Emwi Nọ Gha Ru Iyobọ Ne Avbe Ikhuo Na Ya Obọ Dan Mu

Ọna ọre omuso ọghe uhunmwuta nọ rre jw.org nọ khare wẹẹ: “Women’s Safety​—The Bible’s Perspective.” U gha sẹtin ya e link ọkpa nọ rre ufomwẹ uhunmwuta na ya danlod e PDF nọ rrọọ, u gha vbe sẹtin print ẹre, u ghi vbuọ ọre nọ gha yevbe asobọrhie nọ mwẹ ipapa enẹ. Ọtẹn nokhuo ọkpa na tie ẹre Stacy nọ rre United States khare wẹẹ, “I keghi print e ni bun, mẹ vbe ọtẹn nokhuo ọkpa keghi viọ ọre gha rrie eke na na gbaroghe ikhuo na ya obọ dan mu vbe ako ne ima na kporhu.”

Ọkpa vbe usun emwa ni winna vba na ghi nọ iran deghẹ iran gha sẹtin viọ ni bun gie irẹn, ne irẹn viọ ne emwa ni dia evba ya. Rhunmwuda ọni, etẹn nikhuo na keghi viọ 40 vbe asobọrhie na kevbe 30 vbe kadi nọ dia ọmwa lae jw.org gie iran. Vbe iran ghi dọlegbe mu otuẹ gha rrie evba, okhuo nọ gbaroghe evba nii keghi tama iran we irẹn gha hoo ne iran do ma avbe ikhuo ni rre evba vbene ima ya gu emwa ruẹ e Baibol hẹ.

E Stacy vbe etẹn nikhuo eva ọvbehe vbe yo ihe ọvbehe na na gbaroghe ikhuo na ya obọ dan mu, ikhuo ni rre evba keghi miẹn iran ebe isẹn vbe asobọrhie na, iran na vbe we ne iran viọ ọvbehe rre. Okhuo ọkpa nọ winna vba keghi kha wẹẹ, “Asobọrhie na gha wa ru iyobọ ne ikhuo ni rre emwa.” Ọ na vbe rhie tẹ wẹẹ, “Ọna ọre emwi ne ima wa gualọ zẹẹ.” Vbe iran ghi dọlegbe mu otuẹ gha rrie evba, ikhuo ni bun ni rre evba keghi si egbe koko ne iran do rẹn vbene ima ya gu emwa ruẹ e Baibol hẹ, eva vbe uwu iran na kha wẹẹ, iran gha yo iko na do vbe ufomwẹ uzọla.

E Stacy khare wẹẹ: “Te ọ wa gbe ima otiti, vbene emwa wa ya gbọyẹmwẹ ye uhunmwuta na. A gha print ẹre ladian, a na vbuọ ọre nọ gha yevbe asobọrhie, a gha wa sẹtin loo ẹre ya kporhu iyẹn nọ maan ọghe Arriọba ma ikhuo na ya obọ dan mu. Te ọ wa ya ima ghọghọ vbene emwa wa ya gbọyẹmwẹ ye uhunmwuta na, ma wa vbe ya aro ye vbene Jehova khian ya fiangbe ẹrhiọn ne ima loo zẹvbe ne ima ya kporhu ma avbe ikhuo na ya obọ dan mu.”