Gha Ya Ọghọ Vbe Ute Ta Ẹmwata

1. De emwi nọ khẹke ne ima ru deghẹ ima hoo ne ima gha re ọkpa vbe ẹgbẹe ọghe Jehova?

MA GHA miẹn etẹn ne ima gba ga vbe ẹghẹ okaro, ọkpa vbe usun ọta ne ima ka nọ iran re ọre, “Vbua ya miẹn odẹ ẹmwata hẹ?” Eso sẹtin kha wẹẹ, “odẹ ẹmwata ẹre a na koko iran waan.” Eso sẹtin vbe kha wẹẹ, “ọ ma he kpẹẹ gbe ne iran miẹn odẹ ẹmwata na.” Emwi nọ si ẹre ne ima na rhie ewanniẹn vbenian ye ọta na ọre wẹẹ, ẹmwata ni rre Ẹmwẹ Osanobua ẹre ima ya ru emwi vbe ẹdagbọn ima. Vbọzẹ? Rhunmwuda, ma rẹnrẹn wẹẹ, ma gha sẹtin gha re ọkpa vbe ẹgbẹe ọghe Jehova deghẹ ima na gha rhie ẹre ma wẹẹ, ẹmwata nọ rre Baibol yẹẹ ima, ma na vbe yae gha ru emwi vbe ẹdagbọn ima. Odẹ ọkpa ne ima khian ya ru ọna ọre ne ima gha ta ẹmwata vbe emwi hia.​—Psm 15:​1-3.

2. (a) De emwi na rẹn e Jesu yi? (b) De aro ne emwa khian ya gha ghee ẹmwata ne Jesu ghaa kporhu ẹre?

² Ẹghẹ hia ẹre Jesu ya gha ta ẹmwata. Avbe eghian rẹn kue kha wẹẹ, ẹmwata ẹre Jesu ghaa ta agharhemiẹn wẹẹ, ẹmwẹ nọ ghaa ta ma gha yẹẹ iran. (Mat 22:16) Jesu ghi guan kaẹn aro ne emwa khian ya gha ghee ẹmwata nọ ma emwa re, ọ na kha wẹẹ: “Te I rre do si iwannegbe, ọmokpia ghi gha gu erhae khọn, ọmokhuo ghi gha gu iyẹe khọn, amwẹ ọmọ ghi gha gu iye ọdọ ẹre khọn.” (Mat 10:35) Ẹ i re te Jesu ghaa ghọghọ wẹẹ, emwa i khian gbọyẹmwẹ ye ẹmwata nọ ghaa ma iran re, sokpan ọ rẹnrẹn wẹẹ, emwi vbenian gha gele sunu. (Mat 23:37) Ọ rẹnrẹn wẹẹ, ẹmwata ne irẹn kporhu ẹre gha ghae emwa ni rre agbọn na ye ihe eva. Ọni ọre emwa ne ẹmwata ni rre Baibol yẹẹ, kevbe emwa nẹi yẹẹ.​—2 Tẹs 2:​9-11.

3. Vbe ima khian zẹ iro yan vbe ako iruẹmwi na?

³ Vbe na ghee Jesu, ma keghi hia ne ima gha ta ẹmwata vbe ẹghẹ hia, ọ gha khọnrẹn wẹẹ, ẹ i khian ya ẹko rhiẹnrhiẹn emwa. Erriọ ẹre ima vbe ya gi emwa rẹn ẹmwata ni rre Baibol, ọ gha khọnrẹn wẹẹ, emwa ma gbọyẹmwẹ yọ. Te ọna ghi wa rhie ma wẹẹ, odẹ nọ rhirhi khọn ima ẹre ima khian ya gha ta ẹmwata ra, uhiẹn vbe ima ghaa ta ẹmwata Osanobua ma emwa vbe ikporhu? Hiehie! Vbe ako iruẹmwi na, ma gha ka rhie ewanniẹn ye inọta na, nọ khare wẹẹ: De ehe ne ima khian na miẹn ẹmwata? Iyeke ọni, ma ghi do rhie ewanniẹn ye inọta ọvbehe nọ khare wẹẹ: Vbọzẹ nọ na khẹke ne ima gha ta ẹmwata, de vbene ima khian ya tae hẹ, kevbe de ẹghẹ nọ khẹke ne ima ya tae? Ewanniẹn ọghe avbe inọta na gha ru iyobọ ne ima ya sẹtin gha ya ọghọ vbe ute ta ẹmwata, ma ghi vbe rẹn ẹghẹ nọ khẹke ne ima ya tae.

