Masalakun 8

Mun na Ala ye tɔɔrɔ labila?

1, 2. Tuma caman na, mɔgɔw ka fɔta ye jumɛn ye hadamadenw ka tɔɔrɔw ko la?

NI MASIBAKO dɔ kɛra, n’o sen fɛ duw cira ani ni niw tiɲɛna, mɔgɔ caman tɛ se k’a faamu mun na o kojuguba suguw bɛ kɛ. Dɔ wɛrɛw bɛ kɔnɔnafili n’u ɲɛ bɛ kojugu ani farinyakow bonya na, u juguya, ani u kɛli la ten fu. I b’a sɔrɔ i b’i yɛrɛ ɲininka ‘Mun na Ala ye tɔɔrɔ labila?’

² Ikomi u ma jaabi wasalen sɔrɔ o ɲininkali in na, caman ka limaniya tilala u la Ala ko ta fan fɛ. U b’a miiri k’a t’a mago don hadamadenw na. Mɔgɔ wɛrɛ minnu bɛ sɔn a ma ko tɔɔrɔ ye ɲɛnamaya kɔnɔko dɔ ye, u bɛ kunaya, ani kojugu minnu bɛ kɛ hadamadenw cɛma, u b’olu bɛɛ turu da Ala kun. N’i ye o dusukunnata suguw sɔrɔ ka tɛmɛ, siga t’a la i bɛna nafa sɔrɔ Bibulu hakilinataw la ka ɲɛsin o koɲɛ ninnu ma.

ALA TƐ TƆƆRƆ SABABU YE

3, 4. Mun na an bɛ se ka d’a la ko juguya ni tɔɔrɔ ma bɔ Jehowa yɔrɔ?

³ Bibulu b’a seereya an ye, k’an ɲɛ bɛ tɔɔrɔ minnu na an lamini na, ko Jehowa Ala tɛ olu sababu ye. Misali la, Krecɛn kalanden Yakuba y’a sɛbɛn ko: “Ni mɔgɔ nɛgɛnna kojugu nɔfɛ, o tigi kana a fɔ ko Ala ye a nɛgɛn, katuguni Ala tɛ se ka nɛgɛn kojugu nɔfɛ, a tɛ mɔgɔ si nɛgɛn kojugu nɔfɛ fana.” (Yakuba 1:13). O bɛ ten minkɛ, gɛlɛya caman minnu bɛ dusukasibaw lase hadamadenw ma, olu tɛ se ka kɛ Ala nɔ ye. A tɛ na ni kɔrɔbɔliw ye hadamadenw kan fana walisa k’u kɛ mɔgɔw ye minnu labɛnnen don sankolola ɲɛnamaya kama. Ala tɛ mɔgɔw tɔɔrɔ fana k’a da u ka kɛwale juguw kan, u ye o kɛwale minnu kɛ, u yɛrɛ ka miiri la, ɲɛnamaya tɛmɛnen dɔ kɔnɔ.—Romɛkaw 6:7.

⁴ Ka fara o kan, hali n’a y’a sɔrɔ kojuguba caman kɛra Ala walima Krista tɔgɔ la, fɛn si tɛ Bibulu kɔnɔ min b’a jira k’u dɔ la kelen delila ka sɔn o wale suguw ma. Jɛ si tɛ Ala ni Krista ani mɔgɔw cɛ, mɔgɔ minnu b’a fɔ k’u bɛ baara kɛ Ala ni Krista ye, k’a sɔrɔ u bɛ nanbara kɛ, ka yuruguyurugu kɛ, ka mɔgɔw faga, ka bin u tɔgɔlafɛnw kan, ani ka fɛn caman wɛrɛw fana kɛ minnu bɛ hadamadenw tɔɔrɔ. Tiɲɛ na, “mɔgɔ jugu ka sira haramulen bɛ Jehowa fɛ”, ani Ala “bɛ i mabɔ mɔgɔ juguw la”.—Ntalenw 15:9, 29.

