Te Jehova Wa Ma Mwẹ Emwi Ke Ẹghẹ Igbama Mwẹ Gha Dee

Gia he ka sẹ odọ rae nẹ, ne I tama uwa vbene emwi hia ya suẹn hẹ. E Calgary vbe Canada ẹre a na biẹ mwẹ vbe ẹghẹ na ya gha khọn Okuo Ọgbagbọn II. Vbe odẹ ukpo 1950, ọvbokhan okpia ọkpa na tie ẹre Donald Fraser, nọ re arọndẹ ọghe ẹghẹ hia keghi do kporhu vbe owa ima, iye mwẹ na ghi kue yọ na gha gu irẹn ruẹ e Baibol. Te odẹ ẹmwata na wa gha yẹẹ ọre, sokpan emianmwẹ nọ wegbe nọ ghaa khuọnmwi ma gi ẹre gha yo iko vbe ẹghẹ hia. Ọrheyerriọ, ọ na ye gha mwẹ alaghodaro vbe odẹ ọghe orhiọn, vbọ ghi rre ukpo 1950, ọ na dinmwiamẹ. Ọ keghi re emwi nọ da ọmwa wẹẹ, iye mwẹ keghi wu vbọ ghi rre ukpo eva vba. Erha mwẹ ma gha re Osẹe Jehova vbe ẹghẹ nii, sokpan ọ kue yọ ne Avbe Osẹe Jehova do ru irorinmwi ọghe iye mwẹ.

Vbọ ghi rre ikpẹdẹ eso vba, ọtẹn nokhuo ọkpa nọ khian enọwanrẹn nẹ na tie ẹre Alice, nọ re ọtẹn na hannọ zẹ keghi tie mwẹ gha die iko. Emwi nọ ya ọtẹn nokhuo na rẹn mwẹ ọre wẹẹ, I ghaa lele iye mwẹ yo iko na do vbe ufomwẹ uzọla vbe ẹghẹ nọ rhirhi ya sẹtin yo. Ẹre I na ghi nọ erha mwẹ deghẹ I gha sẹtin yo. Ọ keghi kue yọ, ọ na vbe wẹẹ, irẹn gha lele mwẹ “uhukpa kẹkan” ne irẹn mieke na ya kpọnmwẹ ọtẹn nokpia nọ ya ọta guan vbe irorinmwi ọghe iye mwẹ. Iko ọghe Owebe Ukhamwosa kevbe Iko Ọghe Ugamwẹ ẹre ima do vbe akota nii. Erha mwẹ wa gele sọyẹnmwẹ iko ọghe ẹdẹrriọ. Ọ ka ruẹ vbene a ya guan hẹ vbe idagbo rhunmwuda ọni, vbene etẹn ya ya ọta guan vbe iko vbe ẹdẹrriọ keghi wa kakabọ yẹẹ ọre. Ẹre erha mwẹ na ghi kha wẹẹ, ke ẹdẹrriọ kpa te irẹn khian wa gha yo iko na do vbe uwu uzọla. Kherhe kherhe, ọ na suẹn gha yo iko nikẹre.

Vbe ẹghẹ nii, ọtẹn nọ siẹnro iko ọghe Owebe Ukhamwosa ghi tie eni etẹn ni ya ọta guan vbe owebe na, dọmwadẹ ọghẹe ghi kha wẹẹ, “I rre emwa.” Vbe asọn ọkpa, I na we na rhie eni mwẹ ba ẹre, na mieke na vbe so eni mwẹ vbe iko nọ lelẹe. Nene ọtẹn na wa tian mwẹ, sokpan, ọ ma tama mwẹ iwinna nọ lelẹe khian.

I ma te rẹn wẹẹ, emwi ne I ru na rhie ẹre ma wẹẹ, te a khian gha rhie ọta mẹ, te I te we na wa so eni mwẹ kẹkan! Uzọla nọ ghi lelẹe, a na tie eni mwẹ, ẹre I na ghi kha wẹẹ, “I rre emwa,” ọna wa ya ẹko rhiẹnrhiẹn mwẹ. A ghi zobọ vbe iko vbe ẹdẹrriọ, etẹn na wa gha tian mwẹ. Uzọla eso ghi gberra nẹ, a na rhie ọta mẹ, ọta na ẹre I guan kaẹn vbe omuhẹn ban.

