Ka kow ye yecogo jugu la, i bɛ se ka o hakilina kɛlɛ

I ma se ka ɲɛ sɔrɔ i ka ko kɛta minnu na, i hakilina ye mun ye ka ɲɛsin o kow ma? Sisan, dɔnnibaaw caman b’a miiri ko i ka jaabi mana kɛ min ye ka ɲɛsin o ɲininkali ma, o bɛna a jira ni i ye mɔgɔ ye min bɛ kow ye yecogo ɲuman na walima yecogo jugu la. Gɛlɛyaw bɛ an bɛɛ kan an ka ɲɛnamaya kɔnɔ, hali ni dɔw ta ka jugu ni dɔw ta ye. Nka mun na mɔgɔ dɔw ka telin ka gɛlɛyaw kun ani ka taa ɲɛ ka sɔrɔ mɔgɔ wɛrɛw mana hali gɛlɛya fitiniw sɔrɔ, u bɛ dɛsɛ ka olu kun?

Misali la, e ka miiri ko i bɛ ka baara dɔ ɲini. I ni baarayɔrɔ dɔ mɔgɔw kumana nka u ma i ta. Yala o baara sɔrɔbaliya ye i tɔɔrɔ wa? Yala i b’a miiri ko mɔgɔ si tɛna sɔn ka i ta baara la ani ko i tɛna baara fosi sɔrɔ wa? Yala o baara sɔrɔbaliya b’a to i k’a miiri ko i tɛna ɲɛ sɔrɔ i ka ɲɛnamaya ko fosi la ani k’a miiri ko nafa fosi tɛ i la wa? A mana kɛ cogo o cogo, nin hakilina suguw de bɛ mɔgɔ bila ka kow ye yecogo jugu la.

I bɛ se ka kow yecogo jugu kɛlɛ cogo min na

I bɛ se ka kow yecogo jugu kɛlɛ cogo di? A fɔlɔ ye, k’a ɲini k’a dɔn hakilina minnu man ɲi. A filanan ye k’a ɲini ka o hakilinaw kɛlɛ. Kun minnu y’a to i ma se ka ɲɛ sɔrɔ ko dɔw la, a ɲini ka hakilina ɲumanw sɔrɔ olu kan. Misali la, a bɛ se ka kɛ ko i b’a miiri ko u ma sɔn ka i ta baara la bawo i ko man di mɔgɔ si ye, nka yala o hakilina ye tiɲɛ ye wa? A bɛ se ka kɛ dɔrɔn ko o baarayɔrɔ mɔgɔw tun bɛ ka mɔgɔ wɛrɛ de ɲini min ni e ka sekow tɛ kelen ye.

I sinsin hakilina bɛnnen dɔw kan, walasa k’i ka hakilina juguw kɛlɛ, olu minnu damatɛmɛnen don. Yala o baara sɔrɔbaliya b’a jira ko i tɛ se fosi la wa? Yala ko wɛrɛw tɛ yen i ka ɲɛnamaya kɔnɔ, i n’a fɔ alako, denbaya kow walima teriya kow i ye ɲɛ sɔrɔ minnu na wa? To k’a bila i hakili la ko, mɔgɔ yɛrɛ bɛ se ka ko dɔw lajuguya ka se hakɛ dɔw ma k’a sɔrɔ a ko ma juguya ka se o bɛɛ ma yɛrɛ. Mun de b’a jira i la ko i tɛna se ka baara fosi sɔrɔ? I bɛ se ka ko wɛrɛ minnu kɛ walasa ka hakilina juguw kɛlɛ, an ka olu dɔw lajɛ.

Hakilina ɲuman min bɛ an bila ka an sinsin kuntilennaw kan

Kɔsa in na, jigiya kɔrɔ ye min ye, ɲininikɛlaw ye ɲɛfɔli dɔ kɛ o kan, o ɲɛfɔli ɲɛna nka jigiya kɔrɔ ye min ye tiɲɛ na, u ma o bɛɛ labɔ ka ɲɛ. U y’a fɔ ko jigiya kɔrɔ ye, ka d’a la ko an b’a fɛ ka kuntilenna minnu dafa, ko an bɛna se ka olu dafa. Iko barokun nata bɛna a jira cogo min na, jigiya kɔrɔ tɛ dan o dɔrɔn ma nka ɲininikɛlaw ka nin ɲɛfɔli bɛ se ka an dɛmɛ sira caman fɛ. A bɛ se ka an dɛmɛ ka hakilina ɲuman sɔrɔ min bɛ an bila ka an sinsin kuntilennaw kan.

Walasa ka d’a la ko an bɛ se ka an ka kuntilennaw dafa, an ka kan ka a ɲini ka tugu kuntilennaw kɔ ani ka an seko bɛɛ kɛ ka u dafa. Ni i ma deli ka se ka i ka kuntilennaw dafa fɔlɔ, a ka fisa i ka i hakili jagabɔ kosɛbɛ kuntilennaw kan i bɛ k’a ɲini ka minnu dafa. Nka yala tiɲɛna kuntilenna bɛ i la fɔlɔ wa? A ka nɔgɔn kosɛbɛ ka an yɛrɛ to kow taabolo bolo ten an ka ɲɛnamaya kɔnɔ k’a sɔrɔ an b’a fɛ ka min kɛ tiɲɛ yɛrɛ la ani min nafa ka bon an bolo kosɛbɛ, an ma an sigi ka miiri olu la. Ka to ka an hakilijagabɔ kow kan minnu nafa ka kan ka bonya kosɛbɛ an ka ɲɛnamaya kɔnɔ, an b’a ye ko Bibulu tun kumana o ko kan k’a jira ko ‘an ka kan ka ko ɲumanw walima kow bɛɛ la nafamanw faranfasiya.’—Filipekaw 1:10.

