Ye Rhikhan Mu E Jehova Vbe U Ghaa Rre Owebe Nọ Yo

1-2. (a) Adeghẹ u hoo ne u yo owebe nọ yo, de emwi nọ khẹke ne u ye gha ru? (b) Vbe a yae kha vbe a gha wẹẹ na “rhie owẹ lele ukpowẹ ne ima la dee sin”? (Filipai 3:16)

AVBE OSẸE JEHOVA eso gha ladian nẹ vbe owebe ne ukpogieva iran ghi la owebe nọ yo. Iran sẹtin gha roro ẹre wẹẹ iran gha ladian nẹ vbe owebe na, iran gha miẹn iwinna ne iran khian ya gha gbaroghe egbe iran zẹvbe ne iran ya ga e Jehova. Adeghẹ u na zẹ ne egbuẹ wẹẹ, u hoo ne u yo owebe nọ yo, vbua khian ru ne u mieke na ye rhikhan mu e Jehova? (Jems 4:8a) Ẹmwata nọ wẹẹ, u la edanmwẹ ni bun gberra vbe u rre owebe ne ukpogieva. Sokpan u gha la owebe nọ yo nẹ, te ọ khẹke ne u “ye rhie owẹ lele ukpowẹ ne [u] la dee sin”​—ọni nọ wẹẹ, te ọ khẹke ne u ye gha ya ekhọe hia ga e Jehova vbene u ka ru ẹre dee yi.​—Tie Filipai 3:16.

² A mobọ loo ẹmwẹ e Grik na zedu ẹre ghee “rhie owẹ lele ukpowẹ ne ima la dee sin” ya gie ivbiyokuo ni gbe igiawẹ khian. Adeghẹ u hoo ne u yo owebe nọ yo, te ọ khẹke ne u ye gha “gbe igiawẹ khian” vbe ugamwẹ e Jehova, ọni nọ wẹẹ, ọ ma khẹke ne u gie emwi rhọkpa si ruẹ digiẹn vbe ugamwẹ e Jehova. Vbe ako iruẹmwi na, ma gha zẹ iro yan ilele enẹ ni rre Baibol nọ gha ru iyobọ nuẹn. Avbe ilele na i re emwi ne u ma ka rẹn. U ka gha ya avbe ilele na ru emwi, te ọ vbe khẹke ne u ye gha yae ru emwi vbe u gha la owebe nọ yo nẹ kevbe vbe u gha ladian vbe owebe nẹ.

YE GHA RU EMWI NỌ YA RUẸ SIKẸ E JEHOVA

3. De ọlọghọmwa eso ne u gha sẹtin werriẹ aro daa vbe u ghaa yo owebe nọ yo?

³ Ọlọghọmwa nọ rrọọ. Te ọ khẹke ne u rẹn wẹẹ, u ghaa rre owebe nọ yo, u i khian miẹn ẹghẹ ya gha ru emwi ni bun ne u te ka ru. Rhunmwuda ne u na hoo ne ọkpa gbe ifuẹn nuẹn vbe owebe, u i ghi mu ugamwẹ e Jehova karo. U sẹtin kue do gha gbe ẹdẹ iko re, a sẹtin vbe miẹn wẹẹ, u i ghi yo ikporhu vbene ọ ka ye, u i ghi tie Baibol ne egbuẹ, u i ghi vbe na erhunmwu.​—Arhie 2:4.

