Jesu Ọre Ogie Ohẹn Nọ Mwẹ Ẹnina

1-2. (a) Vbọzẹ ne Jehova na gie Ovbi ẹre gha die agbọn na? (b) Vbe ima khian zẹ iro yan vbe ako iruẹmwi na? (Hibru 5:​7-9)

VBE odẹ ukpo 2,000 nọ gberra, e Jehova keghi gie Ovbi ẹre nọ hoẹmwẹ ọnrẹn sẹ gha die uhunmwu otagbọn na. Vbọzẹ? Ọkpa vbe usun emwi nọ ya e Jesu gha die agbọn na ọre nọ do miẹn emwa nagbọn fan vbe obọ orukhọ kevbe uwu, nọ vbe wabọ ẹre rua ọlọghọmwa hia fẹẹrẹ ne Esu he si. (Jọn 3:16; 1 Jọn 3:8) E Jehova vbe rẹn wẹẹ, emwi hia ne Jesu gha werriẹ aro daa vbe agbọn na gha yae gha re Ogie Ohẹn nọ mwẹ ẹnina. Jesu keghi suẹn gha ga zẹvbe Ogie Ohẹn vbe ọ ghi dinmwiamẹ nẹ vbe ukpo 29 C.E.a

² Vbe ako iruẹmwi na, ma gha guan kaẹn vbene emwi ne Jesu werriẹ aro daa ya ru iyobọ nẹẹn ya do gha re Ogie Ohẹn nọ mwẹ ẹnina. Ma gha hia ne ima rẹn otọ vbene Jesu ya “khian ọmwa ne emwi hia gba na” vbe iwinna Ogie Ohẹn na, ọ gha ru iyobọ ne ima ya gha na erhunmwu gie Jehova, ọ gha khọnrẹn wẹẹ, egbe wọọ ima rhunmwuda abakuru ọghe ima.​—Tie Hibru 5:​7-9.

OVBI OSANOBUA NỌ HOẸMWẸ ỌNRẸN KEGHA DIE AGBỌN NA

3-4. De vbene ẹdagbọn Jesu ya fi werriẹ hẹ vbe ọ ghi gha die agbọn na?

³ Ma ni bun miẹn afiwerriẹ eso nẹ vbe ẹdagbọn ima, vbe na ghee na si kpa hin owa rre gha rrie ihe ọvbehe, a ghi sẹ ẹgbẹe kevbe avbe ọse rae. Avbe afiwerriẹ vbenian i zẹdẹ khuẹrhẹ. Sokpan, orhunmwu ọkpa i rrọọ nọ he ru egbe afiwerriẹ ne Jesu ru. Vbe Jesu rre ẹrinmwi, irẹn ẹre ọ ghaa re odibosa nọ ghi yo sẹ vbe uwu avbe odibosa nikẹre. E Jehova hoẹmwẹ ọnrẹn ẹ i re nekherhe, erriọ ẹre Jesu vbe ya gha ghọghọ vbe ẹghẹ hia zẹvbe nọ ya gha deba Osanobua winna. (Psm 16:11; Itan 8:30) Ọrheyerriọ, ebe Filipai 2:7 khare wẹẹ “ọ keghi sẹ emwi hia nọ mwẹ rae,” ọ na sẹ ukpo nọ yo nọ ghaa ye vbe ẹrinmwi rae, ọ na do gha gu emwa nagbọn ni ma gba rre uhunmwu otagbọn na.

⁴ Gi ima vbe guan kaẹn vbene emwi ghaa ye Jesu hẹ vbe a da biẹ ọre kevbe vbe ọ waan dee. Ivbiogue ẹre ẹgbẹe Jesu ghaa khin, emwi nọ ya ima rẹn ọnọna ọre aro izọese ne evbibiẹ ọre ru vbe a da biẹ ọre. (Lẹv 12:8; Luk 2:24) Vbe Ọba ighẹ e Hẹrọd ghi họn we a biẹ Jesu, ọ na gha hoo nọ gbe ẹre rua. Ne obọ e Hẹrọd ghẹ mieke na vba e Jesu, ẹgbẹe Jesu keghi lẹẹ gha rrie Igipt vbe ẹghẹ eso. (Mat 2:​13, 15) Te ẹdagbọn Jesu vbe agbọn na wa gele lughaẹn ne vbene emwi ghaa ye hẹ nẹẹn vbe ẹrinmwi!

