tun ka kan ka u ɲangi. A tun man kan k’a to u ka baara kɛ Ala ka so kɔnɔ bilen. Nka Eli ma o kɛ, o kama Jehova dimina ale ni a den fila bɛɛ kɔrɔ. Jehova ko a bɛ u ɲangi.

Su dɔ la ka Samuɛl to sunɔgɔ la, a ye a mɛn dɔ bɛ k’a wele ko: ‘Samuɛl!’ A bolibato taara Eli kɔrɔ, nka Eli ko a ma: ‘Ne ma i wele.’ O kɛra fɔ siɲɛ fila. A siɲɛ sabanan kɔfɛ, Eli ye a fɔ Samuɛl ye, ni i ye kuma kan in mɛn kokura, i ka kan k’a fɔ ko: ‘Jehova, kuma, ne tulo bɛ i la.’ A welelen kokura, Samuɛl ye o de kɛ. O la, Jehova y’a fɔ Samuɛl ye ko: ‘A fɔ Eli ye ko ne bɛna a ka denbaya ɲangi u ka kojugu kɛlen kosɔn.’ Yala e hakili la a tun ka nɔgɔn Samuɛl bolo ka o cikan lase Eli ma wa?​— Ayi, o tun man nɔgɔn. Nka hali ni o tun bɛ Samuɛl lasiran, Jehova ko Samuɛl ka min kɛ, a ye o de kɛ. Jehova ye min fɔ o kɛra. Eli denkɛ fila sara ka fara Eli yɛrɛ kan.

Samuɛl ye misali ɲuman ye an bolo. A ye ko tilennen kɛ hali k’a sɔrɔ a ɲɛ bɛ mɔgɔ tɔw la ka kojugu kɛ. E dun? Yala i bɛna a kɛ i ko Samuɛl, ka to ko tilennen kan wa? Ni i ye o kɛ, i bɛna Jehova ni i bangebaaw nisɔndiya.