4. Vbọ khian ru iyobọ nuẹn ya gha “mwẹ iwinna nibun” ne u ru vbe ugamwẹ e Jehova? (1 Kọrint 15:58)

⁴ Tie 1 Kọrint 15:58. Adeghẹ a ma na hin ikẹkẹ na gha fi ẹre khian, ẹ i sẹtin kpa hin eke nọ ye rre, erriọ ẹre ọ vbe ye, u i khian sẹtin gha mwẹ alaghodaro vbe ugamwẹ e Jehova adeghẹ u i “mwẹ iwinna nibun,” ne u ru vbe ugamwẹ ọnrẹn. Uhunmwu ẹmwẹ na hoo na rhie ladian mwa ọre wẹẹ, ugamwẹ e Jehova ẹre ọ khẹke ne u mu karo, ẹ i re ne u wa gha rhiegbe ladian vbe ẹghẹ eso kẹkan. Yerre wẹẹ, ugamwẹ ne u rhie ne Jehova ọre emwi nọ ru ekpataki sẹ vbe ẹdagbọn ruẹ, ẹ i re owebe ne u yo. (Mat 22:37) Ọtẹn nokhuo ọkpa na tie ẹre Samantha khare wẹẹ, “I tama egbe mwẹ wẹẹ, adeghẹ owebe ne I yo khian mu idobo ye ugamwẹ ne I rhie ne Jehova, I i ghi yo owebe nii.”

5. Vbọ khian ru iyobọ nuẹn ya rhiegba ye ugamwẹ e Jehova?

⁵ Emwi eso ne u gha sẹtin ru u ke la owebe nọ yo. Hia na miẹn wẹẹ e Jehova ẹre u mu ye okaro vbe ẹdagbọn ruẹ. Nọ egbuẹ wẹẹ, ‘De emwamwa ne I he ru ne I mieke na sẹtin gha yo iko kevbe ikporhu vbe ẹghẹ hia kevbe ne I vbe sẹtin gha tie Baibol ne egbe mwẹ?’ (Jọs 1:8; Mat 28:​19, 20; Hib 10:25) U sẹtin vbe nọ egbuẹ wẹẹ: De emwi ne u ru nọ ru iyobọ nuẹn ya mu ugamwẹ e Jehova karo vbe u rre owebe ne ukpogieva? Adeghẹ u na bẹghe ẹre wẹẹ, te ọ khẹke ne u ru afiwerriẹ eso, vbọ khẹke ne u ru nian ne u mieke na ye gha mwẹ alaghodaro sayọ? Hia ne u rhiegba ye ugamwẹ e Jehova zẹvbe ne u ya yo owebe nọ yo. Mu aro ye owebe ne u yo, sokpan ghẹ gi ẹre mu idobo ye ugamwẹ ne u rhie ne Jehova.a​—Mat 6:24.

6. De inọta eso nọ khẹke ne u nọ egbuẹ re ne u mieke na rẹn deghẹ u ye mu e Jehova karo vbe ẹdagbọn ruẹ? (Vbe ya ghee efoto.)

⁶ U gha la owebe nọ yo nẹ, te ọ khẹke ne u gha ghee vbene u he mwẹ alaghodaro sẹ hẹ vbe ẹghẹ hia. U ghi nọ egbuẹ wẹẹ, ‘I ye mu ugamwẹ e Jehova karo vbene ọ ka ye ra?’ Vbe igiemwi, u yo iko vbe ẹghẹ hia ra, u vbe rherhe sẹ evba ra, iwinna esuku ẹre u ghi mu roro vbe u ghaa rre iko ra, ra e video conference ọkpa ẹre u ghi ya yo iko. U sẹtin vbe nọ egbuẹ wẹẹ, ‘I ye na erhunmwu gie Jehova kevbe wẹẹ, I vbe tie Baibol vbene I ka ru ẹre dee yi ra, ekhọe hia ẹre I vbe ya kporhu ra te I wa hoo na zẹgiẹ zobọ ne I gha rrie owa?’ Deghẹ a na miẹn wẹẹ, u ru emwi eso na sunu yi mwa, zẹ emwi ru vbobọvbobọ. Ghẹ gi owebe ne u yo mu idobo ye ugamwẹ ne u rhie ne Jehova.

