“Wa Gha Họn Vbe Emwa Ghaa Khọn Okuo”

John Simpson nọ re BBC world affairs editor khare wẹẹ: “Odẹ ukpo 60 ẹre ọ he ye na ne I ke winna vbe ugha iyẹn zẹvbe ọgbẹn ebe (journalist), vbe uwu ẹghẹ na, ọ gberra okuo 40 ne I re gbẹn vbekpa re. Aro mwẹ sẹ vbene okuo ne United State kevbe Soviet Union khọn rẹn ya gha yọn kevbe ẹghẹ nọ ya da obọ yi. Sokpan, I ma he miẹn vbe emwi wegbe sẹ vbenian ẹdẹ vbe nọ ye vbe ukpo 2025—okuo ughughan wa sunu vbe ukpo na kevbe wẹẹ, ọkpa vbe okuo na sẹtin si ọlọghọmwa ye ehe ughughan vbe agbọn na.”

Osi wa si emwa ni bun rhunmwuda okuo ughughan ni sunu vbe uhunmwu otagbọn hia. Ọna keghi ya emwa ni bun nọ wẹẹ, okuo gha sẹtin sẹ ufomwẹ ra? De emwi ne Jesu tae?

Emwi ne Jesu tae

Jesu ka ta avbe emwi ni sunu vbe ẹdẹnẹrẹ ye otọ nẹ. Jesu tama avbe erhuanegbe ẹre wẹẹ: “Wa gha họn vbe emwa ghaa khọn okuo, wa gha vbe họn iyẹn ọghe okuo ne emwa khọn vbe ihe ọvbehe.”—Matiu 24:6.

Agharhemiẹn wẹẹ, okuo kevbe igbinnoguo wa si obalọ ni bun vbe ẹdẹnẹrẹ, ma ye yaro yọ wẹẹ, emwi hia gha maan vbe odaro. Vbọzẹ? Rhunmwuda, Jesu tae wẹẹ, okuo, emwi dan ni sunu kevbe uyinmwẹ ne emwa yin keghi re usun “ama” na khian ya rẹn “ẹghẹ ufomwẹ agbọn.” (Matiu 24:3; Luk 21:7) Ọna rhie ma wẹẹ, ẹghẹ de ne Jesu khian ya dobọ okuo yi. Vbe ọ khian ya ru ọna hẹ?

Emwi ne Jesu khian ru

Vbe nẹi khian ghi kpee gbe, Jesu gha loo ẹtin nọ mwẹ zẹvbe Ọba ọghe Arriọba Osanobua, ya “dobọ okuo yi vbe uhunmwu otagbọn hia.”—Psalm 46:9.

U ghaa hoo ne u rẹn sayọ vbekpa vbene ọfunmwegbe khian ya do gha rre agbọn na hẹ kevbe vbene emwi khian gha ye hẹ vbe ẹghẹ nii, ya tie uhunmwuta nọ khare wẹẹ: “How War and Violent Conflict Will End.”