Ọkpa Ẹre Ugamwẹ Hia Khin Ra? Ugamwẹ Hia Ẹre Ọ Ya Ọmwa Sikẹ Osanobua Ra?

Emwi ne Baibol khare

Ẹo, ugamwẹ hia i re ọkpa. E Baibol guan kaẹn ugamwẹ ughughan ni ru emwi ni sọnnọ Osanobua. A gha sẹtin ghae avbe ugamwẹ na ye ẹbu eva.

Ẹbu 1: Ugamwẹ na na ga ẹbọ

E Baibol keghi gie ugamwẹ na na ga ẹbọ zẹvbe emwi “nẹi mwẹ esa.” (Jerimaia 10:​3-5; 16:​19, 20) E Jehovaa keghi gbe uhi ne agbẹnvbo ọghe Izrẹl nẹdẹ wẹẹ: “Wa ghẹ ga osa ọvbehe vbọ gberra imẹ.” (Ẹksodọs 20:​3, 23; 23:24) Vbe ẹghẹ ne Ivbi Izrẹl na gha ga ẹbọ, “ohu iran keghi mu e Jehova.”​—Nọmbas 25:3; Lẹvitikọs 20:2; Giọgis 2:​13, 14.

Aro vberriọ ẹre Osanobua vbe ya ghee ugamwẹ na na ga “osa” ọghe ohoghe vbe ẹdẹnẹrẹ. (1 Kọrint 8:​5, 6; Galetia 4:8) Osanobua keghi tama emwa ni hoo ne iran gele ga irẹn, ne iran ghẹ ghi gu emwa ni rre ugamwẹ ohoghe ru ọse, ọ khare wẹẹ: “Wa ladian hin uwu ẹbu iran rre, ne uwa wannọ egbe hin ehe ne iran ye rre.” (2 Kọrint 6:​14-17) Deghẹ ọkpa ẹre ugamwẹ hia gele khin, kevbe wẹẹ, ehia ẹre ọ gele ya ọmwa sikẹ Osanobua, vbọzẹ ne Osanobua na ta ẹmwẹ na?

Ẹbu 2: Ugamwẹ na na ga Osa ọghe ẹmwata vbe odẹ ne irẹn ma kpasẹ yi

Ẹghẹ eso ghaa rrọọ ne Ivbi Izrẹl na gha ga Osanobua vbe odẹ ne emwa ni rre ugamwẹ ohoghe ya gha ga osa ọghe iran, sokpan, e Jehova ma miẹn ugamwẹ ọghe iran yi, rhunmwuda, te iran ya ugamwẹ ohoghe gua ugamwẹ ẹmwata. (Ẹksodọs 32:8; Diuteronomi 12:​2-4) Jesu keghi gu avbe ọkaolotu ugamwẹ ni ghaa rrọọ vbe ẹghẹ ọghẹe gui, rhunmwuda odẹ ne iran ya gha ga Osanobua. Vbe aro emwa nagbọn, iran ghi ba gha ru vbene a miẹn wẹẹ, iran ga Osanobua, “sokpan, ọ gha de ọghe emwi ni ru ekpataki ne Uhi we na gha ru, ọni ọre, na gha ya obọ nọ khẹke mu emwa, na gha tohan emwa kevbe na mudia ẹse, [iran] ghi bizugbe ẹre.”​—Matiu 23:23.

Erriọ vbe ye vbe ẹdẹnẹrẹ, ugamwẹ nọ ma emwa ẹmwata, ẹre ọ khian sẹtin ya emwa sikẹ Osanobua. Ẹmwata na kha na, rre uwu e Baibol. (Jọn 4:24; 17:17; 2 Timoti 3:​16, 17) Ugamwẹ ne imamwaemwi ọghe iran ma gua emwi nọ rre Baibol ro, keghi ya emwa khian rree ne Osanobua. Imamwaemwi nibun rrọọ ne emwa eso roro wẹẹ e Baibol ẹre ọ ke rre, vbe na ghee imamwaemwi ọghe Osa Ne Agbeha, orhiọn nẹi wu kevbe ẹrinmwi erhẹn. Sokpan, ugamwẹ ohoghe ẹre avbe imamwaemwi na ke ladian. Ugamwẹ nọ ma emwa emwi vbenian i mwẹ “esa,” rhunmwuda, te iran ya imamwaemwi ọghe emwa nagbọn rhie ihe emwi ne Osanobua gualọ.​—Mak 7:​7, 8.

Ọ keghi sọnnọ Osanobua ne emwa na ba ru wẹẹ iran gae, vbene iran i na gele gae vbe odẹ ọghe ẹmwata. (Taitọs 1:16) Ne ugamwẹ ne ọmwa ye mieke na sẹtin ru iyobọ nẹẹn ya sikẹ Osanobua, te ọ khẹke ne emwi nọ ruẹ vba gha rhiegbe ma vbe ẹdagbọn ọnrẹn, ẹ i re nọ wa gha mwẹ obọ vbe emwi na ru vbe ugamwẹ nii kẹkan. Vbe igiemwi, e Baibol wẹẹ: “Adeghẹ ọmwaikọmwa na wẹẹ irẹn ga Osanobua, sokpan, ẹ i gua dia aranmwẹ ọnrẹn, te ọmwa vberriọ rẹrẹ egbe ẹre, ugamwẹ ọnrẹn i vbe mwẹ esa. Ugamwẹ nọhuanrẹn kevbe nẹi mwẹ orra vbe odaro Osanobua ne Erha mwa ẹre na khin: na gha gbaroghe avbe udefiagbọn kevbe ikhuo ni dẹgbẹe vbe usẹ ne iran ye, a ghi vbe gha hia, na gban egbe ne uyinmwẹ nọ ma huan ọghe agbọn na.”​—Jems 1:​26, 27.