GHẸ GI EMWI RHỌKPA FI IZIRO ỌGHUẸ WERRIẸ

7. De emwi nọ gha sẹtin sunu daa iziro ruẹ vbe u gha la owebe nọ yo?

⁷ Ọlọghọmwa nọ rrọọ. Emwi ne u ya ruẹ vbe owebe sẹtin ya ruẹ gha mwẹ “ẹwaẹn ọghe agbọn na kevbe iziro nọ ma khianrẹn ne emwa ya rẹrẹ ọmwa,” iran sẹtin ma ruẹ re wẹẹ, Osanobua i rrọọ kevbe wẹẹ, te emwi hia didaghori rre. (Kọl 2:8) Emwi ne u ruẹ re vbe esuku sẹtin vbe ya ruẹ do gha mu ẹtin yan egbuẹ ne u gha te ya mu ẹtin yan e Jehova. Ọtẹn nokpia ọkpa khare wẹẹ: “Ẹ i wa re iwinna obọ ọkpa ẹre a ma ima re vbe owebe, iran vbe ma ima vbene ọ khẹke ne ima ya gha roro emwi hẹ, sokpan, emwi ne iran ma ima re lughaẹn ne vbene Jehova hoo ne ima ya gha roro emwi. Vbe igiemwi, iran ma ima re wẹẹ, ẹtin obọ ima ẹre ima khian ya sẹtin musọe vbe ẹdagbọn ima. Ọna keghi ya mwẹ do gha roro ẹre wẹẹ, I i gualọ iyobọ e Jehova vbe agbọn mwẹ.”

8. Vbọzẹ nọ na khẹke ne ima “gbogba ga iziro ọghe ima”? (Itan 5:​1, 2)

⁸ Tie Itan 5:​1, 2. E Baibol wẹẹ ne ima “gbogba ga iziro ọghe ima.” Te a gbogba ga emwi ne ọmwa ọvbehe ghẹ mieke na do ẹre rhie ra nẹ ghẹ muẹn rhia. Erriọ ẹre ọ vbe khẹke ne ima gbogba ga iziro ọghe ima. (1 Pit 5:8) Iziro ne emwa ni rre agbọn na mwẹ vbekpa vbene ọ khẹke na ya gha yin hẹ, vbekpa vbene arrọọ ya suẹn hẹ, kevbe deghẹ Osanobua gele rrọọ sẹtin do ya ruẹ gha roro ẹre wẹẹ emwi ne u ruẹ re vbe Baibol ma gba. Iran sẹtin ya ruẹ do gha roro ẹre wẹẹ iziro ne iran mwẹ na ẹre ọ sẹre. Sokpan, ẹmwata nọ rrọọ wẹẹ, “emwi ukọnmwẹ nọ vbe odaro Osanobua.”​—1 Kọr 3:​18-20.

9. Vbua khian ya gbogba ga iziro ọghuẹ hẹ?

⁹ Emwi eso ne u gha sẹtin ru u ke la owebe nọ yo. Vbene u te la owebe nọ yo, hia na miẹn wẹẹ u mwẹ iyayi nọ wegbe. Nọ egbuẹ wẹẹ: ‘Vbọzẹ ne I na ya Osa yi? Vbia ya rẹn hẹ wẹẹ, Ẹmwẹ Osanobua ẹre Baibol khin? Vbọ ya mwẹ yayi wẹẹ, odẹ ne Baibol wẹẹ ne ima ya gha yin ẹre ọ maan sẹ emwi ne agbọn Esu na ma emwa re?’ U sẹtin vbe nọ egbuẹ wẹẹ: Iziro nọ ma gba ne emwa ghaa mwẹ vbe I rre owebe ne ukpogieva ya mwẹ gha roro ẹre wẹẹ te emwi hia gele didaghori rre ra? Emwi dan ne emwa ne ima gba rre esuku ghaa ru ghaa yẹẹ mwẹ ra? Adeghẹ u na bẹghe ẹre wẹẹ te ọ khẹke ne u ru afiwerriẹ eso, vbọ khẹke ne u ru nian ne u mieke na gele yayi wẹẹ, emwi nọ gha ya agbọn maan ruẹ ẹre ọ rre uwu e Baibol? Ye gha gbogba ga iziro ọghuẹ zẹvbe ne u ya yo owebe nọ yo.​—2 Tim 2:​16-18.b