DE EHE NE IMA KHIAN NA MIẸN ẸMWATA?

4. Vbọzẹ ne ima gha na sẹtin kha wẹẹ, obọ e Jehova ẹre ẹmwata ke rre?

⁴ Obọ e Jehova ẹre ẹmwata ke rre. Ẹmwata ẹre emwi hia nọ ta khin. Vbe igiemwi, emwi hia nọ ta vbekpa emwi nọ maan kevbe nẹi maan keghi re ẹmwata. (Psm 19:9; 119:​142, 151) Te emwi hia ne Jehova we ọ khian sunu wa gele sunu. (Aiz 55:​10, 11) Ọ gha ta ẹmwẹ, te ọ muẹn sẹ. (Nọm 23:19) Uhiẹn, e Jehova i khian sẹtin ta ohoghe! (Hib 6:18) Ẹ i khabe na na tie Jehova, “Osa ọghe ẹmwata.”​—Psm 31:5.

5. Vbọzẹ nẹi na lọghọ na do rẹn e Jehova ne “Osa ọghe ẹmwata”? Rhan otọ ọre. (Iwinna 17:27)

⁵ Emwa ni bun keghi kha wẹẹ, ọ lọghọ na do rẹn e Jehova ne “Osa ọghe ẹmwata,” ohoghe ẹre ọna wa khin. Evbayi hia rhie ẹre ma wẹẹ, e Jehova gele rrọọ. (Rom 1:20) Vbe Pọl gu Ivbi e Grik eso ni rri egie ebe zẹ iro vbe Atẹns, ọ na kha wẹẹ, Osanobua hoo ne ima ‘gualọ irẹn’ kevbe wẹẹ, ọ “ma rree ne ọmwa rhọkpa vbe uwu ima.” (Tie Iwinna 17:27.) Uhiẹn, e Jehova keghi si emwa ni gualọ ẹmwata kẹ egbe.​—Jọn 6:44.

6. De ẹmwata eso ni rre uwu e Baibol, kevbe wẹẹ, vbọzẹ ne avbe ẹmwata na na yẹẹ ruẹ?

⁶ Odẹ ọkpa ne ima gha ya sẹtin rẹn e Jehova ọre deghẹ ima na gha tie Baibol. Orhiọn nọhuanrẹn ọghe Osanobua ẹre a ya dia emwa ni gbẹn e Baibol. (2 Pit 1:​20, 21) Rhunmwuda ọni, ẹmwata ẹre emwi hia nọ rre Baibol khin, ma gha vbe sẹtin mu ẹtin yan rẹn. Vbe igiemwi, ma gha sẹtin yaeyi emwi nọ tae vbekpa vbe na ya yi agbọn yi ẹrinmwi kevbe emwi hia ni rrọọ. (Gẹn 1:​1, 26) Ma gha vbe sẹtin yaeyi emwi nọ tae vbekpa evbọzẹe ne ima hia na re emwa orukhọ, ne usẹ na gba ehe hia kevbe emwi nọ si ẹre ne emwa na wulo. (Rom 5:12; 6:23) Ma wa vbe ya ekhọe hia yaeyi emwi hia nọ tae vbekpa vbene Jehova khian ya ya Ovbi ẹre dọlọe yi, emwi hia ne Esu, nọ re “erha ohoghe” he mu rhia. (Jọn 8:44; Rom 16:20) Ma wa vbe mu ẹtin yan avbe eyan ni rre uwu e Baibol, nọ dekaẹn vbene Jesu khian ya fuẹn emwa dan rua, vbene ọ khian ya huẹn emwa ni wulo kpaegbe, kevbe vbene ọ khian ya dọlọ agbọn na yi, ọ ghi vbe ya ima khian emwa ni gbae. (Jọn 11:​25, 26; 1 Jọn 3:8) U miẹn uyi nọkhua ne Jehova mu ye ima egbe! E Jehova ma ima ẹmwata ni rre uwu e Baibol, ọ na vbe kie ẹkpotọ ne ima ya gie emwa ọvbehe rẹn ẹmwata na.​—Mat 28:​19, 20.

EVBỌZẸE NỌ NA KHẸKE NE IMA GHA TA ẸMWATA

7-8. E Jehova rhie aro tua emwi nọ ya ima ta ẹmwata ra? Ru igiemwi yọ. (Mak 3:​11, 12) (Vbe ya ghee avbe efoto.)