5. Jehowa ka mankutu dɔw ye jumɛnw ye, ani a dusukunnata ye mun ye ka ɲɛsin a ka danfɛnw ma?

⁵ Bibulu bɛ Jehowa jira i n’a fɔ ‘Matigi [min] falen bɛ hinɛ ni makari la’. (Yakuba 5:11.) A b’a fɔ ko: ‘Tiɲɛ ko ka di Jehowa ye.’ (Zaburu 37:28; Esayi 61:8). Tajurusarala tɛ. A b’a mago don a ka danfɛnw na ni makari ye, ani u ka hɛrɛ ta fan fɛ, a bɛ fɛn bɛɛ la fisaman di u bɛɛ ma (Kɛwalew 14:16, 17). Jehowa y’o de kɛ kabini ɲɛnamaya daminɛ na dugukolo kan.

DAMINƐ DAFALEN DƆ

6. Nsiirin dɔw bɛ kuma hadamadenw ka tariku fɔlɔ kan cogo jumɛn na?

⁶ An bɛɛ delilen bɛ ka dimi ni tɔɔrɔ ye ani k’u dɔn. O la sa, a bɛ se ka gɛlɛya ka miiri waati dɔ la tɔɔrɔ tɛ min na. Nka, kow tun bɛ o cogo de la hadamadenw ka tariku daminɛ na. Hali jamana dɔw ka nsiirinw bɛ kuma o waati hɛrɛma sugu kan. Maana minnu bɛ Gɛrɛkiw ka alaw kun kan, o b’a jira ko “Hadamaden ka Tile Duuru” bɛɛ la fɔlɔ tun bɛ wele “Tile Sanulama”. O waati la, hadamadenw tun bɛ ɲɛnamaya kɛ hɛrɛ la. U tun hɔrɔnyalen bɛ baara gɛlɛn ni dusukasi ani kɔrɔya sɛgɛnw ma. Sinuwaw b’a fɔ nsiirin na ko Masakɛ Nɛrɛmuguma (Huang-Ti) ka fanga tuma na, mɔgɔw tun bɛ balo bɛn kɔnɔ, bɛn min tun bɛ hali u ni waaticogoyaw ani kungosogow cɛ. Perse ni Misira ni Tibe ni Peru ni Mɛkisiki mɔgɔw bɛɛ bɛ ni nsiirinw dɔw ye waati hɛrɛma ani dafalen dɔ kan hadamadenw ka tariku daminɛ na.

7. Mun na Ala ye dugukolo ni hadamadenw da?

⁷ Jamanaw ka nsiirinw ye seginnkanni sugu dɔ dɔrɔn de ye min kɛra hadamadenw ka tariku sɛbɛnnen bɛɛ la kɔrɔman kan, n’o ye Bibulu ye. A b’an ladɔnniya ko Ala ye mɔgɔ fila fɔlɔ Hadama ni Hawa bila alijinɛ dɔ kɔnɔ, n’o welela Edɛn nakɔ. A ye ci di u ma ko: “Aw ka bange ka caya ka dugukolo fa ka a kolo.” (Jenɛse 1:28). An bangebaga fɔlɔw tun bɛ dafalenya diyabɔ. U tun bɛ ni jigiya ye ka dugukolo kuuru bɛɛ ye a ka kɛ alijinɛ ye, ani ka hadamadenw ka denbaya dafalen sigilen ye o kɔnɔ u kɛtɔ ka ɲɛnamaya kɛ bɛn ni hɛrɛ mɛnta kɔnɔ. Ala kuntilenna tun y’o de ye tuma min na a ye dugukolo ni hadamadenw da.—Esayi 45:18.

