Gha Zẹ Ẹghẹ Kọ Ne U Ya Gha Ruẹ Emwi Vbekpa Osanobua

Agbọn gha maan ruẹ deghẹ u na gha zẹ ẹghẹ kọ ya ruẹ emwi vbekpa Osanobua. U ghi do kakabọ rẹn Osanobua, u ghi vbe sikẹ ọre. Ghee emwi ne Jesu tae vbekpa ẹmwẹ na.

Emwi ne Jesu tae

“Oghọghọ nọ ne iran ni rẹnrẹn wẹẹ, te ọ khẹke ne iran rẹn Osanobua.”​—Matiu 5:3.

• Usun avbe inọta ni kpokpo ima vbe orhiọn ọre: Vbe ima do ru vbe agbọn na? Vbọzẹ ne emwa na rri oya? Vbọ sunu daa ima vbe ima gha wu nẹ? Ewanniẹn ọghe avbe inọta na gha sẹtin ya ima gha mwẹ oghọghọ nọ sẹ otọ ẹko.

“Ebrẹd ọkpa i khian sẹtin ya ọmwa gha rrọọ, sokpan, ẹmwẹ hia nọ ke unu e Jehovaa ladian, ẹre ọ khian ya ọmwa gha rrọọ.”​—Matiu 4:4.

• Zẹvbe ne ima rri evbare ne ima mieke na gha rre agbọn, erriọ ẹre ọ vbe khẹke ne ima gha ru emwi ni gha ya ima sikẹ Osanobua. Jesu tae wẹẹ Osanobua ọkpa ẹre ọ khian sẹtin kpemehe avbe emwi ni gha ya ima sikẹ ọre.

“Ẹmwata ẹre ẹmwẹ ruẹ khin.”​—Jọn 17:17.

• E Jesu gi ima rẹn wẹẹ, e Baibol ọre odẹ ọkpa ne Osanobua ya ru iyobọ ne ima ya rẹn sayọ.

Ma rhie igiọdu nuẹn ne u gha zẹ ẹghẹ kọ, ne u ya gha tie ẹmwẹ Osanobua ne u mieke na sikẹ ọre, ọna gha ya ruẹ gha mwẹ oghọghọ nọ sẹ otọ ẹko. Ghee emwi eso ni gha sẹtin ru iyobọ nuẹn:

• Tie Baibol vbe ọghe ọhẹ.

• Ghee vbene iruẹmwi e Baibol ye hẹ.