5. De emwi eso ne aro Jesu sẹ vbe ọ rre agbọn na, kevbe wẹẹ, de vbene emwi nọ werriẹ aro daa ya mu ẹre egbe khẹ iwinna Ogie Ohẹn? (Vbe ya ghee efoto.)

⁵ Vbe Jesu rrie uhunmwu otagbọn na, ọ bẹghe vbene emwa ni bun ya gha sẹ usẹ hẹ. Ẹ i mwẹ emwa nọ hoẹmwẹ ọnrẹn ma wu, uhiẹn, ọ khọ wẹẹ, erhae ighẹ e Josẹf vbe gha rre usun emwa ni wu. Vbe uwu ẹghẹ ne Jesu ya gha ru iwinna ọghẹe vbe agbọn na, ọ dekun emwa ni khuọnmwi emianmwẹ oti, emwa nẹi sẹtin khian, kevbe evbibiẹ emọ ne ivbi iran wu, te Jesu wa gha mwẹ ẹnina daa iran na. (Mat 9:​2, 6; 15:30; 20:34; Mak 1:​40, 41; Luk 7:13) Ẹmwata nọ rrọọ ọre wẹẹ, vbe Jesu rre ẹrinmwi, ọ ka bẹghe emwa ni sẹ usẹ. Sokpan vbe irẹn ghi gha die uhunmwu otagbọn na zẹvbe ọmwa nagbọn, ọ na ghi gele do rẹn obalọ ne usẹ si ye emwa egbe. (Aiz 53:4) Emwi ne Jesu miẹn vbe ọ rre agbọn na ẹre ọ ghi yae rẹn vbene emwi gele ye emwa nagbọn hẹ, ọlọghọmwa ne iran la gberra kevbe obalọ ne iran ye. Irẹn tobọ irẹn vbe werriẹ aro daa ọlọghọmwa ne emwa nagbọn werriẹ aro daa; ọ mwẹ ẹghẹ ne egbe ya wọọ ọre, ne osi ya gha si ẹre kevbe nọ ya gha khiẹ.

TE JESU WA GHA MWẸ AGIẸNGIẸN ỌMWA

6. De emwi ne ima miẹn ruẹ vbe igiemwi ne akhasẹ ighẹ Aizaia loo ro vbe nọ dekaẹn agiẹngiẹn ne Jesu mwẹ ne emwa? (Aizaia 42:3)

⁶ Vbe Jesu rre uhunmwu otagbọn na, te Jesu wa gha mwẹ agiẹngiẹn daa emwa na ya obọ dan mu. Te emwi ne Jesu ru na wa muẹn sẹ ẹmwẹ akhasẹ nọ rre Baibol. Vbe Abọ Ọghe Ebe Nọhuanrẹn Na Ya E Hibru Gbẹn, a keghi ya emwa ni fe gie avbe okperhan kevbe otọ nọ kakabọ maan emwiokọ. (Psm 92:12; Aiz 61:3; Jer 31:12) Sokpan, a na ya ivbiogue gie erhan nọ bi gọọ kevbe ukpa nọ baa muẹnmuẹn, ọna keghi re emwi eva ne agbọn ghee wẹẹ, ẹ i mwẹ emwi nọ gia ya ru. (Tie Aizaia 42:3; Mat 12:20) Orhiọn nọhuanrẹn keghi loo akhasẹ ighẹ Aizaia ya ru avbe igiemwi na, nọ ya gie ẹre ahoẹmwọmwa kevbe ẹnina ne Jesu khian gha mwẹ daa emwa ne emwa ọvbehe ya aro tila rua.