KƆNƆNAJUGUYA LAƝININI DƆ

8. Hadama ni Hawa tun ka kan ka ci jumɛn sirataama, nka mun kɛra?

⁸ Walisa ka to Ala ka mandiya kɔnɔ, Hadama ni Hawa tun ka kan k’u yɛrɛ minɛ “ko ɲuman ni ko jugu dɔnniya jiri” dumuni la (Jenɛse 2:16, 17). N’u tun ye Jehowa ka sariya sirataama, tɔɔrɔ si tun tɛna hadamadenw ka ɲɛnamaya ɲɛmanɔgɔ. U kɛtɔ ka Ala ka cikan sirataama, u tun bɛna u ka kanuya n’u ka kantigiya jira ka ɲɛsin Jehowa ma (1 Yuhana 5:3). Nka, iko an y’a kalan cogo min na Masalakun 6 nan na, kow ma taa o sira fɛ. A kɔnɔnasulen Sitanɛ fɛ, Hawa ye jiri in den dumu. O kɔfɛ, Hadama fana ye dɔ dumu o jiriden kɔnnen na.

9. Ɲininkali jumɛn lawulila Sitanɛ fɛ n’o tun bɛ Jehowa kun kan?

⁹ Ko min kɛra, yali e ɲɛ bɛ o juguya la wa? Jehowa jɔyɔrɔ iko Kɔrɔtalenba, o de sɔsɔra Sitanɛ fɛ. A kɛtɔ ka fɔ ko: “Aw tɛna sa dɛ”, Sendonbaga ye Ala ka kumakan ninnu sɔsɔ, ko: “I na sa dɛ.” Sitanɛ ka kuma tɔw ye Hadama ni Hawa bila u ka d’a la ko Jehowa tun y’a dogo u la k’u tun bɛ se ka kɛ iko Ala. O cogo la, u mago tɛna kɛ Ale la tun ka ɲuman ani juguman latigɛ. O la sa, dalilu min bɛ Jehowa bolo ka kɛ Dunuya Masaba ye, Sitanɛ ka laɲinini ye sɔsɔli don o la—Jenɛse 2:17; 3:1-6.

10. Sitanɛ ye kuma jumɛnw fɔ ni kegunya ye hadamadenw ko la?

¹⁰ Sitanɛ Sendonbaga y’a fɔ fana ni kegunya ye ko mɔgɔ mɛnnenw tun na to Jehowa kanminɛli la dɔrɔn n’a y’a sɔrɔ u ka nafa bɛ o la. Kuma wɛrɛw la, sɔsɔli tun donna hadamaden ka dafalenya la. Sitanɛ ka kiribɔ tun ye ko hadamaden si nɔrɔlen tɛna to Ala la ni kɔnɔnajɛya ye, a yɛrɛ diyanye la. O kɔnɔnajuguya kiribɔ min kɛra Sitanɛ fɛ, o jɛyalen bɛ Bibulu maana dɔ kɔnɔ, n’o bɛ Job kun kan, Jehowa ka maganna kantigi dɔ. San 1600 nan ɲɔgɔnna na kristatile ɲɛ, a ye kɔrɔbɔliba dɔ kun. N’i bɛ Job ka kitabu tilayɔrɔba fɔlɔ ni filanan kalan, i bɛ se ka faamuyaba sɔrɔ hadamaden ka tɔɔro sababu ko la, ani mun na Ala y’a to o ka kɛ.

11. Job tun ye mɔgɔ sugu jumɛn ye, nka, Sitanɛ ye kiri jumɛn bɔ a la?

¹¹ Job, ‘mɔgɔ tilennen ni dafalen’ nana kɛ Sitanɛ ka mɔgɔ kɛlɛta ye. Sitanɛ fɔlɔla ka ŋaniya juguw da Job la a kɛtɔ ka ɲininkali lawuli ko: “Job bɛ siran Ala ɲɛ gansan wa?” O kɔ, ni kegunya ye, Sendonbaga ye Ala ni Job fila bɛɛ tɔgɔ tiɲɛ, a kɛtɔ k’a fɔ u ma ko Jehowa bɛ Job ka kantigiya san, bawo a b’a lakana ani ka duba a ye. Sendonbaga ye Jehowa laɲini ten: “Sisan [“walisa k’a yɛlɛma”, NW ] i bolo mɔɔnɔbɔ ka maga a bolo fɛnw bɛɛ la, a na i danga i yɛrɛ ɲɛ kɔrɔ.”—Job 1:8-11.