Ko minnu nafa ka bon i bolo kosɛbɛ, ni i ye olu dɔn, a bɛna nɔgɔya i bolo ka kuntilenna nafamaw sugandi sira caman fɛ i n’a fɔ alako ta fan fɛ, denbaya ta fan fɛ walima dahirimɛ sɔrɔli baara ta fan fɛ. Nka a nafa ka bon a daminɛ na i kana tugu kuntilenna caman kɔ ɲɔgɔn fɛ ani i ka tugu kuntilennaw kɔ minnu dafa ka di bawo ni i tugura kuntilennaw kɔ minnu dafa ka gɛlɛn, o b’a to a laban na i fari bɛ faga ani ka a ko bila. O de la, ni i tugura kuntilenna dɔ kɔ min dafali bɛ waati caman ta, i ka kan ka fɛn minnu kɛ walasa ka a dafa, i bɛ se ka dɔɔnin dɔɔnin kɛ o fɛnw bɛɛ la, fo ka taa o kuntilenna dafa.

Nsana kɔrɔ dɔ b’a fɔ ko: “Ni ko min kɛli ka di mɔgɔ ye, a tigi bɛ cogoya sɔrɔ ka o kɛ,” wa tiɲɛ dɔɔnin bɛ o kuma na. Ni i ye kuntilenna nafamaw sugandi, a ko kɛli diyanye ka kan ka kɛ i la ani i ka kan ka cɛsiribaw kɛ walasa ka u dafa. Nafa min bɛ i ka kuntilennaw dafali la ani i bɛna nisɔndiya min sɔrɔ n’i ye u dafa, ni y’i hakili to olu la, i bɛna fanga sɔrɔ ka o cɛsiriw kɛ. Tiɲɛ don ko i bɛ se ka gɛlɛyaw sɔrɔ nka i kana a to o k’i fari faga, a ɲini ka o gɛlɛyaw ye i n’a fɔ ko dɔw i bɛ se ka minnu kunnasagon ani ka taa ɲɛ.

Nka i ka kan fana ka i hakili jagabɔ cogoya kɛrɛkɛrɛnnenw na minnu bɛ se ka i dɛmɛ ka i ka kuntilennaw dafa. Professeur C. R. Snyder, o min ye kalanw kɛ jigiya nafa kan o y’a fɔ ko an mana tugu kuntilenna minnu kɔ, an k’a lajɛ ka miiri fɛɛrɛ caman na minnu bɛ se ka an dɛmɛ ka u dafa. O la, ni fɛɛrɛ dɔ ma se ka an dɛmɛ, an bɛ se ka fɛɛrɛ wɛrɛw lajɛ.

Professeur C. R. Snyder y’a fɔ fana ko ni an y’a ye ko kuntilenna dɔ tɛna se ka dafa, an ka kan k’a ɲini ka a falen ni kuntilenna wɛrɛ ye. Ni an y’a ye tiɲɛ yɛrɛ la ko an ka kuntilenna dɔ tɛna se ka dafa, an fari bɛ faga ni an y’a bila an hakili la ko an dɛsɛra. Nka ni an ye o kuntilenna falen ni kuntilenna wɛrɛ ye an bɛ se ka min dafa, o bɛna an dɛmɛ ka fɛn dɔ sɔrɔ an jigi bɛ min kan.

Bibulu bɛ misali ɲuman dɔ jira an na o ko la. Kuntilenna dɔ tun bɛ Masakɛ Dawuda la min tun ka di a ye kosɛbɛ, o tun ye ka so jɔ a ka Ala Jehova ye. Nka Ala y’a fɔ Dawuda ye ko a denkɛ Solomani de sugandira walasa ka o baara kɛ. Sani a ka dimin walima k’a ɲini ka o so jɔ fanga la, a tugura kuntilenna wɛrɛw kɔ. A den mago tun bɛna kɛ wari ni baarakɛminɛn minnu na walasa ka o so in jɔ, a ye ko bɛɛ kɛ walasa ka olu bɛɛ fara ɲɔgɔn kan.—1 Masakɛw 8:17-19; 1 Tilew kibaru 29:3-7.

Hali ni i ka ko caman na, i sera ka kow yecogo jugu kɛlɛ ani ka hakilina ɲumanw sɔrɔ minnu sinsinnen bɛ kuntilennaw dafali kan, a bɛ se ka kɛ ko halisa i jigi ka telin ka misɛnya fɛn dɔw la. Mun na? Bawo fɛn minnu na an jigi bɛ misɛnya nin diɲɛ in kɔnɔ, olu caman bɛ bɔ fɛnw na an tɛ se ka minnu yɛlɛma. An bɛ se ka to ni hakilina ɲumanw ye cogo di hali ni gɛlɛyabaw bɛ diɲɛ kɔnɔ i n’a fɔ kɛlɛw, tilenbaliyakow, banaw ani saya?

[Ja]

Ni i ma ta baara dɔ la min tun sɔrɔli ka di i ye, yala i bɛna a miiri ko i tɛna baara fosi sɔrɔ wa?

[Ja]

Kuntilenna minnu tun bɛ Masakɛ Dawuda la, a sɔnna ka yɛlɛma don olu la