Te udu mwẹ te kpan fi ẹko! Rhunmwuda vbe ẹghẹ nii, odẹ ifuanro ehan ya sẹ erẹnrẹn ẹre etẹn ya ya ọta guan vbe abọ ọghe owebe. Vbe ẹghẹ nii, a ma gha miẹn abọ ọghe Baibol na tie. Erha mwẹ keghi ru iyobọ mẹ ya mu egbe nene ọta ye otọ, ọ na vbe we ne I ruẹ ọre igba 20 vbene ọ te sẹ ẹghẹ ne I khian ya ya nene ọta guan. I ghi ya ọta nii guan fo nẹ, ọtẹn nọ siẹnro iko ọghe Owebe Ukhamwosa keghi rhie adia nọ khẹke mẹ. Ke ukpo ni bun gha dee nian, e Jehova wa loo erha mwẹ, etẹn nikpia kevbe etẹn nikhuo ni bun ni wẹro kẹ kevbe otu ọghẹe ya ma mwẹ emwi.

E JEHOVA YE MA MWẸ EMWI

Ọtẹn Nokhuo Alice ne I ka guan kaẹn sin ẹre ọ ma mwẹ vbene a ya kporhu hẹ vbe I da suẹn gha kporhu. Vbe ẹghẹ nii, ako ebe nọhuanrẹn eha ẹre ima ghaa tie ma ọ yan owa, iyeke ọni ma ghi rhie ebe nẹẹn. Ọ gha sẹ ẹghẹ ne I khian ya kporhu, Alice ghi ka mu ẹmwẹ so, ọ ghi we ne I tie ako ebe nọhuanrẹn nokaro ne ima khian tie. Iyeke ọni, I ghi gu nene ọmwa guan, I ghi tie ako ebe nọhuanrẹn eva nikẹre, I ghi vbe rhie ebe ne nene ọmwa. Vbene ẹghẹ ya khian, mẹ ẹre ọ ghi tobọ mwẹ gha mu ẹmwẹ so. Erha mwẹ ghi dinmwiamẹ nẹ vbe ufomwẹ ukpo 1954, irẹn ẹre ọ ghi gha ma mwẹ vbene a ya kporhu hẹ. Agharhemiẹn wẹẹ, irẹn ọkpa ẹre ọ ghi gha koko mwẹ, ọ na ye hia nọ koko mwẹ vbe odẹ ẹmwata na. Ọ ma zẹdẹ gha ya ẹmwẹ iko kevbe ikporhu ku hiehie. I wa rẹn wẹẹ, ọ gha sẹ ẹdẹ iko, ẹ i mwẹ ma ma yo, ọ gha vbe sẹ ẹghẹ ikporhu ma wa vbe rre evba.

Agharhemiẹn wẹẹ, ẹ i re imẹ ẹre ọ rẹn ebe sẹ vbe esuku; emwi ne I ruẹ re vbe ọwara ukpo 12 ne I gbe vbe esuku wa ru iyobọ mẹ vbe ẹdagbọn mwẹ. Vbe igiemwi, I wa ruẹ emwi ni bun vbe maths kevbe English. Emwi ne I ruẹ re vbe English kevbe ne I ruẹ re vbe eklasi na na ma ima vbene a ya gbẹn ọkha hẹ wa ye ru iyobọ mẹ vbe iwinna ne I ghi ru nian zẹvbe ọkpa vbe agbaziro ọghe Writing Department.

Emwa mobọ nọ mwẹ evbọzẹe ne ihuan na yẹẹ mwẹ. Te ihuan wa vbe gha yẹẹ erha mwẹ vbe iye mwẹ. Vbe I ghi rre ukpo ihinrọn, I na suẹn gha ruẹ vbene a ya kpee piano hẹ, sokpan, ọmamwaemwi mwẹ ma yayi wẹẹ I gha sẹtin ruẹ ọre rhunmwuda, I ma mu aro yọ. Ọ na ghi tama erha mwẹ wẹẹ, ọ gha maan sẹ adeghẹ I na dobọ yi. I rẹn evbọzẹe nọ na kha vberriọ, rhunmwuda vbe ẹghẹ nii, ẹ i re iwinna e piano ẹre ọ zẹdẹ mu mwẹ.

