1 Samuẹl

24 E Sọl ghi ke ehe nọ na ya gu ivbi e Filistia gbinna rre, iran keghi tama rẹn wẹẹ, e Devid rre uwu ato ọghe Ẹngẹdi. 2 E Sọl keghi viọ ikpia arriaisẹn eha na zẹ vbe uwu ẹbu ivbi Izrẹl hia, ọ na suẹn ya gha gualọ e Devid vbe emwa rẹn, vbe odẹ ahọ ọghe Okuta Ẹwe Oha. 3 Ọ keghi do sẹ uvun okuta ọkpa nọ sikẹ ehe ne ohuan na rria vbe ọkpẹn odẹ, ọ na la uwu ẹre nọ ya ghughẹ. Na kha na, e Devid kevbe emwa rẹn rre uwu ẹre gbaan vbe ehe ne iran na lẹre. 4 Iran keghi tama e Devid wẹẹ, “Ẹghẹ ruẹ ọna khin na, e Jehova tama ruẹ wẹẹ, irẹn gha rhie eghian ruẹ yọ ruẹ obọ, u ghi ru ẹre emwi nọ rhirhi khọn ruẹ.” E Devid keghi baba gha khian, ọ na ya fian vbe ehọ ukpọn ọghe ẹwu e Sọl vbene Sọl ma na rẹn. 5 Sokpan, ekhọe e Devid keghi do gha fi ẹre asan, rhunmwuda nọ na fian vbe ehọ ukpọn ọghe ẹwu e Sọl. 6 Ọ keghi tama emwa rẹn wẹẹ, “E Jehova ghẹ gu mwẹ ru arowa mwẹ emwi rhọkpa, irẹn ọre ọmwa ne Jehova ma re ọba. Ọ ma kei ne I ya obọ kan rẹn, rhunmwuda, ọba ne Jehova zẹ nọ.” 7 E Devid keghi ta ẹmwẹ na ma emwa rẹn, ne iran ghẹ mieke na dekun e Sọl. E Sọl keghi kpaegbe, ọ na ladian vbe uwu uvun, ọ na gha khian. 8 Ẹre Devid na lelẹe, ọ na da tie ẹre wẹẹ, “U gha tọ, u kpẹre Umogun!” E Sọl keghi fi egbe werriẹ, e Devid keghi vbokho uhunmwu rre tue ọre otuẹ ọghọ. 9 Ọ na tama rẹn wẹẹ, “Vbọzẹ ne u na zẹ ye iran re ighẹ emwa ni tama ruẹ wẹẹ, mẹ hoo ne I gbe ruẹ rua? 10 Wẹ gha tobọ ruẹ miẹn nian wẹẹ, te Jehova wa rhie ruẹ yọ mwẹ obọ ẹrẹna vbe uwu uvun okuta nii. Emwa mwẹ eso te we ne I gbe ruẹ rua sokpan, ohan ruẹ keghi to mwẹ, I na wẹẹ, I i ya obọ kaan ruẹ hiehie rhunmwuda, wẹ ọre ọmwa ne Jehova zẹ nọ gha re ọba. 12 E Jehova ẹre ọ khian bu ohiẹn nọ diyi vbe imẹ vbe ruẹ. Te ọ gha rria ruẹ ikhi ye emwi ne u ru mwẹ re na, rhunmwuda, mẹ i ra ya obọ mwẹ kaan ruẹ hiehie. 15 E Jehova gha bu ohiẹn, ọ gha ta nọ diyi vbe uwu ima. Te ọ gha guan ye ẹmwẹ na, ọ ghi degue mwẹ, ọ ghi miẹn mwẹ fan vbe ọbo ruẹ.” 17 Ẹre ọ na tama e Devid wẹẹ, “Wẹ ẹre ọ rri ase, mẹ ẹre ọ ru khọọ. Te uwẹ wa gha maan mẹ, vbene imẹ na gha ru ruẹ khọọ. 18 U rhie ma mwẹ ẹdẹnẹrẹ na vbene ekhọe ruẹ maan ghee mwẹ hẹ, rhunmwuda, u ma gbe mwẹ rua vbe Jehova rhie mwẹ yọ ruẹ obọ. 19 A vbe miẹn wẹẹ, obọ ọmwa gha vba oghian rẹn, ọ zẹ ọre obọ nọ gha rrie, vbe nẹi na ru ẹre emwi rhọkpa ra? Te Jehova gha fiangbuẹ ye emwi ne u ru mẹ vbe ẹrẹna! 20 Banbanna nian, aro mwẹ dae nẹ wẹẹ u gha rri ọba vbe Izrẹl kevbe wẹẹ arriọba na gha wa gha rre obọ ruẹ khian. 21 Ya eni e Jehova yan ma mwẹ wẹẹ, u gha sẹ ivbi mwẹ rae ye agbọn, na ghẹ miẹn wẹẹ eni mwẹ kevbe eni ẹgbẹe mwẹ wa gbẹro.” 22 E Devid keghi ru eyan wẹẹ, irẹn gha ru vberriọ. Ẹre Sọl na gha rrie owa, e Devid kevbe emwa rẹn kegha rrie ehe ne iran lẹre yi.