Igbama ọkpia ọkpa gha ghee emwa eso nọ gha sẹtin ya egbe taa

INỌTA NE AVBE IGBAMA NỌ

De Vbene I Gha Ya Sẹtin Zẹ Ọmwa Esi Ni Gha Ya Egbe Taa Hẹ?

“Ọ mwẹ ọlọghọmwa eso ni miẹn vbe I rre owebe, igiemwi esi ọghe ọmwa nọ ka la egbe ọlọghọmwa vberriọ gberra nẹ, ẹre ọ ru iyobọ mẹ. I na gha hia ne I ya egbe taa ẹre. Adeghẹ u na gha mwẹ ọmwa esi ne u ya egbe taa, ọ gha ru iyobọ nuẹn vbe u gha miẹn edanmwẹ.”—Haley.

U ghaa mwẹ ọmwa ne u ya egbe taa, ọ gha sẹtin ru iyobọ nuẹn vbe u gha miẹn edanmwẹ, u ghi vbe sẹtin mu okhuo ne u fian ne egbuẹ sẹ. Sokpan, ọ ghi gha re ọmwa nọ mwẹ uyinmwẹ esi.

Vbọzẹ nọ na khẹke ne ọmwa ne u khian ya egbe taa gha mwẹ uyinmwẹ esi?

Aro emwa ne u ya egbe taa, ẹre ọ khian ta vbene uyinmwẹ ruẹ khian gha ye hẹ.

E Baibol tama Ivbi Otu e Kristi we ne iran gha ya egbe taa emwa ni mwẹ uyinmwẹ esi, ọ wẹẹ: “Wa gha mwẹ egbe amuẹtinyan ne iran mwẹ, zẹvbe ne uwa ya ghee uyinmwẹ iran kevbe emwi esi nọ kẹ ladian.”—Hibru 13:7.

Emwi nọ gha ru iyobọ nuẹn: Ugbẹnvbe a miẹn wẹẹ, aro emwa ne u hoo ne u gha ya egbe taa, ẹre ọ khian ta vbene uyinmwẹ ruẹ khian gha ye hẹ, hia ne u gha ya egbe taa emwa ni mwẹ uyinmwẹ esi, ẹ i wa re emwa na họn usi iran rre, ra emwa ne uwa gba re ihegbe.

“I wa ruẹ emwi ni bun vbe obọ Ọtẹn Nokpia ọkpa na tie ẹre Adam—I wa miẹn emwi ruẹ vbe odẹ nọ ya yin kevbe obọ nọ ya mu emwa ọvbehe. I wa ye ye rre emwi eso nọ ru kevbe ẹmwẹ nọ ta. Uyinmwẹ esi ọghẹe wa kakabọ ru iyobọ mẹ.”—Colin.
Aro emwa ne u ya egbe taa sẹtin fi iziro ruẹ werriẹ.

E Baibol khare wẹẹ: “Wa ghẹ gi ọmwa rhọkpa mu uwa rẹrẹ. Emwa dan na gu mu obọ ẹre ọ mu uyinmwẹ esi rhia.”—1 Kọrint 15:33.

Emwi nọ gha ru iyobọ nuẹn: Gi ọmwa ne u hoo ne u gha ya egbe taa gha mwẹ uyinmwẹ esi, ẹ i re nọ wa gha mose kẹkan. Vbe ẹ i erriọ, okiekie ẹre i khian gha maan.

“U ghaa ya egbuẹ taa emwa na họn usi iran rre, u sẹtin do gha roro ẹre wẹẹ, u i mwẹ esa ne u ye. U do kakabọ gha kpokpo egbe ba ẹmwẹ ose.”—Tamara.

Mu ọna roro: De ebe nọ rrọọ, deghẹ ọmwa na gha hoo nọ gha ya egbe taa ọmwa na họn usi ẹre rre, ra emwa ni ku iku isasegbe?
Aro emwa ne u ya egbe taa ẹre ọ khian ta deghẹ u gha mu okhuo ne u fian ne egbuẹ sẹ.

E Baibol khare wẹẹ: “Gha gu ọmwa nọ mwẹ ẹwaẹn mu obọ, uwẹ gha vbe do gha mwẹ ẹwaẹn.”—Itan 13:20.

Emwi nọ gha ru iyobọ nuẹn: Gi emwa ne u khian gha ya egbe taa gha mwẹ uyinmwẹ esi ne u hoo ne u gha mwẹ. Zẹvbe ne u ya ya egbe taa iran, u ghi do gha mwẹ alaghodaro vbe okhuo ne u fian ne egbuẹ.

“Ne u gha te ya kha wẹẹ, ‘I hoo ne I gha re ọmwa nọ rẹn enegbe,’ u sẹtin kha wẹẹ, ‘I hoo ne I gha re ọmwa nọ rẹn enegbe vbene Jane ye. Ẹ i ya ẹghẹ gu ọmwa ku, ọ wa vbe ru iwinna nọ bi ye ọre egbe.’ ”—Miriam.

Uhunmwu ẹmwẹ nọ rrọọ ọre wẹẹ: Adeghẹ u na gha ya egbe taa ọmwa esi, uwẹ tobọ ghi vbe do gha re ọmwa esi.

Igbama ọkpia ọkpa gha ya egbe taa ọmwa nọ mwẹ uyinmwẹ esi — U ghaa mwẹ ọmwa nọ mwẹ uyinmwẹ esi ne u ya egbe taa, u ghi sẹtin mu okhuo ne u fian ne egbuẹ sẹ!

Emwi nọ gha ru iyobọ nuẹn ya zẹ ọmwa esi

Odẹ eva ne u gha ya sẹtin zẹ ọmwa ne u gha ya egbe taa.