Uki eso ghi gberra nẹ, erha mwẹ na gualọ ọmamwaemwi ọvbehe mẹ. Nian, ẹ i re vbene a ya kpee piano ọkpa ẹre I ghi gha ruẹ, I na vbe gha ruẹ vbene a ya so ihuan hẹ, vbe ẹghẹ na nian, te I wa gele gha hia vbọ. Urhu ne ebo tie ẹre soprano ẹre I mwẹ, te urhu mwẹ wa gha rhiẹnrhiẹn, rhunmwuda ọni, I wa mobọ gha mu okaro vbe I gha yo eke na na so ihuan. Emwi ne I wa gha gualọ ọre ne I gha mwẹ certificate ọghe vbene a ya so ihuan hẹ ne I mieke na sẹtin gha ma emwa ọvbehe re, I ghi vbe yae gha gaga egbe zẹvbe ne I ya ru iwinna arọndẹ ọghe ẹghẹ hia. Sokpan, zẹvbe ne ẹghẹ ya khian, I na do bẹghe ẹre wẹẹ, ẹghẹ hia ẹre I khian ghi ya gha tie avbe ebe ni guan kaẹn vbene a ya so ihuan hẹ, I ghi vbe gha mu egbe edanmwẹ ni bun vbe esuku ọghe vbene a ya so ihuan hẹ ne I ye, ẹ i re ovbi ẹghẹ kherhe ẹre ọna khian rhie mwẹ re. Ẹre I na ghi dobọ esuku nii yi, I na rhie obọ ye iwinna arọndẹ ọghe ẹghẹ hia. Ukpo 1963 ẹre ọna sunu.

IWINNA ARỌNDẸ KEGHI YA ỌMWA SỌYẸNMWẸ

Vbọ ghi rre ukpo ọkpa vbe I suẹn iwinna arọndẹ, a keghi gie mwẹ gha rrie Kapuskasing nọ rre Ontario zẹvbe arọndẹ ne kpataki. Ọ mwẹ ọtẹn nokpia ọkpa ne ima koko gba gha ru iwinna arọndẹ kugbe na tie ẹre Daniel Skinner, ọtẹn na diẹn mwẹ ẹ i re nekherhe. Ọ keghi ma mwẹ iwinna ughughan na ru vbe iko. Ukpo 20 ẹre I ghaa ye vbe I suẹn gha ga zẹvbe ọkpa vbe Agbaziro Ọghe Iko, rhunmwuda ọni, emwi ni bun wa gha rrọọ nọ khẹke ne I ruẹ. I ghọghọ wẹẹ, otu e Jehova dọlegbe suẹn gha nianiaẹn vbene ọ ru ekpataki sẹ hẹ na gha ma etẹn nikpia ni re igbama emwi. Adeghẹ iran na rhiegba ye iwinna, e Jehova gha wa loo iran, ọ gha khọnrẹn ne iran ye gha re igbama!

Emwi ma gha khuẹrhẹ vberriọ vbe Kapuskasing. Oni oguozizi ẹre ọ wa gha fi vbe ẹghẹ ne isonorhọ ya dele. Vbe deba ọni, owẹ ẹre imẹ vbe Daniel mobọ ya gha khian yo ehe ke ehe ne ima rrie. Sokpan, ọkpa vbe usun afiangbe ne I he lae miẹn rhunmwuda ne I na rhiegbe ye iwinna na ọre ne I na miẹn ọtẹn nokhuo ọkpa na tie ẹre Linda Cole, irẹn ẹre ọ ghi re Ọtẹn Nọkhuo Splane nian.

Arọndẹ nọ rhiegba ye iwinna ikporhu, nọ vbe gha mwẹ emwa ni bun nọ gu ruẹ e Baibol ẹre Linda ghaa khin. Ọmwa ne obọ ẹse tọlọ, nọ mwẹ ekhọe esi, kevbe nọ wa vbe gbe egbe emwa ẹre nọ. Ọmwa nọ wa vbe rhiegba ye ugamwẹ e Jehova ẹre iyẹe ighẹ e Goldie ghaa khin. Sokpan, te erhae ighẹ Allen wa gha zẹ iran kpokpo rhunmwuda ne iran na rre odẹ ẹmwata. Ọrheyerriọ, te iye iran wa ye gha viọ Linda kevbe etiẹn ọnrẹn nikpia eva ighẹ e John kevbe Gordon yo iko, ọ na vbe ma iran vbene a ya kporhu hẹ. E Goldie, Linda, John, kevbe Gordon ka ru iwinna arọndẹ vbe ẹghẹ eso vbe ẹdagbọn iran. Ukpo eso ghi gberra nẹ, Erha iran keghi do miẹn odẹ ẹmwata na yi, ọ na vbe rhiegba ye iwinna vbe uwu iko.

