1 Samuẹl
17 E Jonatan keghi tama rẹn wẹẹ, “Ghẹ gi ohan muẹn, e Sọl ne erha mwẹ i ra sẹtin ru ruẹ emwi rhọkpa, u gha rri ọba vbe Izrẹl, mẹ ghi gha re nọ zẹ diake uwẹ zẹvbe ne erha mwẹ tobọ ẹre wa vbe rẹn ẹsẹse.” 24 Ẹre iran na werriegbe, iran na karo ne Sọl gha rrie Zif. E Devid kevbe emwa rẹn kegha rre uwu ato ọghe Meọn, nọ rre Arabah vbe odẹ ahọ ọghe Jẹshimọn. 25 E Sọl kevbe emwa rẹn keghi ladian ya gha gualọ e Devid khian. Sokpan, vbe Devid ghi họn, ọ na gha rrie iya okuta nọ rre ato ọghe Meọn, ọ na ya gha rre evba. E Sọl ghi họn, ọ na gha gualọ e Devid khian. 26 E Sọl kevbe emwa rẹn kegha rre obọkpa ọghe nene oke, vbene Devid kevbe emwa rẹn na gha rre obọ nọkpa. Iran keghi yẹn owẹ ye okhian ne iran lẹẹ fe Sọl kevbe emwa rẹn, rhunmwuda e Sọl vbe emwa rẹn kakabọ sikẹ e Devid kevbe emwa rẹn nẹ, ọ kẹ kherhe ne obọ iran vba iran. 27 Vbe uwu ẹghẹ nii zẹẹ, iran keghi gie do tama e Sọl wẹẹ, “Dọlegbe gha dee ẹgiẹgiẹ! Ivbi e Filistia mu okuo rri ẹvbo!” 28 Ẹre Sọl ghi na da obọ e Devid nọ khu khian yi, ọ na ya gu ivbi e Filistia gha gbinna. Ọna ẹre ọ si ẹre ne a na tie evba nii Oke Iwannegbe. 29 E Devid keghi kpa gha rrie avbe eke nọ lọghọ a ke sẹ, vbe otọ Ẹngẹdi, ọ na ya lẹre ye evba.