7-8. De vbene Jesu ya mu ẹmwẹ akhasẹ ọghe Aizaia sẹ hẹ?

⁷ E Matiu nọ re ọkpa vbe usun emwa ni ta okha ọghe Jesu, gi ima rẹn wẹẹ, Jesu mu ẹmwẹ akhasẹ ọghe Aizaia sẹ, nọ khare wẹẹ: “Irẹn i khian bun ovbi erhan nọ bi gọọ, ẹ i khian vbe dọ ukpa nọ baa muẹnmuẹn yọ.” Emwa eso na ma gha ghee sẹ emwa ni yevbe erhan nọ bi gọọ ra emwa ne iro han rẹn ni yevbe ukpa nọ baa muẹnmuẹn nọ khian ghi dọyọ wa miẹn ere vbe emwi ọyunnuan ọghe Jesu. Ọkpa vbe usun emwa vbenian ọre okpia ọkpa ne emianmwẹ oti gba ẹre egbe hia. A sẹtin miẹn wẹẹ, okpia na ma ghi te ya aro yọ wẹẹ, a gha sẹtin mu irẹn egbe rran, amaiwẹ irẹn gha do sẹtin ya egbe rhorho emwa rẹn vbe uwu ẹgbẹe kevbe avbe ọsiọre? (Luk 5:​12, 13) Okpia ọkpa vbe gha rrọọ nọ re ayenhọ, nẹi vbe sẹtin guan ẹse. Gele muẹn roro vbe nọ khian gha ye ẹre hẹ vbe ọ gha bẹghe emwa we iran gu egbe guan, sokpan ẹ i họn ẹmwẹ ne iran ta. (Mak 7:​32, 33) Sokpan, ọ ma fo ye evba.

⁸ Vbe ẹghẹ Jesu, te Ivbi e Ju ni bun wa yayi wẹẹ, orukhọ ne ọmwa ru ra ne evbibiẹ ọre ru ẹre ọ yae rri oya. (Jọn 9:2) Rhunmwuda iyayi nọ ma gba na, te emwa wa mobọ gha ya obọ dan mu emwa ne egbe ma gba na. E Jesu keghi mu emwa vbenian egbe rran, iran na vbe do mu ẹtin yan Osanobua, te emwi ne Jesu ru na mu ẹmwẹ akhasẹ ọghe Aizaia sẹ. De emwi ne ọna ma ima re?