Vbe ukpo 1965, a keghi tie mwẹ ne I gha die Kingdom Ministry School vbe abotu nọ rre Canada, uki ọkpa ẹre a khian ya ma ima emwi vbe owebe na. Vbe esuku nii, a na we ne I fill e fọm ọghe Owebe Giliẹd. Te I wa gha ghee egbe mwẹ wẹẹ, I ma gbegba nọ gha sẹtin ru iwinna arọndẹ na gie yo isi. Sokpan, I na ye fill e fọm nii. A na ghi tie mwẹ gha die eklasi nogie 42 ọghe Owebe Giliẹd. Ẹghẹ hia ẹre avbe ọmamwaemwi ọghe ima vbe owebe nii ya gha tama ima vbene ima he mwẹ alaghodaro sẹ hẹ. Emwi ne iran ka wa tama mwẹ ọre ne I hia ne I ruẹ emwi ni bun vbekpa otu e Jehova vbe uwu ẹghẹ ne I ya rre owebe na. Ukpo 21 kẹkan ẹre I ghaa ye vbe ẹghẹ nii, rhunmwuda ọni, ibude ne iran rhie mẹ na wa gele deyọ.

Ọkpa vbe usun emwi ne iran ma ima re vbe Owebe Giliẹd ọre vbene ọ khẹke ne ima ya gha gu emwa ni winna vbe ugha iyẹn loo: vbe na ghee emwa ni winna vbe ugha e redio, ẹkpẹti ughee, ra ni gbẹn ebe iyẹn. Ọna wa gha gbe mwẹ otiti. Emwi ne ima ruẹ re na wa gele ru iyobọ mẹ vbe odaro, I gha guan kaan rẹn vbọ gha zẹ kpẹẹ.

I NA GHA RRIE SENEGAL

Ma ghi ladian nẹ vbe owebe nii, a keghi gie imẹ vbe Michael Höhle gha rrie Senegal vbe Africa. Ọ ghi rre ikpẹdẹ eso vba, mẹ vbe ọtẹn na na la odẹ, ma na gha rrie eke ne otu gie ima gha rrie. Vbe ẹghẹ nii, etẹn ni ya iyẹn wewe vba kegha re 100.

Ọ ghi rre uki eso ne I ya gha ru iwinna arọndẹ na gie yo isi, a keghi tie mwẹ ne I do gha winna vbe abotu nọ rre ẹvbo na vbe ẹdẹ ọkpa vbe uwu uzọla. Ughugha ọkpa vbe owa ne avbe arọndẹ na gie yo isi dia ẹre ọ ghaa re “abotu” vbe ẹvbo nii. Ọtẹn nokpia ọkpa na tie ẹre Emmanuel Paterakis nọ ghaa siẹnro iwinna na ru vbe abotu na, keghi gu mwẹ rẹn wẹẹ, te ọ khẹke ne I kọe ye orhiọn wẹẹ, abotu na ẹre Jehova loo ya dia iwinna ọghẹe vbe ẹvbo nii agharhemiẹn wẹẹ ọ kherhe. Vbe ẹdẹ ọkpa, ọtẹn nokpia Paterakis keghi tama mwẹ we ne ima gbẹn elẹta ne ima ya rhie igiọdu ne etẹn hia ni re arọndẹ na gie yo isi. Vbe ẹghẹ nii, ọ ma gha khuẹrhẹ na do sẹtin photocopy emwi, rhunmwuda a i kẹ miẹn e masini na loo ya ru ẹre, erriọ ẹre ọ vbe ya ghaan, rhunmwuda ọni, e typewriter ẹre ima loo ro. Vbe uwu ena hia, te ima gha vbe hia ne abakuru ghẹ vbe gha rre emwi ne ima khian gbẹn, rhunmwuda ọni, iwinna na ma zẹdẹ gha khuẹrhẹ ne ima.