⁷ Zẹvbe ne ima ka tae sin, te ọ khẹke ne ima gha ta ẹmwata deghẹ ima hoo ne ima gha re ọkpa vbe ẹgbẹe ọghe Jehova. Sokpan, ne ima mieke na sẹtin ru emwi nọ yẹẹ e Jehova, emwi ọvbehe ye rrọọ nọ khẹke ne ima ru. E Jehova rhie aro tua emwi nọ ya ima ta ẹmwata. Gia guan kaẹn emwi nọ sunu vbe Jesu kporhu vbe uhunmwu otagbọn na. (Tie Mak 3:​11, 12.) Vbe Jesu kporhu vbe ọkpẹn Okun Ọghe Galili, ọkhọngborrie emwa keghi ma ga ẹre. Emwa eso ne orhiọn dan mu gba ni ghaa rre uwu ẹbu iran keghi fan fi iguẹ vbe odaro e Jesu, iran na gha go wẹẹ: “Wẹ ọre Ovbi Osanobua.” Vbọzẹ ne avbe orhiọn dan na, na ta ẹmwata vbekpa e Jesu? Ọ gha kẹ, te iran ghaa hoo ne emwa ni họn ẹmwẹ ne iran tae mu ẹtin yan iran, ẹghẹ nii iran ghi sẹtin si iran hin odẹ ẹmwata rre. Ẹmwata ẹre iran te ta, sokpan ọghe enegbe iran ẹre iran gu ta ẹmwata nii. Iran ma sẹtin mu e Jesu rẹrẹ, ẹmwẹ ne iran ta ma vbe yẹẹ ọre. Uhiẹn, e Jesu na kue gbe uhi ne iran wẹẹ, ne iran ghẹ kporhu vbekpa irẹn.

⁸ Vbe ima miẹn ruẹ vbe okha na? E Jehova rhie aro tua emwi nọ ya ima ta ẹmwata. Te ọ wa ru ekpataki ne ima gha kporhu rhunmwuda ahoẹmwọmwa ne ima mwẹ ne Jehova, emwa gha tian ima, ma ghi rhie uyi nọ khẹke gie Jehova!​—Mat 5:16; yae taa Iwinna 14:​12-15.

9. De emwi nọ ma khẹke ne ima ru, kevbe wẹẹ, vbọzẹ?

⁹ Gi ima guan kaẹn asefẹn ọvbehe nọ ma na khẹke ne ima rhie uyi ne egbe ima. Gia kha wẹẹ, ọtẹn nokpia ọkpa ta emwi eso ma ima, ọ na we ne ehọ ọvbehe ghẹ họẹn, sokpan ma na ye ya tama emwa ọvbehe. Adeghẹ emwa ne ima tae ma na do rẹn wẹẹ, ẹmwata ẹre ima gele tama iran, iran sẹtin do gha roro ẹre wẹẹ, ma wa rẹn emwi ni bun ne emwa ọvbehe ma rẹn. Rhunmwuda ọni, iran sẹtin do gha ghee ima gidii, sokpan emwi vbenian i khian ya ẹko rhiẹnrhiẹn Osanobua. (Itan 11:13) Vbọzẹ? Emwi na te we ne ima ghẹ tama emwa ọvbehe ẹre ima ya ta, ọ ma fo ye evba, te ima vbe tae rhunmwuda wẹẹ, ma hoo ne emwa ọvbehe gha ghee ima gidii.

VBENE IMA KHIAN YA GHA TA ẸMWATA HẸ

10. Vbe a ya ifiẹmwẹ na ighẹ ẹmwẹ “nọ rhiẹnrhiẹn vbe ehọ” kha? (Kọlọsi 4:6)

¹⁰ Tie Kọlọsi 4:6. Ukọ ighẹ e Pọl keghi tama Ivbi Otu e Kristi ni ghaa rre Kọlọsi wẹẹ, te ọ khẹke ne ẹmwẹ ne iran ta gha re “nọ rhiẹnrhiẹn vbe ehọ vbe ẹghẹ hia.” Vbe ọ ya ọna kha? Emwi ne ẹmwẹ e Grik na ke zedu ifiẹmwẹ na demu ọre na gha ta ẹmwẹ nọ gha sẹtin ru iyobọ ne emwa ọvbehe, sokpan, ọ ghi vbe gha re ẹmwẹ na ya ọghọ vbe ute ta.