12. a) Ni Ala ye Sitanɛ labila dɔrɔn a ka Job kɔrɔbɔ, ɲininkali jumɛnw tun na se ka jaabi sɔrɔ? b) Mun bɔra Job ka kɔrɔbɔli la?

¹² Yali Job tun bɛ Jehowa bato k’a da fɛn dumanw dɔrɔn kan, a bɛ o fɛn minnu sɔrɔ ka bɔ Ala yɔrɔ wa? Yali Job ka dafalenya jɔlen tun na to kɔrɔbɔli kɔrɔ wa? Min ye Jehowa ka dannaya ye ka ɲɛsin a ka maganna ma, yali o tun na labɔli kɛ walisa Jehowa ka sɔn Job ka kɔrɔbɔ wa? O ɲininkali ninnu tun bɛna se ka jaabi ni Jehowa tun ye Sitanɛ labila ka kɔrɔbɔli bɛɛ la juguman lase Job ma. Job taamacogo ni kantigiya ye o kɔrɔbɔli labilalen kɔnɔ Ala fɛ, o ɲɛfɔlen don Job ka kitabu kɔnɔ. A ye Jehowa ka tilennenya ani hadamaden ka kantigiya lajɛya cogo sɔsɔbali la—Job 42:1, 2, 12.

13. Fɛn minnu kɛra Edɛn kɔnɔ ani Job la, u b’an kun kan cogo jumɛn na?

¹³ O bɛɛ n’a ta, fɛn min kɛra Edɛn nakɔ kɔnɔ ani fɛn min ye Job sɔrɔ, o kɔrɔ ka dun kosɛbɛ. Ɲininkali minnu lawulila Sitanɛ fɛ, u bɛ hadamadenw bɛɛ kun kan, bi bi in na, an yɛrɛ sen bɛ u la. Ala tɔgɔ tiɲɛna ani a ka masabaya sɔsɔra. Hadamaden min ye Ala ka danfɛn ye, siga donna o ka laadiriya la. O ɲininkali ninnu tun ka kan ka jaabi.

ƝININKALIW JAABI COGO

14. Ni mɔgɔ dɔ laɲinina ni kɔnɔnajuguya ye, a dɔ rɔ o tigi bɛna mun kɛ?

¹⁴ Walisa k’a jira ni misali ye, an k’a fɔ k’i ye bangebaga kanubaganci dɔ ye min denw ka ca, denbaya hɛrɛma dɔ kɔnɔ. A ka kɛ k’i sigiɲɔgɔn dɔ la kelen ye nkalon duruntu a kɛtɔ ka kiribɔ i la k’i ye bangebaga jugu de ye. N’o sigiɲɔgɔn y’a fɔ k’i denw t’i kanu, k’u bɛ to i fɛ dɔrɔn bawo u tɛ fɛn wɛrɛw dɔn min ka fisa, ani k’u tun na i bila ni mɔgɔ dɔ ye sira di u ma ka bɔ so kɔnɔ. I bɛ se ka fɔ ko: ‘Dabalibanko!’ Ɔwɔ, nka, cogo jumɛn na i bɛna se k’o jira? Bangebaga dɔw bɛ se ka dimi k’a kɛ kɛlɛ ye. O kɛcogo farinman sugu bɛ se ka na ni gɛlɛya wɛrɛw ye ani ka nkalon sinsi. Nin koɲɛ sugu ɲɛnabɔ cogo ɲuman ye ka cogo di i kiribɔla ma a k’a jira n’a ka kuma ye tiɲɛ ye, ani ka cogo di i denw fana ma u k’a seereya ko tiɲɛ na, u b’i kanu.

