Igbinnoguo I Mwẹ Iyobọ Nọ Ye

Emwa ni bun vbe ẹdẹnẹre yayi wẹẹ imuanẹmwẹ ra ọlọghọmwa gha rre otọ, igbinna ẹre a ya tae. Sokpan, iziro vberriọ gbodan ghee imamwaemwi ọghe Jesu kevbe igiemwi nọ rhie ye otọ. Gi ima guan kaẹn emwi eso ne Jesu ru kevbe emwi nọ tae.

Emwi Ne Jesu Tae

Vbe Ikporhu Ne Jesu Kpee Re Vbe Uhunumwu Oke, ọ keghi ma emwa re wẹẹ, ohu, egbebalọmwẹ kevbe okhọn, i khian sẹtin sẹ ọfurre ye ọlọghọmwa rhọkpa. Gi ima guan kaẹn igiemwi eso.

• “Emwi hia ne uwa hoo ne emwa ru ne uwa, ọ khẹke ne uwa vbe ru ẹre ne iran.” (Matiu 7:12; Luk 6:31) Ibude na rhie igiọdu ne ima, ne ima gha ya obọ esi mu emwa ọvbehe, ọni ọre wẹẹ, obọ ne ima hoo ne emwa ya mu ima, ẹre ima khian vbe ya gha mu iran.a Ugbẹnvbe a miẹn wẹẹ, a i miẹn ọmwa nọ hoo na gha ya obọ dan mu irẹn, te ọ khẹke ne ima gha ya obọ esi mu emwa ọvbehe, ma ghi vbe gha rhie ọghọ ne iran, ọ gha khọn rẹn wẹẹ imuanẹmwẹ rre uwu ẹkpo ima.

• “Ọmwaikọmwa gha gbe ubi ye uwa aro, wa ghi vbe mu obọ nọkpa nẹẹn nọ gbe yọ.” (Matiu 5:38, 39; Luk 6:29) Jesu ma ya ọna kha wẹẹ, ne ima kue ne emwa gha ya obọ dan mu ima. Nọghayayerriọ, te ọ ghaa hoo nọ dia iziro ọghe avbe ọkaolotu ugamwẹ eso ni ghaa rrọọ vbe ẹghẹ nii, iran kegha ma emwa re wẹẹ, ọmwa gha ru iran emwi, te ọ khẹke ne iran ru ẹre re werriegbe. Sokpan, Jesu keghi tama erhuanegbe ẹre ne iran gha re emwa ni fu kevbe wẹẹ, ọmwa gha ru iran emwi, ne iran ghẹ ru ẹre werriegbe.b

• “Wa ye gha hoẹmwẹ eghian uwa.” (Matiu 5:43, 44; Luk 6:27) Jesu ma ima re wẹẹ, te ọ khẹke ne ima gha ya obọ esi mu emwa ni khẹko ima kevbe ni ya obọ dan mu ima. Ẹ i re te ọ ya ọna kha wẹẹ, ne ima gha ghọghọ ye emwi dan ne iran ru.c Sokpan, adeghẹ ima na gha ya obọ esi mu emwa ni khẹko ima, ọ sẹtin fi iran ekhọe werriẹ, iran ghi vbe do gha ya obọ nọ maan mu ima.

Emwi ne Jesu he ru kevbe emwi nọ khian ru vbe odaro

Jesu keghi ma ima re wẹẹ, okhọn i mwẹ iyobọ nọ ye​—odẹ nọ ya loo ẹdagbọn rẹn wa rhie ọna ma. Vbe asọn ne emwa do mu e Jesu, ọkpa vbe erhuanegbe ẹre kegha hoo nọ gbinna nẹẹn, sokpan Jesu na tama rẹn wẹẹ: “Rhie umozo ruẹ ye ako ẹre, rhunmwuda, ọmwaikọmwa nọ tọn umozo mu, umozo ẹre a khian vbe ya gbe ẹre rua.” (Matiu 26:52) Jesu keghi rhie ẹre ma wẹẹ irẹn hoẹmwẹ avbe eghian ọghẹe, lekpae nọ na yabọ iran, ọ na vbe na erhunmwu ne iran!​—Luk 23:33, 34; 1 Pita 2:23.

E Baibol tae wẹẹ, Jesu nọ re Okoro Ọfunmwegbe gha rherhe do wabọ igbinnoguo hin agbọn na rre. (Aizaia 9:6, 7) U ghaa hoo ne u rẹn sayọ vbekpa agbọn nọ maan ne Osanobua mwamwa khẹ ima vbe odaro, ya tie uhunmwuta na “How War and Violent Conflict Will End.”