“Wa Ghi Vbe Hia Vbe Odẹ Ke Odẹ, Ne Uwa Ye Gha Rrọọ Vbe Uwu Akugbe Ne Orhiọn Nọhuanrẹn Rhie Ne Uwa”
UKỌ ighẹ e Pọl keghi rhie igiọdu ne Ivbi Otu e Kristi ni rre Ẹfisọs ne iran “gha mu emwi ne emwa ọvbehe ru wuo egbe rhunmwuda ahoẹmwọmwa. [Iran] ghi vbe hia vbe odẹ ke odẹ, ne [iran] ye gha rrọọ vbe uwu akugbe ne orhiọn nọhuanrẹn rhie ne [iran], lekpa ọfunmwegbe nọ dee [iran] hia kugbe.”—Ẹfis 4:2, 3.
“Orhiọn nọhuanrẹn” ẹre ọ rhie “akugbe” ne ima sọyẹnmwẹ ọnrẹn ne ima. Ọna rhie ma wẹẹ, ọkpa vbe usun ọmọ ne orhiọn nọhuanrẹn mọ ẹre akugbe khin. Vbọrhirhighayehẹ, e Pọl khare wẹẹ, te ọ khẹke ne ima hia vbe odẹ ke odẹ ne ima ye gha rrọọ vbe uwu akugbe. Dọmwadẹ Ivbi Otu e Kristi ẹre ọ khẹke nọ hia vbe odẹ ke odẹ ne ima mieke na “ye gha rrọọ vbe uwu akugbe ne orhiọn nọhuanrẹn rhie ne” ima.
Vbe igiemwi, gia kha wẹẹ, ọmwa ya imọto nuẹn. De ọmwa nọ khẹke nọ gha gbaroghe imọto nii? Ẹ i re uwẹ nọ? Imọto nii gha rhia, obọ ruẹ ẹre ọ ye, ẹ i re obọ ọmwa nọ ya imọto nii nuẹn, rhunmwuda uwẹ ẹre ọ ma sẹtin gbaroghe ẹre ẹse.
Erriọ ẹre ọ vbe ye, agharhemiẹn wẹẹ, ẹse ọhẹ ne Osanobua ya ru ima ẹse ẹre akugbe ne ima sọyẹnmwẹ ọnrẹn khin, te ọ khẹke ne dọmwadẹ ima hia ne ima ghẹ gi ẹre wii ima. Adeghẹ ima vbe ọtẹn na gha mwẹ egbe ẹzọ, te ọ khẹke ne ima nọ egbe ima wẹẹ, ‘Mẹ hia vbe odẹ ke odẹ ne I ru adọlọ ra, ne ima mieke na gha rrọọ vbe uwu akugbe ne orhiọn nọhuanrẹn rhie ne ọmwa ra?’
‘HIA VBE ODẸ KE ODẸ’ NE U GHA RU EMWI NỌ GHA YA IMA GHA RRỌỌ VBE UWU AKUGBE
Zẹvbe ne Pọl ta ẹre, te ima gha hia vbe odẹ ke odẹ ne ima mieke na ye gha rrọọ vbe uwu akugbe katekate deghẹ ọtẹn na ru emwi nọ sọnnọ ima. Ma gha khian gu ọmwa ru adọlọ, ẹghẹ hia ẹre ọ wa ya khẹke ne ima ya bu ọmwa nii, ne ima ya tama rẹn vbene emwi ye ima hẹ ra? Ẹ i re wa re ẹghẹ hia. U sẹtin nọ egbuẹ wẹẹ, ‘I gha ru vberriọ, ọ gha sọfurre ye ẹzọ nọ rre otọ ra, ra ọ gha yae tua sayọ?’ Ugbẹnso, emwi nọ wa maan sẹ ọre ne ima yabọ ọmwa nii, ma ghi vbe hia ne ima mianmian emwi nọ sunu.—Itan 19:11; Mak 11:25.
Nọ egbuẹ wẹẹ, ‘I ghaa si ukankan ye ẹzọ nọ rre otọ, ọ gha sọfurre ye ẹzọ nọ rre otọ ra, ra ọ gha yae tua sayọ?’
Zẹvbe ne ukọ ighẹ e Pọl tae, wa gi ima ye “gha mu emwi ne emwa ọvbehe ru wuo egbe rhunmwuda ahoẹmwọmwa.” (Ẹfis 4:2) Ebe ọkpa khare wẹẹ, a gha sẹtin rhan otọ ẹmwẹ nọ rre ako na vbenian “wa miẹn iran yi vbene iran wa ye zẹẹ.” Ọna rhie ma wẹẹ, te ọ khẹke ne ima rẹn wẹẹ, emwa orukhọ ẹre etẹn ima khin vbene ima vbe ye. Ẹmwata nọ wẹẹ, te ima wa hia ne ima “mu akpa ọghe ọgbọn yọ.” (Ẹfis 4:23, 24) Vbọrhirhighayehẹ, ma rhọkpa i rrọọ nọ gha sẹtin wa ru ọna vbene ima i na ba ẹre ku. (Rom 3:23) Ma gha ke ọna ye orhiọn, ẹ i khian gha lọghọ ne ima gha mu emwi ne emwa ọvbehe ru wuo egbe, ma ghi sẹtin yabọ, ẹghẹ nii, ma ghi gha rrọọ vbe “uwu akugbe ne orhiọn nọhuanrẹn rhie ne” ọmwa.
Adeghẹ ima na gu etẹn ru adọlọ, ma na vbe mianmian emwi ne iran ru ima re, ma ghi sẹtin ye gha rrọọ vbe uwu “ọfunmwegbe nọ dee [ima] hia kugbe.” Ẹmwẹ Grik na ke zedu “dee [emwi] hia kugbe” vbe ebe Ẹfisọs 4:3 ẹre a vbe zedu ẹre ghee “emwi hia ni da akhuẹn yi kukugbe” vbe ebe Kọlọsi 2:19. Emwi ni da akhuẹn yi kugbe keghi re avbe inian ni wegbe ni da ugboloko eva kugbe. Erriọ ẹre ọ vbe ye, ọfunmwegbe kevbe ahoẹmwọmwa ne ima mwẹ ne etẹn ima ẹre ọ ru iyobọ ne ima ya rhikhan mu iran, ọ gha khọnrẹn wẹẹ ugbẹnso, iran ru emwi nọ sọnnọ ima.
Rhunmwuda ọni, adeghẹ ọtẹn na ru ruẹ emwi, hia ne u gha ya aro nọ maan ghee nene ọtẹn ne u gha te ya rhie aro tua eke nẹi na hia. (Kọl 3:12) Ugbẹnvbe a miẹn wẹẹ, emwa ni ma gba ẹre ima hia khin, ẹ i mwẹ uwẹ ma vbe ru emwi nọ sọnnọ emwa ọvbehe. U gha ke ọna ye orhiọn, ọ gha ru iyobọ nuẹn ya hia vbe odẹ ke odẹ ne u ru emwi nọ gha ya ima gha rrọọ vbe “uwu akugbe ne orhiọn nọhuanrẹn rhie ne” ima.