10. Vbua khian ru ne u mieke na ye gha gbogba ga iziro ọghuẹ?

¹⁰ U gha la owebe nọ yo nẹ, te ọ khẹke ne u ye gha ghee vbene u he mwẹ alaghodaro sẹ hẹ. U ghi nọ egbuẹ wẹẹ: ‘Emwi dan ne emwa ni rre ẹdogbo mwẹ ru yẹẹ mwẹ ra? I rẹn alughaẹn nọ rre uwu ẹkpo ẹwaẹn ọghe agbọn na kevbe nọ ke obọ Osanobua rre ra? Mẹ gele yayi wẹẹ, Arriọba Osanobua ọkpa ẹre ọ khian sẹtin sọfurre ye ọlọghọmwa ọghe emwa nagbọn ra?’ Ne u mieke na gbogba ga iziro ọghuẹ, gha tie Baibol vbe ẹghẹ hia, u ghi vbe gha rhie emwi ne u ruẹ vbọ ye uyinmwẹ. U ghaa ru vberriọ, u ghi gha mwẹ ilẹkẹtin wẹẹ, ẹmwata ẹre emwi hia ne Baibol tae khin.​—1 Tim 4:15.

GHA LOO ẸGHẸ RUẸ ẸSE

11. De ọlọghọmwa ne u khian miẹn adeghẹ u ma na loo ẹghẹ ruẹ ẹse vbe u ghaa rre owebe nọ yo?

¹¹ Ọlọghọmwa nọ rrọọ. Ẹ i re ovbi ẹghẹ kherhe ẹre a loo ya ruẹ emwi vbe owebe nọ yo, katekate adeghẹ a na miẹn wẹẹ u mu egbe edanmwẹ ra u ru iwinna na mu nuẹn vbe esuku. Adeghẹ u ma na loo ẹghẹ ruẹ ẹse, egbe ghi do gha wọọ ruẹ vbe ẹghẹ hia. Rhunmwuda ọni, te ọ khẹke ne u zẹ ẹghẹ kọ ya gha hẹwẹ, ne u vbe gha rọkhọ egbuẹ.

12. De emwi eso nọ khẹke ne u ru nọ gha rhie ẹre ma wẹẹ u ‘loo ẹghẹ ruẹ ẹse’? (Ẹfisọs 5:​15, 16)

¹² Tie Ẹfisọs 5:​15, 16. Ugbẹnso, ọ sẹtin gha lọghọ ne u ‘loo ẹghẹ ruẹ ẹse,’ rhunmwuda ne u na mwẹ emwi ni bun ne u ru vbe obọ. Vbe igiemwi, ẹmwata nọ wẹẹ, te ọ khẹke ne u mu aro ye emwi ne u ruẹ vbe owebe, sokpan emwi nọ ru ekpataki sẹ ọre ne u gha mwẹ ẹghẹ ne ẹgbẹe ruẹ kevbe etẹn ne uwa gba ga. (Psm 133:1; Itan 18:1) Nọ ghi wa sẹ ehia ọre ne u gha ru emwi nọ gha ya ruẹ sikẹ e Jehova. (Mat 6:33) A sẹtin vbe miẹn wẹẹ, ọ mwẹ iwinna ne u ru ya gaga egbe, kevbe iwinna owa ne u vbe ru. Deba ọni, te ọ khẹke ne u gha rọkhọ erhuan, u ghi vbe gha ku iku isasegbe ne egbe ruẹ mieke na situa ẹse. (Asan 4:6; 1 Tim 4:8) Adeghẹ u na gha loo ẹghẹ ruẹ ẹse ẹre u khian na sẹtin ru avbe emwi na.