9. De vbene ebe Hibru 4:​15, 16 ya rhie ẹre ma wẹẹ, Ogie Ohẹn nọ gele mwẹ ẹnina ẹre ima ne emwa nagbọn ni ma gba mwẹ?

⁹ Tie Hibru 4:​15, 16. Ma mwẹ ilẹkẹtin wẹẹ, Jesu mwẹ ẹnina daa ima vbe ẹghẹ hia. Vbe a ya ọna kha? Ọmwa nọ mwẹ ẹnina gha bẹghe ọmwa nọ sẹ usẹ ohan rẹn ghi to ẹre ẹsẹse. Emwi ne ẹmwẹ Grik na ke zedu “ẹnina ọmwa” demu ọre na hia na rẹn vbene emwi ye ọmwa ọvbehe hẹ, sẹrriọ wẹẹ, ọ ghi yevbe na miẹn wẹẹ, ma ẹre emwi nii sunu daa. (Vbe ya ghee Hibru 10:​34, e Pọl vbe loo ẹmwẹ Grik na vbe ako na.) Emwi ọyunnuan ne Jesu ru wa ya ima rẹn wẹẹ, e Jesu gele wa gha mwẹ ẹnina daa emwa ni sẹ usẹ. Ọ ma wa gha mu emwa egbe rran rhunmwuda wẹẹ, emwi nọ khẹke nọ ru nọ. Te ọ wa gele hoẹmwẹ iran, ọ vbe gha hoo nọ ru iyobọ ne iran. Vbe igiemwi, te Jesu gha te sẹtin ke urria mu okpia nii nọ khuọnmwi emianmwẹ oti egbe rran, nọghayayerriọ, ọ keghi tohan okpia na, ọ na ya obọ kaan rẹn, ọ gha kẹ, ke ukpo ni bun gha dee nian, ọmwa rhọkpa ma he ya obọ kaan rẹn! Jesu keghi mwẹ amuroro daa okpia na, ọ na rhie ẹre hin eke ne emwa na gbe owogho ye rre, ọ na ya fẹko mu ẹre egbe rran vbe eke ne emwa i ye. Vbe ẹghẹ ne Farisi ọkpa ya gha gbodan ghee okhuo ọkpa nọ roro iro fi uyinmwẹ werriẹ, nọ ya ameve ọghẹe kpe Jesu owẹ, ọ na vbe ya eto ẹre ka ẹre, Jesu keghi sinmwi oseghe nẹẹn. (Mat 8:3; Mak 7:33; Luk 7:44) Jesu ma lẹẹ ne emwa ne egbe ma gba na ra emwa ni ru orukhọ nọ wegbe. Nọghayayerriọ, ọ keghi si iran kẹ egbe, ọ na vbe rhie igiọdu ne iran. Ma gha vbe sẹtin gha mwẹ ilẹkẹtin wẹẹ, ọ wa vbe mwẹ ẹnina daa ima.

VBENE IMA KHIAN YA GHA YA EGBE TAA OGIE OHẸN ỌGHE IMA VBE ẸDẸNẸRẸ

10. De emwi eso ne ima gha ya sẹtin ru iyobọ ne avbe ayenhọ kevbe avbe arhuaro vbe ẹdẹnẹrẹ? (Vbe ya ghee avbe efoto.)

¹⁰ Zẹvbe erhuanegbe Jesu, gi ima gha ya egbe taa ẹre vbe odẹ ne ima ya rhie ahoẹmwọmwa ma kevbe odẹ ne ima ya mwẹ ẹnina kevbe amuroro daa emwa. (1 Pit 2:21; 3:8) Agharhemiẹn we ima i khian sẹtin mu avbe ayenhọ kevbe avbe arhuaro egbe rran, ma gha sẹtin ru iyobọ ne iran ya sikẹ e Jehova. Vbe igiemwi, u gha miẹn avbe vidio ọghomwa ni rhan otọ e Baibol vbe urhuẹvbo ekhakha ni gberra 100. Emwa nẹi bẹghe ẹse wa vbe miẹn ere vbe avbe ebe ọghomwa na ya e braille ru, ne avbe arhuaro gha sẹtin tie vbe urhuẹvbo nọ gberra 60, avbe rekọdi na na ta ẹmwẹ eso ya rhan otọ emwi nọ sunu vbe vidio vbe rrọọ vbe urhuẹvbo nọ gberra 100. Ena hia keghi ya avbe ayenhọ kevbe avbe arhuaro sikẹ e Jehova vbe Ovbi ẹre sayọ.

11. De vbene otu ọghe Jehova ya rhie ẹre ma wẹẹ, iran mwẹ ẹnina daa emwa hia vbe na ghee Jesu? (Iwinna 2:​5-7, 33) (Vbe ya ghee avbe efoto.)

