1 Samuẹl
22 E Devid keghi lẹẹ hin e Gat rre, ọ na ya lẹre ye uvun okuta ọkpa vbe ọkpẹn Adulam. Avbe etiọnrẹn kevbe emwa ẹgbẹe ọre nekpa ghi họn wẹẹ ọ rre evba, iran keghi ya deba ẹre. 2 Emwa hia fẹẹrẹ na ghi zẹ ọre owẹ kevbe nọ de fi osa kevbe ne ẹkun ma sẹ ọre otọ, keghi bu ẹre gha khian, irẹn kegha re ọkaolotu iran. Iran keghi re ikpia uri eva (400). 3 E Devid keghi ke evba kpa gha rrie Mizpa vbe Moab, ọ keghi tama ọba e Moab wẹẹ: “Lahọ gie erha mwẹ kevbe iye mwẹ do tota ke ruẹ I te do rẹn emwi ne Osanobua khian ru mẹ.” 4 Ẹre Devid na sẹ evbibiẹ ọre rae ye owa ọba ọghe Moab, iran kegha rre evba vbe uwu ẹghẹ ne Devid ya lẹre ye uvun okuta. 5 E Gad ne akhasẹ keghi bu e Devid gha dee, ọ tama rẹn wẹẹ, “Ghẹ ghi di emwa ya, gha rrie otọ e Juda ọwarọkpa.” Ẹre Devid na kpa, ọ na gha rrie ẹgbo Hẹrẹt. 6 E Sọl kegha rre Gibea vbe ẹdẹ ọkpa, ọ na tota ye ototọ erhan tamarisk vbe uhunmwu oke, asoro ẹre kevbe gu ẹre vbe obọ. Emwa rẹn hia na mudia lẹga ẹre. Iran keghi tama rẹn wẹẹ, a rẹn ehe ne Devid kevbe emwa rẹn ye nẹ. 7 E Sọl keghi tama eguọmwadia ẹre hia wẹẹ, “Wa danmwehọ, wa ne ivbi e Bẹnjamin, te uwa roro ighẹ e Devid gha mu ugbo azara ne uwa, ọ ghi vbe ma uwa ọkaokuo nekherhe kevbe nekhua vbe uwu ivbiyoko ẹre ra? 8 Ọni ẹre ọ si ẹre ne uwa na gualọ odẹ ne uwa gha la mwẹ re ra? A ma miẹn orhiọnkpa vbe uwu uwa nọ tama mwẹ wẹẹ ovbi mwẹ kevbe Devid gba vẹn ihẹn ne egbe nẹ. A i vbe miẹn orhiọnkpa ne ẹmwẹ mwẹ da, ra nọ vbe tama mwẹ wẹẹ e Devid nọ re ọkpa vbe uwu emwa mwẹ gualọ odẹ nọ gha na gbe mwẹ rua kevbe wẹẹ ovbi mwẹ vbe ye ẹre ike!” 9 E Doẹg ne ovbi ẹvbo Idọm wa mudia ke emwa ọghe Sọl vbe ẹghẹ na kha na, ọ keghi kha wẹẹ, “I miẹn e Devid vbe ọ la ọghe Ahimẹlẹk ne ovbi Ahitub, vbe Nọb. 10 Ahimẹlẹk keghi nọ e Jehova emwi ne Devid gha ru, iyeke ọni, ọ keghi viọ evbare ne Devid, deba umozo ọghe Golaiat ne ovbi e Filistia.” 11 Ẹre Sọl ne ọba na gie na tie Ahimẹlẹk ne ohẹn, kẹ kevbe emwa rẹn hia ni vbe re ohẹn vbe igiowa ọghe erhae vbe Nọb, iran keghi bu ẹre gha dee.