13. Vbọ khian ru iyobọ nuẹn ne u mieke na gha loo ẹghẹ ruẹ ẹse?

¹³ Emwi eso ne u gha sẹtin ru u ke la owebe nọ yo. E Baibol khare wẹẹ, ọmwa gha mwamwa emwi ẹse, emwamwa rẹn ghi dinnodẹ. (Itan 21:5) Rhunmwuda ọni, te ọ khẹke ne u mwamwa ẹghẹ ruẹ ẹse u ke la owebe nọ yo. Nọ egbuẹ wẹẹ: De vbene I ya gha loo ẹghẹ mwẹ hẹ vbe I rre owebe ne ukpogieva? Adeghẹ u na bẹghe ẹre wẹẹ te ọ khẹke ne u ru afiwerriẹ eso, vbọ khẹke ne u ru nian ne u mieke na ye gha mwẹ alaghodaro sayọ? Wẹ ẹre ọ yan ẹghẹ ruẹ, te ọ khẹke ne u rẹn vbene u khian ya gha loo ẹre hẹ, ẹ i re ẹghẹ ruẹ ẹre ọ khẹke nọ gha loo ruẹ.c

14. De ọta eso nọ gha ru iyobọ nuẹn ya rẹn vbene u he mwẹ alaghodaro sẹ hẹ?

¹⁴ U gha la owebe nọ yo nẹ, te ọ khẹke ne u gha ghee vbene u he mwẹ alaghodaro sẹ hẹ. U ghi nọ egbuẹ wẹẹ: ‘Emwamwa ne I ru kie ẹkpotọ mẹ ya gha rọkhọ erhuan ra, ọ vbe kie ẹkpotọ mẹ ya gha ku iku isasegbe ra? I miẹn ẹghẹ ya ya egbe rhorho etẹn ne ima gba ga ra? I ru iwinna na mu mẹ vbe esuku ye ẹghẹ ra? Adeghẹ I i ru ẹre ye ẹghẹ, vbọzẹ ne I i na rherhe ru ẹre? Rhunmwuda ne I na mwẹ emwi ni bun ne I ru vbe obọ nọ ra, ra rhunmwuda ne I na la ẹdẹ ye emwi nọ? Ẹgbẹe mwẹ kevbe avbe ọse mwẹ vbe ghee ẹre wẹẹ, ọ khẹke ne I ru afiwerriẹ eso ra?’ Adeghẹ u na miẹn wẹẹ, ọ khẹke ne u ru afiwerriẹ eso ye emwamwa ne u ru, ra uwẹ tobọ ruẹ ẹre ọ khẹke nọ fi werriẹ, te ọ khẹke ne u zẹ emwi ru vbobọvbobọ. U sẹtin vbe wẹẹ ne ọmwa nọ gua loo ẹghẹ ọre ẹse ru iyobọ nuẹn.​—Itan 11:14.

“GHA GU ỌMWA NỌ MWẸ ẸWAẸN MU OBỌ”

15. De ọlọghọmwa nọ gha sẹtin de rre vbe u gha la owebe nọ yo?

¹⁵ Ọlọghọmwa nọ rrọọ. U gha la owebe nọ yo nẹ, emwa ne uwa gba rre owebe sẹtin gha hoo ne iran rhie ruẹ ba usun. U sẹtin wa gha hoo ne u deba iran. Rhunmwuda, uwa ẹre ọ gba ru emwi kugbe vbe eklasi vbe ẹghẹ hia, a sẹtin vbe miẹn wẹẹ, ihegbe ẹre uwa vbe khin. U sẹtin kue gha roro ẹre wẹẹ avbe ọse ruẹ vbe owebe ẹre ọ sikẹ ruẹ sẹ avbe ọse ruẹ ne uwa gba ga e Jehova. Sokpan, ọ khẹke ne u gha begbe. Agharhemiẹn wẹẹ, efọnkpa ẹre uwa na ruẹ emwi vbe owebe, ẹ i re emwi ọkpa ẹre uwa yayi. Zẹvbe ne u ya sikẹ iran, u sẹtin do gha mwẹ egbe iziro ne iran mwẹ. (1 Kọr 15:33) Ọna ọre emwi nọ sunu daa ọtẹn nokpia ọkpa na tie ẹre Michael, nọ ya ukpo enẹ ruẹ electrician. Ọ khare wẹẹ, “Ọ gberra ughaẹdẹ 40 vbe uzọla ne I ya gha gu emwa ne ima gba ruẹ iwinna mu obọ, iran i ya aro nọ khẹke ghee ikhuo, ihuan nọ ma khianrẹn ẹre iran kpee, ẹmwẹ nọ kẹkẹ ẹre ọ vbe ke iran unu ladian. Vbene I te rẹn, I na do gha roro ẹre wẹẹ, emwi ne iran ru ma de emwi nọ rhiae.”