¹¹ Otu e Jehova wa hia ne iran ru iyobọ ne emwa ni ke ehe ughughan rre. Yerre wẹẹ, vbe Jesu ghi rhiọ kpaegbe nẹ, ọ keghi tue orhiọn nọhuanrẹn yan erhuanegbe ẹre vbe ẹdẹ ugie Pẹntikọst ne emwa mieke na họn iyẹn nọ maan vbe ‘urhuẹvbo iran.’ (Tie Iwinna 2:​5-7, 33.) Otu e Jehova wa vbe lele igiemwi ọghe Jesu, iran keghi kpemehe emwi ughughan ni rhan otọ e Baibol vbe urhuẹvbo nọ gberra 1,000, ibozẹghẹ emwa ẹre ọ zẹ eso vbe uwu avbe urhuẹvbo na. Vbe igiemwi, ibozẹghẹ emwa ẹre ọ zẹ urhuẹvbo eso vbe North kevbe South America. Ọrheyerriọ, otu e Jehova keghi kpemehe avbe ebe kevbe vidio ọghomwa vbe urhuẹvbo ni gberra 160 vbe avbe urhuẹvbo na guan kaẹn na, ne emwa ni bun mieke na họn iyẹn nọ maan. Otu vbe kpemehe ebe kevbe vidio ọghomwa vbe urhuẹvbo nọ gberra 20 vbe ẹvbo ne Ivbi Roma zẹ. Emwa arriaisẹn ni bun ni zẹ avbe urhuẹvbo na vbe suẹn gha ga e Jehova nẹ.

12. De iyobọ ọvbehe ne otu e Jehova ru ne emwa?

¹² Otu e Jehova ẹre ọ siẹnro iwinna ikporhu iyẹn nọ maan nọ khian vbe uhunmwu otagbọn na, vbe deba ọni, iran vbe kpemehe emwi ne emwa ne odekun ẹrhia sunu daa gualọ. Rhunmwuda ọni, etẹn ni bun keghi rhiegbe ladian ne iran ya ru iyobọ ne etẹn iran nikpia kevbe nikhuo ni gualọ iyobọ. Otu e Jehova vbe bọlọ avbe owa ugamwẹ nọ ma kpọlọ gbe, ne emwa gha na sẹtin gha ga Osanobua, ne iran mieke na do ruẹ vbekpa ahoẹmwọmwa nọ mwẹ ne iran.

OGIE OHẸN ỌGHE IMA GHA SẸTIN RU IYOBỌ NUẸN

13. De odẹ eso ne Jesu ya ru iyobọ ne ima?

¹³ Ọsuohuan nọ maan ẹre Jesu khin, rhunmwuda ọni, ọ keghi hia nọ ru iyobọ ne edọmwadẹ ima ya sikẹ e Jehova sayọ. (Jọn 10:14; Ẹfis 4:7) Ugbẹnso, ọlọghọmwa ne ima ye sẹtin ya ima gha yevbe na ghee ukpa nọ baa muẹnmuẹn ra erhan nọ bi gọọ. Egbe sẹtin wa wọọ ima, rhunmwuda emianmwẹ nọ wegbe, abakuru ne ima ru ra ọ gha kẹ ma vbe etẹn gba mwẹ egbe ẹzọ. Ọ sẹtin gha lọghọ ne ima sẹtin zin egbe kevbe ne ima sẹtin rhie aro tua emwi ne ima ya aro yi. Yerre wẹẹ, Jesu rẹn emwi ne u la gberra, ọ vbe rẹn vbene emwi ye ruẹ hẹ. Ekhọe agiẹngiẹn ne Jesu mwẹ daa ruẹ ẹre ọ gua ẹre kpa ya ru iyobọ nuẹn. Vbe igiemwi, ọ gha sẹtin ya orhiọn nọhuanrẹn rhie ẹtin nuẹn vbe egbe gha wọọ ruẹ. (Jọn 16:7; Taitọs 3:6) Vbe deba ọni, Jesu gha sẹtin loo ‘ikpia na ya ru emwa ẹse’ kevbe etẹn ne ima gba ga ya rhie igiọdu nuẹn, ọ gha vbe sẹtin ya iran ru iyobọ nọ khẹke nuẹn.​—Ẹfis 4:8.