11-12. Vbọzẹ nọ na khẹke ne ima gha begbe vbe ima ghaa ya e Baibol ma emwa emwi? Ru igiemwi yọ. (Vbe ya ghee avbe efoto.)

¹¹ Te ọ khẹke ne ima lele ibude ọghe Pọl, ma ghi hia ne ẹmwẹ ne ima ta gha re nọ rhiẹnrhiẹn vbe ima ghaa ya e Baibol ma emwa emwi. E Baibol khare wẹẹ, te ẹmwata vbekpa Osanobua yevbe agbada nọ kakabọ mu, nọ gha sẹtin fian egbe kevbe orhiọn sẹ ehe nọ sẹ. Ọni rhie ma wẹẹ, ọ gha sẹtin ya ima kevbe emwa ọvbehe rẹn aro ọmwa ne ima gele khin. (Hib 4:12) Sokpan, adeghẹ ima ma na begbe vbe ima ghaa ma emwa e Baibol, ma sẹtin ya ohu mu emwa ọvbehe. Odẹ vbo?

¹² Gia kha wẹẹ, vbe ima rre ikporhu, ma na miẹn okpia ọkpa nọ mobọ wa na erhunmwu gie avbe amazẹ, okpia na vbe ẹgbẹe ọre vbe ru Emwi Ukpo kevbe Easter. Ma sẹtin ya e Baibol gi okpia na rẹn wẹẹ, emwa nẹi mwẹ ẹwaẹn ẹre ọ na erhunmwu gie avbe amazẹ kẹkan nẹi mwẹ arrọọ, ma ghi vbe ya e Baibol ma ẹre wẹẹ, ugie ẹbọ ẹre Emwi Ukpo kevbe Easter khin. (Aiz 44:​14-20; 2 Kọr 6:​14-17) Adeghẹ ọna ẹre ima tama okpia na vbe ẹghẹ okaro ne ima wa ya miẹn ọnrẹn, ẹmwata ẹre ima tae, sokpan ma ma ya ẹwaẹn loo Ẹmwẹ Osanobua.

13. Vbe ima khian ya ya umwẹ yi ẹmwẹ ne ima ta hẹ?

¹³ E Pọl vbe kha wẹẹ, te ọ khẹke ne ẹmwẹ ne ima ta gha re na ya umwẹ yi. Ẹ i re te ọ ya ọna kha we ne ima gha mu iyeke ẹmwẹ ma emwa. Nọghayayerriọ, te Pọl ghaa rhie igiọdu ne ima, ne ẹmwẹ ne ima ta gha re na “ya umwẹ yi,” ne ẹmwẹ ne ima kporhu ẹre mieke na gha “rhiẹnrhiẹn” emwa ni danmwehọ ima. (Job 12:11) Na do sẹtin ru ọnọna i khuẹrhẹ. Ma sẹtin gha roro ẹre wẹẹ, vbene ima ya le evbare nọ rhiẹnrhiẹn ima, ma gha vbe le ẹre ne emwa ọvbehe vberriọ, ọ gha vbe rhiẹnrhiẹn iran. Erriọ ẹre ọ vbe ye, ma sẹtin gha roro ẹre wẹẹ, odẹ ne ima ya guan wa yẹẹ emwa hia. Sokpan, ọna i re ẹmwata. Vbe igiemwi, vbe ihe eso ne emwa ke rre, te iran wa ta emwi vbene ọ wa ya rre iran ekhọe, ọ gha khọnrẹn wẹẹ, enọwanrẹn ẹre iran gu guan. Sokpan, a sẹtin miẹn wẹẹ, egbe emwi vbenian i khian yẹẹ emwa ni ke ẹvbo ọvbehe rre. E Pọl khare wẹẹ, te ọ khẹke ne ima rẹn vbene ima “gha ya zẹ ẹmwẹ wanniẹn edọmwadẹ ọghẹe hẹ.” Ọna rhie ma wẹẹ, ọ ma khẹke ne ẹmwẹ ne ima ta gha re vbene ima gualọe yi, sokpan, nọ gha re nọ gha yẹẹ ọmwa nọ danmwehọ ima.