Vbe I ghi mu egbe ne I ya gha rrie owa vbe akota nii, Ọtẹn Nokpia Paterakis keghi rhie envelope ọkpa mẹ. Ọ na kha wẹẹ, “E David, otu gbẹn ebe gu ruẹ o.” I ghi kie nene envelope, ọkpa vbe uwu avbe elẹta ne ima gbẹn ẹre ọ ghaa rre uwu ẹre! Ọna keghi ma mwẹ re wẹẹ, ọ gha khọnrẹn ne abotu nọ rhirhi gha khin ye kherhe, te ọ ye khẹke ne I gha ya aro nọ ghaan ghee otu e Jehova.

Mẹ vbe etẹn ni bun ni rre iko na ghi do sikẹ egbe sayọ, owa iran ẹre I mobọ gha dia vbe ẹghẹ ota vbe ẹdẹ Satọde. Ẹghẹ nii rhiẹnrhiẹn gbe! Mẹ vbe avbe etẹn nii wa ye gu egbe guan do sẹ ẹdẹnẹrẹ. I ruẹ vbene a ya zẹ e French vbe Senegal rhunmwuda, ọni ẹre iran zẹ vba. Ne I na gua zẹ e French ru iyobọ mẹ nẹ vbe ihe eso ne I he mu otuẹ yo vbe uhunmwu otagbọn na.

Vbe ukpo 1968, mẹ vbe Linda na kue yọ we ima gha rọnmwẹ egbe. Uki eso ghi gberra nẹ, I keghi hia ne I gualọ iwinna ne I khian gha ru vbe Senegal. Aro iwinna ne I ghaa gualọ ọre nọ gha kie ẹkpotọ ne imẹ vbe Linda ya koko gha ru iwinna arọndẹ, sokpan emwa ni rre evba ma mobọ gha rhie eghọẹn vbe iwinna. Iyeke ọni, I keghi dọlegbe gha rrie Canada, ma ghi ru orọnmwẹ nẹ, a na we ne ima ya ga zẹvbe arọndẹ ne kpataki vbe Edmundston, vbe New Brunswick, nọ re ẹvbo nekherhe ọkpa nọ rre ọkpẹn Quebec.

MA KEGHI YA GA VBE NEW BRUNSWICK KEVBE QUEBEC

Osẹe Jehova rhọkpa ma zẹdẹ gha rre ẹvbo na, erriọ ẹre ọ vbe ya lọghọ a ke miẹn ọmwa na khian gu gha ruẹ e Baibol. Ugamwẹ e Catholic ẹre emwa ni rre ẹvbo na wa mu yan uhunmwu. Iyobọ emwa hia vbe ẹvbo nii ẹre ọ gbẹn ọnrẹn ye onurho ọghe iran wẹẹ, iran i gualọ Avbe Osẹe Jehova vbe owa iran. Vbe ẹghẹ nii, ma ma mobọ gha lele deghẹ emwa gbẹn emwi vberriọ ye onurho ọghe iran, rhunmwuda ọni, ma ghi ye ya kporhu vba. Uzọla uzọla ẹre esọsi e Catholic ya gha gbẹn ọnrẹn ye ebe iyẹn wẹẹ: “Wa gia ya gualọ Avbe Osẹe Jehova, azẹn ẹre iran khin.” Osẹe Jehova enẹ kẹkan ẹre ọ ghaa rre ẹvbo nii, ọni ọre, Victor kevbe Velda Norberg kevbe imẹ vbe Linda, rhunmwuda ọni, ma wa rẹn wẹẹ, ima ẹre iran ghaa tie ẹre “azẹn”!

I i khian sẹtin mianmian ẹghẹ okaro ne ọgbaroghe ọghe otako ya mu otuẹ gha die ẹvbo na. Vbe ọ ghi gbe uzọla ọkpa vbe ẹvbo na nẹ, ọ na kha wẹẹ, “Emwi nọ khẹke ne uwa rhie aro tua ọre ne uwa hia ne emwa ni rre ẹvbo na ghẹ ghi gha ya aro dan ghee Avbe Osẹe Jehova.” Ke ẹghẹ nii kpa, ọna ẹre ima ghi gha hia ne ima ru, ọ wa vbe gele biẹ ọmọ esi! Kherhe kherhe emwa na ghi do suẹn gha bẹghe ẹre wẹẹ, emwa ni mu egbe rrie otọ ẹre Avbe Osẹe Jehova khin, iran ma yevbe avbe ọkaolotu ugamwẹ e Catholic ni tọn egbe mu. Vbe na guan na, iko ọkpa nekherhe rre evba nẹ.