15. Jehowa y’a sugandi ka mun kɛ ka ɲɛsin Sitanɛ ka laɲini kumaw ma?

¹⁵ Jehowa bɛ iko bangebaga kanubaganci. Hadama ni Hawa bɛ se ka sanga denw ma, ani Sitanɛ bɛ sigiɲɔgɔn nkalontigɛla jɔyɔrɔ fa ka ɲɛ. Ni hakilitigiya ye, Ala ma Sitanɛ ni Hadama ni Hawa halaki o yɔrɔnin kelen na, nka, a y’a to o kojugukɛla ninnu ka taa’ fɛ ka balo waati dɔ kɔnɔ. O waati tun bɛn’a to an bangebaga fɔlɔw ka bɔnna sɔrɔ ani ka hadamadenw ka denbaya bange. O waati ye cogo di Sendonbaga fana ma a k’a jira n’a ka kiribɔ tun ye tiɲɛ ye walisa o ɲininkali ninnu tun ka se ka jaabi. O bɛɛ n’a ta, kabini a daminɛ na, Ala tun b’a dɔn ko hadamaden dɔw tun na kantigiya mara ale fan fɛ, ani o cogo la, k’a sɛmɛntiya ko Sitanɛ ye nkalontigɛla ye. Ikomi Jehowa taara’ fɛ ka duba ni dɛmɛ lase a kanubagaw ma, an b’a waleɲumandɔn o la dɛ!—2 Tilew Kibaru 16:9; Ntalenw 15:3.

MUN DE JƐYARA?

16. Diɲɛ nana kɛ Sitanɛ ka se kɔrɔ cogo jumɛn na?

¹⁶ Hadamadenw ka tariku fanba kɔnɔna na, Sitanɛ bolo tun labilala walisa k’a ka fɛɛrɛw dilan hadamadenw marali kama. O fɛnw cɛma, a ye se boli politiki fangaw kan, ani ni fɛɛrɛba ye, a ye diinɛw sankɔrɔta minnu ye bato sin ale ma sanni k’o sin Jehowa ma. O cogo la, Sendonbaga kɛra “nin diɲɛ ka bato fɛn [“ala”, NW ] ye”, ani o cogo de la fana, a welela “nin diɲɛ kuntigi”. (2 Kɔrɛntekaw 4:4; Yuhana 12:31.) Tiɲɛ na, “diɲɛ bɛɛ bɛ o juguman bolo”. (1 Yuhana 5:19.) Nka, yali o kɔrɔ ye ko Sitanɛ y’a ka kiribɔ dalilu jira wa, dalilu min ye k’ale, Sitanɛ, bɛ se ka hadamaden bɛɛ yɔrɔ janya Jehowa Ala la? Ayi dɛ! Waati min labilala Sitanɛ ye ka to ɲɛnamaya la, o kɔnɔna na Jehowa y’a yɛrɛ kuntilenna latimɛ. O la sa, Bibulu bɛ mun jira juguya labilali ko la Ala fɛ?

17. Juguya ni tɔɔrɔ sababu ko la, an hakili ka kan ka to mun na?

¹⁷ Jehowa tɛ juguya ni tɔɔrɔ sababu ye. Ikomi Sitanɛ ye nin diɲɛ in kuntigi ye, ani nin kow sigicogo in ka ala ye, hadamadenw jama bɛ balola cogoya minnu kɔnɔ, ani ɲani ni tɔɔrɔ minnu b’u kan bi bi in na, ale n’a nɔfɛmɔgɔw de y’o sababu ye. Mɔgɔ si tɛ se k’a fɔ a jo fɛ ko Ala de ye nin gɛlɛya sugu ninnu sababu ye.—Romɛkaw 9:14.