ẸGHẸ NỌ KHẸKE NE IMA YA TA ẸMWATA

14. Emwi hia ne Jesu rẹnrẹn ẹre ọ ma erhuanegbe ẹre ra? Rhan otọ ọre.

¹⁴ Ọghọ vbe ute ẹre Jesu wa ya gha gu emwa ni danmwehọ ẹre guan, ọ wa vbe gua gha mu ẹmwẹ ye owa vbe ọ ghaa ma iran emwi. (Mak 6:34) Sokpan, emwi ni bun rrọọ nọ ye khẹke ne iran ruẹ. E Jesu ma wa ma iran emwi hia nọ rẹnrẹn uhukpa. Te ọ wa gha mwẹ amuroro daa iran, rhunmwuda ọ rẹnrẹn wẹẹ, iran i khian sẹtin rẹn otọ emwi hia uhukpa. Ọ vbe rẹn wẹẹ, ọ ma he sẹ ẹghẹ nọ khẹke ne irẹn ya ma iran emwi eso. Uhiẹn, ọ na kue kha wẹẹ, egbe iran i khian sẹtin rrọ emwi eso ne irẹn gha te tama iran. (Jọn 16:12) De emwi ne ọna ma ima re?

15. Ọ khẹke ne ima ma emwa ne ima gu ruẹ e Baibol emwi hia ne ima rẹnrẹn uhukpa ra? Rhan otọ ọre. (Itan 25:11) (Vbe ya ghee efoto.)

¹⁵ Igiemwi ọghe Jesu ya ima rẹn wẹẹ, ọmwa gha rẹn ẹmwata nọ rre Baibol ma rhie ma wẹẹ, te ọ khẹke nọ wa ma ọmwa ọvbehe emwi hia nọ rẹnrẹn uhukpa. Vbe ima khian ya ya egbe taa Jesu hẹ? Te ọ khẹke ne ima gha mu ẹmwẹ emwa ọvbehe roro. Gi ima dọlegbe guan kaẹn okpia nii ne irẹn vbe ẹgbẹe ọre gba do ugie Emwi Ukpo kevbe Easter. Ma rẹnrẹn we obọ emwa igẹbọ ẹre ugie vbenian ke rre, kevbe wẹẹ, ẹ i ya ẹko rhiẹnrhiẹn Osanobua. Sokpan, gia kha wẹẹ, a ghaa tie ẹre uzọla nọ dee ra uzọla eva nọ dee na do ugie Emwi Ukpo, ẹre u ya suẹn gha gu ẹre ruẹ e Baibol. Adeghẹ u na ya e Baibol ma okpia nii re wẹẹ, ugie igẹbọ ẹre Emwi Ukpo kevbe Easter khin, u na vbe gha hoo nọ wa wio obọ vbọ vbobọvbobọ, ọ gha rhie ẹre ma wẹẹ, u mu ẹmwẹ okpia nii roro ra? Ẹmwata nọ wẹẹ, emwa eso ne ima gu ruẹ e Baibol wa rherhe zẹ owẹ lele emwi ne iran ruẹ vbe Baibol. Sokpan, ẹ i re erriọ ẹre ọ ye ne eso. Ma gha sẹtin ru iyobọ ne emwa ne ima ma ẹre emwi ya gha mwẹ alaghodaro adeghẹ ima na ma iran emwi nọ khẹke ne iran rẹn vbe ẹghẹ ne iran gha na sẹtin miẹn ọnrẹn yi.​—Tie Itan 25:11.

16. De vbene ima khian ya ru iyobọ ne emwa ne ima gu ruẹ e Baibol ya gha “lele odẹ ẹmwata khian”?

¹⁶ Ọyẹnmwẹ nọ sẹ ima i re nekherhe vbe ima gha sẹtin ru iyobọ ne emwa ya do rẹn odẹ ẹmwata. De emwi ne ima gha ru adeghẹ ima hoo ne iran ye gha “lele odẹ ẹmwata khian”? Ma ghi gha rhie igiemwi esi ye otọ ne iran. (3 Jọn 3, 4) Gi vbene u ya loo ẹdagbọn ruẹ rhie ẹre ma wẹẹ, u yayi wẹẹ, Osanobua gha mu eyan rẹn hia sẹ. Gha ta ẹmwata rhunmwuda we u hoo ne u ya ẹko rhiẹnrhiẹn Osanobua. Gha ya ọghọ vbe ute gu emwa zẹ iro vbe u ghaa ma iran emwi, u ghi vbe rẹn ẹghẹ nọ khẹke ne u ya ta emwi eso. Iran gha tian ruẹ, u ghi rhie uyi gie Jehova. U gha ru vberriọ, te u rhie ẹre ma wẹẹ, e Jehova ne Osa ọghe ẹmwata ẹre u ga.