Vbe ima ghi gbe odẹ ukpo ọkpa vbe ẹvbo na nẹ, a keghi we ne ima ya ru iyobọ ne iko ọkpa nọ rre Quebec, etẹn wa gha bun vbe iko na. Etẹn ni rre evba gele wa gua gha mu ọghọ ye ọmwa egbe, uki ehan ẹre ima gbe vba, a ke we ne ima ya suẹn iwinna ọgbaroghe ọghe otako.

Vbe ukpo 14 nọ ghi lelẹe, iwinna ọgbaroghe ọghe otako ẹre ima ghaa ru vbe ehe ughughan vbe Quebec. Te ima wa gele sọyẹnmwẹ ọnrẹn! Te iwinna ikporhu wa gha biẹ ọmọ esi vbe Quebec. Vbe dọmwadẹ iko ne ima ghaa mu otuẹ yo, ma wa gha miẹn ẹgbẹe ughughan ne Avbe Osẹe Jehova gu ruẹ emwi, te iran wa gha rrie iko, iran vbe gha hia ne iran gbegba nọ gha dinmwiamẹ!

MA MA MIANMIAN ETẸN NI YA EKHỌE HIA WINNA VBE UGAMWẸ E JEHOVA

Etẹn ni rre ehe na na zẹ e French vbe Canada maan gbe. Ẹmwẹ iran i lọghọ, erriọ ẹre iran vbe ya gbe egbe ọmwa. Vbọrhirhighayehẹ, ọ ma gha khuẹrhẹ ne iran do miẹn odẹ ẹmwata na yi, ukpokpo ne eso miẹn vbe obọ ẹgbẹe ọghe iran i re nekherhe. Nọ ne etẹn eso ni re igbama, evbibiẹ iran keghi gbe uhi ne iran wẹẹ, “Owa na i gua ruẹ, adeghẹ u na ye gha lele Avbe Osẹe Jehova!” Sokpan te avbe etẹn na wa ye rhikhan mu e Jehova. E Jehova wa ya iran hio ẹ i re nekherhe!

I i khian sẹtin mianmian etẹn ni ghaa ga zẹvbe arọndẹ ọghe ẹghẹ hia kevbe arọndẹ ne kpataki vbe Quebec vbe ẹghẹ nii. Ehe ughughan vbe Canada ẹre ni bun vbe uwu iran ke rre. Iran keghi ruẹ vbene a ya zẹ e French nọ re urhuẹvbo ne emwa mobọ zẹ vbe Quebec, ọ ma vbe gha khuẹrhẹ ne iran ya ruẹ vbene a ya ru emwi hẹ vbe ẹvbo nii, rhunmwuda te emwa ni bun vbe ẹvbo nii wa mu ugamwẹ e Catholic yan uhunmwu.

Ehe ne etẹn i ye nọ kakabọ rree ne orere ẹvbo ẹre a mobọ gha gie avbe arọndẹ ne kpataki yo. Rhunmwuda ne iran na gha khẹko Avbe Osẹe Jehova vbe ẹvbo nii, te ọ wa gha lọghọ a ke miẹn owa ne etẹn gha dia, erriọ ẹre ọ vbe lọghọ a ke miẹn iwinna ọghe ovbi ẹghẹ kherhe. Uhiẹn etẹn ni da ru orọnmwẹ kegha deba etẹn ọvbehe mu owa ọkpa, ugbẹnso, iran sẹtin wa gha re orhunmwu enẹ, orhunmwu ehan ra orhunmwu erẹnrẹn ni koko mu owa ọkpa, rhunmwuda, iran i mwẹ igho ne iran khian ya mu owa ọghe obọ iran. Etẹn ni wegbe obọ ẹre iran na wa gha khin. Iran ghaa gu ọmwa ruẹ emwi, iran i zẹdẹ yae rhẹghẹrẹ. Ugbẹnvbe a miẹn wẹẹ, te etẹn ghi bun vbe Quebec, ni bun vbe avbe arọndẹ nii keghi kpa hin ẹvbo nii rre gha rrie eke na na gualọ iyobọ etẹn.

Ma gha mu otuẹ gie avbe iko ni rre otako ọghe ima, ma ghi hia ne ima gu avbe igbama ni ladian vbe ikporhu vbe ẹdẹ Satọde winna vbe owiẹ. Ọna ghi ru iyobọ ne ima ya rẹn ọlọghọmwa ne iran ye. Usun avbe igbama ne ima gu winna vbe ikporhu vbe ẹghẹ nii suẹn gha ga nẹ zẹvbe arọndẹ na gie yo isi vbe ẹvbo ọvbehe, eso vbe mwẹ iwinna ọvbehe ne iran ru vbe ugamwẹ e Jehova.

