1 Samuẹl

19 E Sọl keghi tama e Jonatan ne ovbi ẹre kevbe avbe ivbiyokuo ẹre wẹẹ, irẹn hoo ne irẹn gbe Devid rua. 2 Sokpan, e Jonatan keghi hoẹmwẹ e Devid ẹsẹse. Rhunmwuda ọni, ọ keghi tama e Devid wẹẹ, “Erha mwẹ hoo nọ gbua. Rhunmwuda ọni, gha begbe vbe ẹdẹ gha gbe, u ghi ya lẹre ye ẹkhokho ọkpa. 3 I gha yo uwu oha ne u lẹre yi, ne l ya gu erha mwẹ guan vbekpa ruẹ. l gha miẹn uhunmwu ẹmwẹ, I gha do tama ruẹ.” 4 E Jonatan keghi tian e Devid ma e Sọl wẹẹ: “Dọmọ o, ghẹ ru e Devid ne ọguọmwadia ruẹ emwi nọ ma gba, ọ ma he ru emwi nọ ma gba daa ruẹ ẹdẹ, sokpan, emwi nọ he ru hia, nọ rhie ere nọkhua gie ruẹ ẹre ehia khin. 5 Ọ rhie uhunmwu ẹnrẹn mwẹ atataobọ ya gbe ovbi e Filisita nii rua, e Jehova keghi khọn okuo akhọnmiotọ nọkhua ne Izrẹl. Uwẹ miẹn ọnrẹn, ọ keghi ya ẹko rhiẹnrhiẹn ruẹ. Vbọzẹ ne u gha na ru ọmwa nọ ma rukhọ, emwi nọ ma gba, ne u gha na gbe Devid rua vbe nẹi na mwẹ emwi nọ zẹe hiehiere?” 6 E Sọl keghi danmwehọ ẹmwẹ ne Jonatan tae, ọ keghi vẹn ihẹn vbe eni e Jehova wẹẹ: “Ai ra gbe Devid rua.” 7 Iyeke ọni, e Jonatan keghi tie Devid, ọ na na iyẹn emwi hia ma rẹn, irẹn keghi rhie ẹre bu e Sọl gha khian, ọ na vbe ya gha ga ọba vbene ọ ka ru ẹre dee yi. 23 Vbe ẹghẹ ne Sọl na gha ke evba nii rrie Naiọt nọ rre Rama, orhiọn ọghe Osanobua keghi suẹn gha loo ẹre, ọ na gha yin vbe na ghee akhasẹ zẹvbe nọ ya khian nii, erriọ ẹre ọ ru ẹre ya sẹ ẹghẹ nọ ya la e Naiọt vbe Rama. 24 Ọ na bannọ ukpọn kua, ọ na suẹn gha yin vbe na ghee akhasẹ vbe odaro e Samuẹl, ọ na lovbiẹ vbe irhunmwirhun vbe avan nii hia, kevbe asọn nii hia. Erriọ ẹre itan na ya suẹn wẹẹ: “Akhasẹ ẹre Sọl ghi khin ra?”