Gha mwẹ uyinmwẹ ọkpa vbe ekhọe ne u hoo ne u gha mwẹ, iyeke ọni, u ghi gualọ ọmwa ne ẹmwẹ ọnrẹn yẹẹ ruẹ, nọ mwẹ uyinmwẹ na.
U sẹtin gu ọmwa ne ẹmwẹ ọnrẹn yẹẹ ruẹ ru ọse, iyeke ọni, u ghi gha ya egbe taa uyinmwẹ eso nọ mwẹ, ne u hoo ne u vbe gha mwẹ.

Ako ne u gha sẹtin gbẹnnẹ emwi yi nọ rre uhunmwuta na gha ru iyobọ nuẹn.

Emwa eso ne u gha sẹtin ya egbe taa:

Ihua. “Ọse mwẹ ni gu obọ re sẹ, keghi re ọmwa ne I hoo ne I gha ya egbe taa. Ọ wa mwẹ ẹghẹ ne ọmwa, erriọ ẹre ọ vbe ya gbe egbe emwa. I diẹn ọnrẹn, sokpan ọ wa mwẹ avbe uyinmwẹ esi ni mẹ i mwẹ, I hoo ne I gha mwẹ egbe uyinmwwẹ esi nọ mwẹ.”—Miriam.
Emwa ni diẹn ruẹ. Ọna sẹtin gha re evbibiọ ra emwa ne uwa gba mwẹ iyayi ọkpa. “Emwa ne I gha sẹtin ya egbe taa, ẹre evbibiẹ mwẹ khin. Iran mwẹ uyinmwẹ esi. Ugbẹnso, I bẹghe abakuru ọghe iran, sokpan iran ye hia ne iran gha rhie uyinmwẹ esi ma agharhemiẹn wẹẹ, ọ ma gba ne iran fo. I gha khian enọwanrẹn nẹ, I hoo ne emwa vbe gha ghee mwẹ zẹvbe ọmwa na gha sẹtin ya egbe taa, vbene evbibiẹ mwẹ ye.”—Annette.
Emwa ni rre Baibol. “I wa hia ne I ya egbe taa emwa ne Baibol guan kaẹn—Emwa vbe na ghee Timoti, Rut, Job, Pita, kevbe ọvbokhan okhuo nii ne Ovbi Izrẹl—uyinmwẹ esi ughughan ne iran mwẹ, ẹre ọ ya mwẹ hoo ne I ya egbe taa iran. Zẹvbe ne I ya ruẹ sayọ vbekpa emwa ne Baibol guan kaẹn, erriọ ẹre I ya bẹghe ẹre wẹẹ, emwa ni gele gha rrọọ, ẹre iran khin. Ọ wa gha yẹẹ mwẹ vbe I tie avbe okha ni rre ebe na tiẹre Imitate Their Faith, kevbe abọ na tie ẹre ‘Role Model Index’ nọ rre Questions Young People Ask—Answers That Work.”—Melinda.

Emwi nọ gha ru iyobọ nuẹn: Hia ne u gha mwẹ emwa ughughan ne u ya egbe taa. Ukọ ighe Pọl keghi tama Ivbi Otu e Kristi wẹẹ: “Wa gha rhie aro sotọ vbe egbe emwa ni rhie owẹ lele igiemwi ne ima rhie yotọ ne uwa.”—Filipai 3:17.

U kue rẹn wẹẹ? Uwẹ gha sẹtin gha re ọmwa ne emwa ya egbe taa! E Baibol khare wẹẹ: “Gha re igiemwi esi ne iran ni mwẹ amuẹtinyan vbe ẹmwẹ ne u ta, vbe uyinmwẹ, vbe ahoẹmwọmwa, vbe amuẹtinyan, kevbe uhuanmwe.”—1 Timoti 4:12.

“Ọ gha khọnrẹn wẹẹ ọ ye mwẹ ako eso nọ khẹke ne u winna yan, u gha ye sẹtin gha re igiemwi esi ne emwa ọvbehe. U ma rẹn ọmwa nọ ghee ruẹ, ẹmwẹ ne u ta sẹtin wa fi ẹdagbọn ọmwa werriẹ vbene u i na rẹn.”—Kiana.

Emwi ne ihua khare

“Emwa ni bun na họn usi ẹre keghi loo egbe ne Osanobua ya wee iran vbe odẹ nọ ma khẹke. Ma gha ya egbe taa emwa vbenian, ọ sẹtin rhie ikuanegbe ne ima, ẹ i re ọni ọkpa, ọ sẹtin vbe ya ima do gha ghee ẹre wẹẹ, ọ ma de emwi nọ rhiae deghẹ ọmwa na gha yin vbe odẹ nọ ma khẹke.”—Emma.

“U na gha mwẹ ọmwa nọ mwẹ uyinmwẹ esi ne u ya egbe taa, agbọn ghi maan ruẹ. Ọmwa ya emwi nọ sunu daa ọmwa ọvbehe wan ne egbe, ẹre ọ maan sẹ, ọmwa ya egbe miẹn emwi eso nẹ, ọ ke do gha mwẹ ẹwaẹn”—Justine.

“Ugbẹnso, te u gha gualọ emwa ne u gha ya egbe taa, odẹ ne u gha ya ru ọna, ọre ne u hia ne u rẹn iran sayọ, kevbe ne u vbe gu iran ru ọse. Emwa ne u ma te ya aro yi, sẹtin do gha re emwa ni mwẹ uyinmwẹ esi ne u gha ya egbe taa.”—Micah.