Vbe ẹghẹ nii, iko eso ma sẹtin gha rhie igho imọto kevbe igho evbare ne ima, rhunmwuda ọni, ugbẹnso uki ke gba igho ọghe ima fo nẹ. E Jehova ẹre ima wa gha mu ẹtin yan vbe egbe emwi vbenian gha sunu, rhunmwuda, irẹn ọkpa ẹre ọ rẹn vbene emwi ye ima hẹ. Ẹghẹ ọkpa i rrọọ nọ ya sẹ ima rae. Vbene emwi rhirhi de hẹ, te ima wa ye sẹtin gha mu okhian ye iko ughughan.

EMWI NE I MIẸN RUẸ VBE OBỌ ETẸN ỌVBEHE

Vbe I rre Quebec ẹkpotọ keghi kie mẹ ya kporhu vbe ugha e redio, ẹkpẹti ughee kevbe ugha na na gbẹn ebe iyẹn, emwi na ma mwẹ re vbe Owebe Giliẹd ẹre ọ zẹe ighẹ I sẹtin ru ena hia. Mẹ vbe ọtẹn nokpia Léonce Crépeault nọ vbe re ọgbaroghe ọghe otako ẹre ọ mobọ gba gha winna, te ọ wa guẹ vbene a ya gu emwa ni winna vbe ugha iyẹn winna. Ọ ghaa gu okpọmwa vbe ugha iyẹn guan, ẹ i ru vbe na miẹn wẹẹ, ọmwa nọ kakabọ guẹ iwinna ẹre irẹn khin, nọghayayerriọ, ọ ghi kha wẹẹ: “Epa, emwa kẹkan ni kporhu ẹre ima khin. Ma ma mobọ rẹn emwi rhọkpa. Te a gie ima ne ima do ya asikoko nọkhua ne ima khian do wewe ma emwa ni bun. Lahọ ma gha hoo ne u ru iyobọ ne ima.” Imuegberriotọ ọghẹe ẹre ọ zẹe ighẹ emwa ni bun ni winna vbe ugha iyẹn mu egbe ne iran ya ru iyobọ ne ima.

Ọ ghi sẹ ẹghẹ, otu na wẹẹ ne I gha deba ọtẹn nokpia ọkpa na tie ẹre Glen How nọ re ọkpa vbe usun omugui ọghe ima winna, ne ima mieke na zuze ye ẹmwẹ kpataki nọ rhirhi gha rre otọ na khian guan kaẹn vbe ugha iyẹn. Emwi ne I miẹn ruẹ vbe Owebe Giliẹd kevbe emwi ne I miẹn ruẹ vbe obọ Ọtẹn Nokpia Léonce wa gele ru iyobọ mẹ. I ghọghọ wẹẹ, ẹkpotọ kie mẹ ya gu Ọtẹn Nokpia How winna. Ọmwa nọ wa gha mwẹ udinmwẹ ẹre ghaa nọ, ọ ma gha mu ohan vbe ọ ghaa rre uwu ẹbu avbe omugui. Sẹhia, ọmwa nọ kakabọ hoẹmwẹ e Jehova ẹre vbe gha nọ.

Vbe ukpo 1985, a na we ne ima ya ga vbe otako ọkpa nọ rre odẹ orrie ọghe Canada, nọ sikẹ eke ne erha mwẹ ye, ne ima mieke na sẹtin gha gbaroghe ẹre vba. Erha mwẹ keghi wu vbọ wa rre uki eha ne ima sẹ evba. Evba ma na ye gha ga zẹvbe ọgbaroghe ọghe otako ya sẹ ukpo 1989, ukpo na ẹre abotu gie na tie ima ne ima do ga vbe Bẹtẹl nọ rre United State, te ọna wa kpa ima odin. Ọ rrie odẹ ukpo 19 ne ima ya ru iwinna ọgbaroghe ọghe otako. Vbe uwu ẹghẹ na, ma gu etẹn ni bun dia, ma vbe gu iran rri evbare ughughan, avbe etẹn na wa gua mu ọghọ ye emwa egbe. Ma wa ya ekhọe hia kpọnmwẹ etẹn hia ni viọ ima la owa kevbe ni rhie evbare ne ima re!

