1 Samuẹl

18 Ugbẹnvbe Sọl vbe Devid ghi gba guan nẹ, e Jonatan vbe Devid keghi do khian ọse ne kankankan, e Jonatan keghi do hoẹmwẹ e Devid vbene ọ hoẹmwẹ egbe ẹre. 5 E Devid keghi wa gha mwẹ adogbannọ vbe uhunmwu hia ne Sọl gie ẹre re, e Sọl keghi rhunmwuda ọni ya ẹre ru ọkaolotu ọghe ivbiyokuo ẹre. Ọna keghi wa yẹẹ emwa ọghe Sọl kevbe avbe ọkaolotu ẹre hia. 6 E Devid kevbe iran nikẹre gha ghi ke eke ne iran na ya gbele ivbi e Filistia rre nẹ, ikhuo ghi wa ke okpẹvbo hia ni rre otọ Izrẹl ladian bu e Sọl sẹ odẹ. Iran ghi gha so ihuan oghọghọ, iran ghi gha ku, iran ghi vbe gha kpe ukusẹ kevbe ẹgogo. 7 Vbe ehe ne iran na ku nii, ikhuo nii ghi gha so ihuan wẹẹ: “E Sọl gbele avbe arriaisẹn, sokpan e Devid avbe arriaisẹn vbe ihe igbigbe.” 14 E Devid kegha mwẹ adogbannọ vbe emwi nọ ru hia rhunmwuda, e Jehova ghaa gu ẹre rrọọ. 22 E Sọl keghi tama avbe eguọmwadia ẹre wẹẹ: “Uwa hẹko tama e Devid wẹẹ, ‘Ẹko ruẹ wa rhiẹnrhiẹn ọba, avbe ẹwae ẹre hia wa vbe hoẹmwẹ ruẹ, ẹghẹ nọ kere ne u ya rhie ovbi ẹre rọnmwẹ ẹre ọna khin.’” 23 Avbe eguọmwadia ọghe Sọl ghi ta ẹmwẹ na ma e Devid, e Devid keghi kha wẹẹ: “Uyi nọkhua wa nọ ne ọmwa gha re orruan ọba, ọ kpọlọ sẹ ovbiogue kevbe ovbi evbamarẹn zẹvbe ne imẹ ye na.” 25 E Sọl keghi kha wẹẹ: “Ọna ọre emwi ne uwa gha tama e Devid, ‘Emwi ne ọba hoo vbe obọ ruẹ ma gberra ukpikolo ọghe ivbi e Filistin iyisẹn ni wulo nẹ, nọ ya ọni rria avbe eghian rẹn ikhi.” (Erriọ ọre Sọl te mwamwaẹn, ne obọ ivbi e Filistia mieke na vba e Devid). 26 Ẹre eguọmwadia e Sọl na ya tama e Devid vbene Sọl kha hẹ, ẹko e Devid na rhiẹnrhiẹn yọ wẹẹ irẹn gha do gha re orruan ọba. Ọ ghi te sẹ ẹghẹ na bu yọ, 27 E Devid kevbe emwa rẹn keghi ya gbele ivbi e Filistia uri. Ọ keghi viọ ukpikolo iran, ọ na ya kae ye otọ vbe odaro ọba, nọ miẹn ehe na gha re orruan rẹn. Ẹre Sọl na rhie Mikal ne ovbi ẹre ne Devid rhie rọnmwẹ. 28 E Sọl keghi do bẹghe ẹre wẹẹ, e Jehova gu e Devid rrọọ kevbe wẹẹ, e Mikal ne ovbi irẹn hoẹmwẹ ọnrẹn. 29 Rhunmwuda ọni, ohan e Devid keghi dọlegbe gha muẹn, ọ keghi wa ya eghian so ẹre vbe ẹdagbọn rẹn hia. 30 Avbe ọkaolotu ọghe ivbi e Filistia ghi gha mu okuo rre, sokpan, ẹghẹ hia ẹre obọ e Devid ya gha da otọ sẹ ivbiyokuo e Sọl nikẹre hia. Irẹn keghi do dọlegbe gha hin usi yọ.