14. De emwi ne ima gha sẹtin ru vbe egbe gha wọọ ima?

¹⁴ Adeghẹ ẹtin na fo ruẹ, te ọ khẹke ne u yerre wẹẹ, Jesu ọre Ogie Ohẹn ọghe ima. Yerre wẹẹ, vbọ gberra wẹẹ, te Jehova gie ẹre gha die uhunmwu otagbọn na, nọ do ya arrọọ ọghẹe zọ ese ne ima, te ọ vbe gie ẹre gha dee nọ mieke na gele rẹn emwi ne emwa nagbọn la gberra. Iro gha han ima rhunmwuda orukhọ ne ima ru, e Jesu mu egbe nọ ya ru iyobọ ne ima “vbe ẹghẹ ne ima ya gualọe zẹẹ.”​—Hib 4:​15, 16.

15. Ya unu kaẹn igiemwi nọ rhie ẹre ma vbene a gha ya sẹtin ru iyobọ ne ọmwa nọ sẹ e Jehova rae ya dọlegbe bu e Jehova gha dee.

¹⁵ E Jesu vbe ru iyobọ ne emwa rẹn ya gualọ emwa ni sẹ e Jehova rae, na mieke na ru iyobọ ne iran ya dọlegbe bu e Jehova gha dee. (Mat 18:​12, 13) Gia guan kaẹn igiemwi ọghe Ọtẹn Nokpia Stefano.b Vbọ ghi rre ukpo 12 na ya rhie ẹre hin iko rre, ọ keghi rrie iko. Ọ khare wẹẹ “Ọ ma gha khuẹrhẹ mẹ, sokpan te I wa gha hoo ne I dọlegbe do gha re ọkpa vbe ẹgbẹe ọghe Jehova. Avbe ediọn ni do miẹn mwẹ keghi wa mu mwẹ orhiọn sẹ otọ. Ugbẹnso, I zẹdia roro ẹre wẹẹ, I i mwẹ esa ne I ye kevbe wẹẹ, esa i rrọọ ne I ya werriegbe bu e Jehova gha dee. Sokpan, avbe ediọn keghi rhie igiọdu mẹ, iran na gu mwẹ rẹn wẹẹ, e Jehova vbe Jesu ma hoo ne I gi egbe wọọ mwẹ. Vbe a ghi rhie mwẹ werriegbe, etẹn hia ni rre iko keghi ya ekhọe hia gbe ọbokhian ne imẹ vbe ẹgbẹe mwẹ. Vbene ẹghẹ ya khian ọvbokhan mwẹ na do suẹn gha ruẹ e Baibol, vbe na guan na te imẹ vbe ẹgbẹe mwẹ ghi ga e Jehova.” U miẹn vbene Ogie Ohẹn ọghe ima khian gha ghọghọ hẹ vbe ọ gha bẹghe ẹre wẹẹ, a ru iyobọ ne emwa ni roro iro fi uyinmwẹ werriẹ ya dọlegbe gha die iko ọghe Jehova!

16. Vbọzẹ ne u na ghọghọ we u mwẹ Ogie Ohẹn nọ mwẹ ẹnina?

¹⁶ Vbe Jesu rre uhunmwu otagbọn na, ọ keghi ru iyobọ ne emwa ni bun vbe ẹghẹ nọ khẹke. Vbe ẹdẹnẹrẹ, ma gha vbe sẹtin gha mwẹ ilẹkẹtin wẹẹ, ọ gha ru iyobọ ne ima vbe ẹghẹ ke ẹghẹ ne ima ya gualọ iyobọ. Vbe deba ọni, vbe nẹi khian ghi kpẹẹ gbe, vbe agbọn ọgbọn, ọ gha fan emwa nagbọn vbe obọ emwi hia ne orukhọ si, iran ghi vbe do gha re emwa ni gbae. Ma wa ya ekhọe hia kpọnmwẹ e Jehova, nọ na rhunmwuda ahoẹmwọmwa kevbe ekhọe itohan nọ mwẹ ne ima zẹ Ovbi ẹre nọ gha re Ogie Ohẹn ọghe ima nọ mwẹ ẹnina!