18. A kɛlen ka juguya ni tɔɔrɔ labila, Jehowa ye mun jɛya yɛrɛmahɔrɔnya ko la, n’o ye ka fara ka bɔ Ala la?

¹⁸ Jehowa kɛtɔ ka juguya ni tɔɔrɔ labila, A y’a jɛya ko yɛrɛmahɔrɔnya min ye ka fara ka bɔ Ala la, k’o ma na ni di ɲɛ fisaman ye. Sɔsɔli t’a la, tariku taamasyɛn kɛra bɔnɛmakow ye minnu tugu-tugura ɲɔgɔn kɔ. O kun ye ko hadamadenw y’a sugandi ka tugu yɛrɛmahɔrɔnya sira kan, ani tiɲɛ yɛrɛ la, u ma Ala ka kuma n’a sago jate. Tuma min na Jehowa ka jamakulu kɔrɔ n’a kuntigi kanntanw tun tugura “foroba sira” la, ani ka ban Ala ka kuma ma, o kɔmanaw kɛra bɔnɛw ye. A ka kira Jeremi sababu fɛ, Ala y’a fɔ u ye ko: “Maloya ye hakilitigiw sɔrɔ, u jatigɛra, u minɛna. A filɛ, u banna Jehowa ka kuma ma, mun hakili sifa bɛ u fɛ?” (Jeremi 8:5, 6, NW, 9). U dɛsɛlen ka Jehowa ka namuw sirataama, hadamadenw fanba kɛra iko jikankurun lemuntan min bɛ linbilanba kɔgɔji lamagalen kan.

19. Darula min b’a jira ko Sitanɛ tɛ se ka hadamadenw bɛɛ kɔdon Ala la, o ye jumɛn ye?

¹⁹ Juguya ni tɔɔrɔ labilali Ala fɛ, o y’a jɛya fana ko Sitanɛ ma se ka hadamadenw bɛɛ kunnati ɲ ɛ Jehowa ma. Tariku b’a jira ko mɔgɔ dɔw sɔrɔla tuma bɛɛ minnu tora kantigiya la ni Ala ye hali kɔnɔnasuliw ni ɲankataw kɔnɔ. San kɛmɛw kɛmɛw sen fɛ, Jehowa y’a ka se jira ka ɲɛsin a ka magannaw ma, ani a tɔgɔ fɔra dugukolo yɔrɔ bɛɛ la (Ekisode 9:16; 1 Samuɛl 12:22). Bataki min cira Heburuw ma, a tilayɔrɔba 11 nan bɛ kuma mɔgɔ kantigiw kan. Abɛl, Henɔk, Nuhun, Ibrahima ani Musa sen b’o mɔgɔw la. Heburuw tilayɔrɔba 12 a tilayɔrɔdennin fɔlɔ b’u wele “seere jamaba”. Olu tun kɛra limaniya yigiyɔgɔbali misaliw ye Jehowa fan fɛ. An tile la fana, mɔgɔ caman y’u ka ɲɛnamaya di Ala ma dafalenya jɔnjɔn kɔnɔ. U ka limaniya n’u ka kanuya fɛ, o mɔgɔ sugu ninnu y’a jɛya cogo la min tɛ se k’a sɔsɔ, ko Sitanɛ tɛ se ka hadamadenw bɛɛ su Ala kama.

20. A kɛtɔ ka juguya ni tɔɔrɔ labila, Jehowa ye mun jɛya Ale ni hadamadenw ko la?

²⁰ A laban na, Jehowa kɛtɔ ka juguya ni tɔɔrɔ labila ka taa’ fɛ, a y’a jɛya ko se ni dalilu bɛ Dabaga Jehowa kelenpe de bolo, ka faamaya kɛ hadamadenw kunna, u ka duba n’u ka hɛrɛ banbali kama. San kɛmɛw kɛmɛw kɔnɔna na, hadamadenw ye gɔfɛrɛnaman sugu caman sifilɛ. Nka, mun sɔrɔla o la? Kunko gɛlɛnbaw ni faratiwaati minnu bɛ jamanaw da la bi bi in na, olu b’a jɛya tiɲɛ na, ko “fanga bɛ mɔgɔ dɔ fɛ dɔ wɛrɛ kun na ka bɔnɛ lase a ma”, iko Bibulu b’a fɔ cogo min na (Waajulikɛla 8:9). Jehowa kelenpe de bɛ se k’an magɛn, ani k’a kuntilenna fɔlɔ timɛ. A bɛna o kɛ cogo di, ani waati jumɛn na?

