Ọ Khẹke Ne Ọmwa Gha Rre Otu Ugamwẹ Ra?

Ewanniẹn ne Baibol rhie ye inọta na

Ẹẹn, ọ wa khẹke. Rhunmwuda, Osanobua hoo ne ima gha si egbe koko ga irẹn. E Baibol khare wẹẹ: “Wa gi ima vbe gha mu ẹmwẹ egbe roro, ne ima mieke na gua egbe kpa ya gha mwẹ ahoẹmwọmwa, kevbe na vbe gha winna iwinna esi. Wa ghẹ gi ima dobọ iko ne ima koko do yi.”—Hibru 10:24, 25.

Ẹmwẹ ne Jesu tae so igiẹ yọ wẹẹ, te erhuanegbe ẹre khian gha mwẹ otu ugamwẹ ne iran ye, ọ khare wẹẹ: “Adeghẹ uwa na hoẹmwẹ egbe, ẹre emwa hia khian na rẹn wẹẹ, erhuanegbe mwẹ ẹre uwa khin.” (Jọn 13:35) Odẹ ọkpa kpataki ne iran khian ya rhie ẹre ma wẹẹ iran hoẹmwẹ egbe, ọre vbe iran ghaa gu egbe mu obọ. Iran ghi gha si egbe koko vbe ẹghẹ hia vbe dọmwadẹ iko ne iran na ga Osanobua. (1 Kọrint 16:19) Iran hia vbe uhunmwu otagbọn ghi gha re ẹgbẹe ọkpa.—1 Pita 2:​17.

Ọmwa ghaa rre otu ugamwẹ nẹ, ọ ma wa fo ye evba

Agharhemiẹn weẹ e Baibol we ne ima gha si egbe koko ga Osanobua, ọni ọkpa ma sẹ nọ gha ya ẹko rhiẹnrhiẹn Osanobua. Deghẹ ọmwa hoo ne Osanobua miẹn ugamwẹ ọghẹe yi, te ọ khẹke ne emwi nọ ruẹ vbe otu ugamwẹ nọ ye gha rhiegbe ma vbe uyinmwẹ ọnrẹn. Vbe igiemwi, e Baibol khare wẹẹ: “Ugamwẹ nọhuanrẹn kevbe nẹi mwẹ orra vbe odaro Osanobua ne Erha mwa ẹre na khin: na gha gbaroghe avbe udefiagbọn kevbe ikhuo ni dẹgbẹe vbe usẹ ne iran ye, a ghi vbe gha hia, na gban egbe ne uyinmwẹ nọ ma huan ọghe agbọn na.”—Jems 1:​27.