Ọfunmwegbe A Gha Rre Agbọn Na

A i miẹn ọmwa nẹi gualọ ọfunmwegbe vbe agbọn na. Ọni ẹre ọ si ẹre ne arriọba emwa nagbọn na hia ne iran sẹ ọfurre ye avbe ẹvbo ne okhọn ye, ne ẹkun mieke na sẹ emwa ni rre evba otọ; ẹ i re eban ẹre iran ke ru ọna. Ugbẹnso, ẹrhiọn ne iran loo na wa zẹdia biẹ ọmọ esi. Evbọ da ọmwa nọ wẹẹ, vbene ẹghẹ ya khian, okuo ghi dọlegbe suẹn vbe avbe ẹvbo na. Sokpan, ma rẹnrẹn wẹẹ ọfunmwegbe ra gha rre agbọn na. Vbe ima gu kha vberriọ? Rhunmwuda emwi ne Jesu khian ru kevbe emwi nọ ma emwa re vbe ọ rre agbọn na.

Emwi Ne Jesu Khian Ru

E Baibol tae vbene Jesu khian ya rhie ọfunmwegbe gha die agbọn na.

• ‘Eni na khian gha tie [Jesu] re ọre . . . Okoro Ọfunmwegbe. Te ẹtin arriọba ẹre khian gha muan yọ, ọfunmwegbe ghi vbe gha rrọọ vbe ẹghẹ hia.’ (Aizaia 9:6, 7) Jesu nọ re Ọba ọghe Arriọba Osanobua, ẹre ọ khian rri ọfunmwegbe etẹbitẹ gha die agbọn na.

• “Irẹn gha miẹn avbe ivbiogue ni kpee tiẹre fan, deba iran nẹi mwẹ kevbe na he.” (Psalm 72:12-14) Jesu gha ru ẹre ne emwa hia gha ya obọ esi mu egbe, ọ gha wabọ usẹ, ọ gha vbe dobọ okuo kevbe igbinna oguo yi.

• Agbẹnvbo i khian ghi gha gu agbẹnvbo khọn okuo, a ma i wẹẹ te iran khian ruẹ vbene a ya khọn okuo hẹ. (Aizaia 2:4) Jesu gha suẹn gha kha yan agbọn na nẹ, emwa hia ghi gha rrọọ vbe ọfunmwegbe, iran i khian ghi gha gu egbe khọn.

Deghẹ u hoo ne u rẹn vbene Jesu khian ya ru ẹre ne ọfunmwegbe gha rre agbọn na kevbe afiangbe ne u khian miẹn vbọ, ghee vidio na, De Emwi Ne Arriọba Osanobua Khin?

Emwi Ne Jesu Ma Emwa Re

Emwi ne Jesu tae wa ye ru iyobọ ne emwa ni bun vbe ẹdẹnẹrẹ ya gha re emwa ọfunmwegbe. Vbe Jesu kporhu vbe uhunmwu oke, ọ keghi guan kaẹn ilele eso ni gha sẹtin ya ima gha re emwa ọfunmwegbe. Gi ima ziro yan eso.

• “Oghọghọ nọ ne iran ni gualọ ọfunmwegbe.” (Matiu 5:9) Jesu keghi tama erhuanegbe ẹre, ne iran ghẹ gu ọmwa rhọkpa gui ẹzọ, sokpan ẹ i re ọni ọkpa, ọ vbe tama iran ne gha re emwa ọfunmwegbe.

• “Ka ya gu ọtuẹn ru adọlọ nẹ, iyeke ọni, u ghi gha dee do ru izọhẹ ruẹ.” (Matiu 5:23, 24) Jesu keghi tama emwa nọ gha kporhu ma ne iran gha rherhe ru adọlọ. Jesu vbe ma ima re wẹẹ, deghẹ ima hoo ne ima gha re ọsie Osanobua te ọ khẹke ne ima gha re emwa ọfunmwegbe.

• “Wa ghẹ ghi bu ohiẹn ẹrrẹe, na ghẹ vbe bu ohiẹn uwa.” (Matiu 7:1) Jesu wẹẹ ne ima ghẹ gha bu ohiẹn emwa ọvbehe kevbe ne ima ghẹ vbe ya aro yọ wẹẹ, emwa ọvbehe gha sẹtin ru emwi ne ima tobọ iran i sẹtin ru; uyinmwẹ vbenian keghi si ẹzọ. Sokpan, Jesu wẹẹ ne ima “gha yabọ” emwa, ne ima gha te ya gha rhie aro tua abakuru ọghe iran.​—Luk 6:37.

Emwa ni bun wa ya imamwaemwi Jesu ru emwi vbe ẹdẹnẹrẹ. Iran keghi rhie ahoẹmwọmwa ma, iran vbe yabọ, iran i vbe ya izohu ya zẹ uze ye ẹmwẹ, uhiẹn vbe avbe ẹvbo ne ima emwa na gbinna igbinna igbinna.

U ghaa hoo ne u rẹn vbekpa emwa eso ne imamwaemwi ọghe Jesu he ru iyobọ na ya gha re emwa ọfunmwegbe, ya tie uhumwuta nọ khare wẹẹ, “Finding Peace Despite War and Violent Conflict.”