MA KEGHA RRIE UNITED STATE

Vbe ima ghi sẹ Brooklyn, otu na wẹẹ ne I ya ga vbe Service Department. Ẹ i re avbiẹ emwi ẹre I ruẹ re vbe evba, I kpọnmwẹ e Jehova ye ẹkpotọ nọ kie mẹ na. Emwi ọkpa ne kpataki ne I ruẹ re ọre wẹẹ, te ọ khẹke ne I ka gha gualọ otọ ẹmwẹ nẹ, I ke ru emwi rhọkpa. Ọ ghi rre ukpo 1998, a na wẹẹ ne I ya ga vbe Writing Department, I wa ye ruẹ emwi ni bun vbe eke ne I ghi na winna na. Ọwara ukpo ni bun, ẹre I ya gha ru iyobọ ne Ọtẹn Nokpia John Barr, nọ ghaa re ọtẹn nọ siẹnro Writing Committee. I i khian sẹtin mianmian emwi ne I ruẹ re vbe obọ ọre kevbe ẹghẹ ne ima eva ya gba gha winna. Ọtẹn nọ rẹn enegbe ẹre wa gha nọ.

Uyi nọkhua ẹre wa nọ mẹ ne I na deba etẹn nikpia kevbe etẹn nikhuo ni mu egbe rrie otọ winna vbe Writing Department. Te iran wa mu iwinna ne iran rhirhi gha ru ye erhunmwu, iran vbe rẹn wẹẹ, ẹ i re ẹtin obọ iran ẹre iran ya ru iwinna ne iran rhirhi gha ru, sokpan orhiọn nọhuanrẹn ọghe Jehova ẹre ọ ru iyobọ ne iran.

I wa vbe ghọghọ wẹẹ, ẹkpotọ kie ne imẹ vbe Linda ya mu otuẹ gie etẹn ima ni rre otọ ẹvbo 110. Aro ima wa dae vbene avbe arọndẹ na gie yo isi, avbe Agbaziro Ọghe Abotu kevbe avbe etẹn ni rre iwinna ugamwẹ ẹghẹ hia ya rhie ẹre ma wẹẹ, iran hoẹmwẹ e Jehova. Ma wa vbe bẹghe vbene etẹn ni rre iko ya mu ugamwẹ e Jehova karo, agharhemiẹn wẹẹ, a khọn okuo vbe ẹvbo ne iran ye, emwi wegbe mu iran kevbe vbe a zẹ iran kpokpo. E Jehova i khian mianmian iran!

Ke ukpo ni bun gha dee, iyobọ nọkhua ẹre Linda wa ye mẹ, ọ ru iyobọ mẹ ya sẹtin ru iwinna ugamwẹ ne I ru. Ọmwa nọ gbe egbe emwa ẹre wa nọ, erriọ ẹre ọ vbe ya gualọ odẹ nọ khian ya ru iyobọ ne emwa ọvbehe. Ọ wa vbe gua mu ẹmwẹ so vbe ikporhu. Ẹ i re avbiẹ emwa ẹre ọ he ru iyobọ na ya la odẹ ẹmwata, erriọ ẹre ọ vbe ya ru iyobọ ne emwa ni te ka vburriẹ vbe odẹ ọghe orhiọn. Ẹse ọhẹ nọ ke obọ e Jehova rre ẹre ọvbokhan mwẹ wa khin! Mẹ vbe Linda khian ọmaẹn nẹ, ma wa gbọyẹmwẹ ye iyobọ ne etẹn nikpia kevbe etẹn nikhuo ni ye re igbama ru ne ima, iran vbe ru iyobọ ne ima vbe ima ghaa mu okhian rrie ihe ọvbehe.​—Mak 10:​29, 30.

I i sẹtin kpọnmwẹ e Jehova ye iyobọ nọ he ru mẹ ke ukpo 80 gha dee. I wa ya ekhọe hia kue ye ẹmwẹ ne ọsian tae vbe ọ khare wẹẹ: “Ẹghẹ ne I na ye kherhe ẹre u na ma mwẹ emwi, te I ye na iyẹn iwinna ọyunnuan ruẹ.” (Psm 71:17) Te I khian ye gha kpọnmwẹ e Jehova I te ya wu.