21. Mun bɛna kɛ Sitanɛ na, ani jɔni sugandira k’o kɛ?

²¹ Tuma min na Hadama ni Hawa binna Sitanɛ ka jan na, kɔfɛ, o yɔrɔnin bɛɛ, Ala y’A kuntilenna kofɔ ka ɲɛsin kisili sababu ma. Jehowa ye nin de fɔ Sitanɛ ko la ko: “Ne na juguya bila i ni muso cɛ, ka a bila i bɔnsɔn ni ale bɔnsɔn cɛ. Muso bɔnsɔn na i kunkolo ɲɔɲɔ, i na a kin a sen tontoli la.” (Jenɛse 3:15). O kuma fɔlen tun b’a sɛmɛntiya ko Sendonbaga tɛna labila k’a ka wale juguw kɛ fo abada. Iko Masiya ka Masaya Masakɛ, Si layidu talen, Yesu Krista bɛna ‘Sitanɛ kunkolo ɲɔɲɔ’. Ɔwɔ, Yesu bɛna Sitanɛ banbaganci cɔngɔ “sɔɔni”!—Romɛkaw 16:20.

I BƐNA MUN KƐ?

22. a) I ka kan ka ɲininkaliw jumɛn jaabi? b) Mɔgɔ minnu bɛ kantigiya mara Ala fan fɛ, u bɛ se ka da mun na hali ni Sitanɛ b’a ka dimi bɔn u kan?

²² Ikomi i bɛ ɲininkali lawulilenw dɔn, i bɛna kɛ jɔni fan fɛ? Yali i bɛn’a jira n’i ka walew ye k’i ye Jehowa lafasabaga tilennen dɔ ye wa? Kabini Sitanɛ y’a dɔn k’a ka waati ka surun, a bɛna a seko bɛɛ kɛ walisa k’a ka dimi bɔn mɔgɔw kan, mɔgɔ minnu b’a fɛ k’u ka dafalenya mara Ala fan fɛ (Jirali 12:12). Nka, i bɛ se k’i ɲɛsin Ala ma dɛmɛ kama bawo, “Matigi bɛ se ka Ala ɲɛsiranbagaw tila kɔrɔbɔli la.” (2 Piɛrɛ 2:9). A tɛn’a to i ka kɔrɔbɔ ka tɛmɛ i barika dan yɔrɔ kan. A bɛna bɔ yɔrɔ jira walisa i ka se ka lasuliw kun.—1 Kɔrɛntekaw 10:13.

23. An bɛ se ka mun makɔnɔ ni dannaya ye?

²³ Ni dannaya ye, an k’an ɲɛsin waati ma, waati min na Masakɛ Yesu Krista bɛna wuli Sitanɛ n’a nɔfɛmɔgɔw kama (Jirali 20:1-3). Mɔgɔ bɛɛ minnu sen bɛ hadamadenw ka bɔnɛw an’u ka kasaarakow la, Yesu bɛna u silatunun. Sanni o waati ka se, dusukasi kɛrɛnkɛrɛnnen sugu dɔ bɛ mɔgɔ tɔɔrɔ, o y’an diyanyemɔgɔ dɔw ka saya ye. Masalakun nata kalan walisa k’a dɔn u bɛ kɛ di.

I KA DƆNNIYA KƆRƆBƆ

An b’a dɔn ko Jehowa tɛ hadamadenw ka tɔɔrɔ sababu ye cogo jumɛn na?

Sitanɛ ye ɲininkali jumɛnw lawuli Edɛn kɔnɔ, ani u lajɛyara cogo di Job tile la?

Tɔɔrɔ labilali Ala fɛ, o ye mun jɛya?