16. Vbe a yae kha vbe a gha wẹẹ na “gha gu ọmwa nọ mwẹ ẹwaẹn mu obọ”? (Itan 13:20)

¹⁶ Tie Itan 13:20. E Baibol gi ima rẹn ẹbe nọ rrọọ vbe a ghaa lele ọse dan khian. Sokpan ọ khare wẹẹ, u ghaa “gu ọmwa nọ mwẹ ẹwaẹn mu obọ, wẹ gha vbe do gha mwẹ ẹwaẹn.” Uhunmwu ẹmwẹ nọ rrọọ ọre wẹẹ: Emwa ne u gu mu obọ sẹtin fi uyinmwẹ ruẹ werriẹ, iran sẹtin ya ruẹ gha mwẹ uyinmwẹ esi ra uyinmwẹ dan. Nọnaghiyerriọ, emwa ni gele hoẹmwẹ ruẹ ẹre ọ khẹke ne u gu ru ọse, ọni ọre emwa ni ya ekhọe hia ga e Jehova, vbene uwẹ vbe ye.​—Psm 101:​6, 7; 119:63.

17. De emwi nọ khian ru iyobọ nuẹn ya gban egbe ne avbe ọse dan?

¹⁷ Emwi eso ne u gha sẹtin ru u ke la owebe nọ yo. Ọ khẹke ne u tae ye otọ inu ẹghẹ ne u khian ya gha gu emwa ni rre esuku mu obọ. Ọtẹn nokpia ọkpa na tie ẹre Trenton khare wẹẹ: “I wa ya obọ esi mu emwa ne ima gba rre eklasi, sokpan ma gha zobọ vbe esuku nẹ, dọmwadẹ ọghẹe ghi khian ọghẹe. Emwa ne ima gba rre owebe ọkpa ẹre iran khin, ma i re ọse ne kankankan.” Vbọ khẹke ne u ru na ghẹ do miẹn wẹẹ, ọsie obọ ma miẹn uhunmwu a i vbiẹ ẹre uwẹ vbe emwa ne uwa gba rre eklasi ghi khin? U sẹtin nọ egbuẹ wẹẹ: De emwi ne I ru vbe I rre owebe ne ukpogieva nọ ru iyobọ mẹ ya gban egbe ne emwa ni ma hoẹmwẹ e Jehova? Adeghẹ u na bẹghe ẹre wẹẹ te ọ khẹke ne u ru afiwerriẹ eso, vbọ khẹke ne u ru nian ne u mieke na ye gha mwẹ alaghodaro sayọ? Hia vbe odẹ ke odẹ ne u gha gu emwa ni “mwẹ ẹwaẹn mu obọ,” u ghi vbe gban egbe ne emwa ni ma hoẹmwẹ e Jehova.d

18. De ọta eso nọ khẹke ne u nọ egbuẹ? (Vbe ya ghee efoto.)

¹⁸ Ke ẹghẹ ya fi ẹghẹ, te ọ khẹke ne u gha ghee vbene u he mwẹ alaghodaro sẹ hẹ. U ghi nọ egbuẹ wẹẹ: ‘Te I ghi kakabọ sikẹ emwa ne ima gba rre eklasi ra? Vbene iran ya ru emwi ẹre imẹ ghi vbe ya ru emwi ra, vbene iran ya guan ẹre imẹ ghi vbe ya guan ra, egbe iziro ne iran mwẹ ẹre imẹ ghi vbe mwẹ ra? Ẹko gha rhiẹnrhiẹn e Jehova ra, vbe ọ gha bẹghe vbene I ya gu emwa ne ima gba rre eklasi mu obọ ra?’ (Psm 1:1) Adeghẹ u na miẹn wẹẹ, ọ khẹke ne u ru afiwerriẹ eso, te ọ khẹke ne u zẹ emwi ru vbobọvbobọ. Gia miẹn wẹẹ, emwa ni hoẹmwẹ e Jehova ọre ọse nọ sikẹ ruẹ sẹ. Vbe hia ne u gha kporhu ma emwa ne uwa gba rre eklasi. U gha sẹtin ru iyobọ ne iran ya rẹn ẹmwata nọ rre Baibol, iran sẹtin rhie ehọ nuẹn ta yi rhunmwuda ne uwa na rre eklasi ọkpa.

MU EGBE YE OTỌ

19. Vbọ khian ru iyobọ nuẹn ya mu ugamwẹ e Jehova karo vbe u ghaa rre owebe nọ yo? Rhan otọ re.

¹⁹ Te ọ khẹke ne ọmwa nọ mu okhian rrie ehe kakabọ mu egbe ẹse ọ ke kpa hin owa rre. Agharhemiẹn wẹẹ, ọ ma rẹn emwi nọ gha sunu vbe odẹ, ọ ghi ya emwi eso gbakhua, ọ ghi vbe rẹn eke nọ rrie. Erriọ ẹre ọ vbe ye, te ọ vbe khẹke ne ọmwa nọ khian yo owebe nọ yo mu egbe ye otọ. Ọ ghi gha mwẹ amuẹtinyan nọ wegbe, ọ ghi vbe “hẹ ọre ye egbe ighẹ emwi igbinna hia nọ ke obọ Osanobua rre.” Emwi nọ khẹke nọ vbe rhie aro tua ọre nọ gha rhie uyi gie Jehova vbe emwi hia nọ ru, ẹ i re nọ do fe ya obọ mu iso.​—Ẹfis 6:​11-13; 1 Kọr 9:​26, 27; 10:31.

20. Vbua khian ya “ye gha gualọ otọ egbe [ruẹ] ghee, ne [u] mieke na rẹn deghẹ [u] ye mwẹ amuẹtinyan”?

²⁰ E Baibol khare wẹẹ: “Wa ye gha gualọ otọ egbe uwa ghee, ne uwa mieke na rẹn deghẹ uwa ye mwẹ amuẹtinyan; wa ghi ye gha hia ne uwa rẹn aro ọmwa ne uwa gele khin.” (2 Kọr 13:5) U gha sẹtin ru ọna vbe u ghaa rre owebe nọ yo. Ke ẹghẹ ya fi ẹghẹ, gha nọ egbuẹ avbe ọta ne ima zẹ iro yan vbe ako iruẹmwi na. U ye rhiegba ye ugamwẹ e Jehova vbene ọ khẹke ra? U gbogba ga iziro ruẹ ne ẹwaẹn ọghẹ agbọn na ghẹ mieke na fi iziro ọghuẹ werriẹ ra? U loo ẹghẹ ruẹ ẹse ra? Emwa ni ga e Jehova ẹre u gu mu obọ ra, u vbe gban egbe ne avbe ọse dan ra? Ọta nọ khẹke ne ima hia nọ egbe ima ẹre na khin, ọ gha khọnrẹn wẹẹ, ima i rre owebe nọ yo. Vbene emwi rhirhi de hẹ, hia vbe odẹ ke odẹ ne u rhikhan mu e Jehova. Gha mwẹ ilẹkẹtin wẹẹ, e Jehova gha fiangbe ẹrhiọn ne u loo.​—Itan 3:​5, 6.