1 Samuẹl
16 E Jehova keghi tama e Samuẹl wẹẹ, “Inu ẹghẹ u ra khiẹ e Sọl la yi? Mẹ rhie ẹre hin ọba Izrẹl rre nẹ. Sa ẹvbi ọliv eso rhie mwẹ obọ. I gha gie ruẹ gha rrie ọghe Jese nọ rre Bẹtlẹhẹm, rhunmwuda, I zẹ ọkpa vbe uwu ivbi ẹre nẹ nọ rri ọba.” 2 Sokpan e Samuẹl keghi nọọn wẹẹ, “Vbia khian ya ru emwi vberriọ hẹ? E Sọl gha họn, te ọ gbe mwẹ rua!” E Jehova keghi wanniẹn wẹẹ: “Mu ovbi ẹkhuia ẹmila mwẹ obọ, u ghi wẹẹ, ‘Te I rre do zọ ese gie Jehova.’ 3 Tie Jese gha die izọese na, I gha tama ruẹ emwi ne u gha ru. Ọmwa ne I khian gie ma ruẹ, u ghi ma ẹre ọba.” 4 E Samuẹl keghi ru zẹ vbene Jehova wẹẹ nọ ru. Ọ ghi sẹ e Bẹtlẹhẹm. Avbe ọkaolotu ẹvbo nii keghi rre do vba ẹre vbene iran na guọ zẹzẹzẹ, iran nọ rẹn wẹẹ, “Adeghẹ okhian maan?” 5 Irẹn keghi wanniẹn wẹẹ, “Ẹn, te I rre do zọ ese gie Jehova. Wa họnmwẹ egbe ne uwa bu mwẹ gha dee.” Ọ keghi vbe wẹẹ ne Jese kevbe ivbi ẹre họnmwẹ egbe, ọ na wẹẹ ne iran vbe gha die ehe izọese nii. 6 Iran ghi rre nẹ, e Samuẹl keghi dẹghe Eliab, ọ na ya ekhọe ẹre kha wẹẹ, “Ọmwa na nọ mudia ye odaro e Jehova na, ọrọre ọmwa nọ zẹ.” 7 Sokpan, e Jehova tama rẹn wẹẹ, “Ghẹ ghee ẹre we ọ taẹn ra we ọ mose, mẹ he ẹre nẹ, rhunmwuda, ẹ i re vbene ọmwa nagbọn ghee emwi ẹre Osanobua ghee ẹre. Agbọn ghee ikpakpa, sokpan, ekhọe ẹre Jehova ghee.” 8 Ẹre Jese na tie Abinadab ne ovbi ẹre, ọ na rhie ẹre bu e Samuẹl gha dee. Sokpan, e Samuẹl wanniẹn wẹẹ, “Ẹn o, e Jehova ma vbe zẹ ọna.” 9 Ẹre Jese na vbe rhie Siama rre. E Samuẹl keghi vbe kha wẹẹ, “E Jehova ma vbe zẹ ọna.” 10 Erriọ ẹre Jese ya viọ ihinrọn vbe uwu avbe ivbi ẹre bu e Samuẹl rre. Sokpan e Samuẹl keghi tama rẹn wẹẹ, “Ne Jehova zẹ i rre uwu iran na rhọkpa.” 11 Ọ keghi nọ rẹn wẹẹ, “U ye mwẹ emọ ikpia ọvbehe ra?” E Jese keghi wanniẹn wẹẹ, “Ne ọvbokhan nọ rrọọ, ẹre ọ ghi kẹ sokpan, ọ rre ehe nọ na su ohuan.” E Samuẹl keghi kha wẹẹ, “Ya tie ẹre rre, ma i khian tota rri evbare vbe ẹi re te ọ rre nẹ.” 12 Ẹre Jese na gie na ya tie ẹre rre. Irẹn kegha re igbama nọ mose ẹsẹse kevbe ne egbe vbe rran, kevbe ne aro ọre fi wainwain. E Jehova keghi tama e Samuẹl wẹẹ, “Ọna nọ, ma ẹre ọba!” 13 E Samuẹl keghi mu ẹvbi ọliv nii, ọ keghi sirra etiọnrẹn hia nọnọ ori ye ọre uhunmwu. Orhiọn e Jehova na hin yan e Devid vbe ọwarọkpa nii, ọ na vbe guẹe gha rrọọ ke ẹghẹ nii kpa. Ẹre Samuẹl na gha rrie Rama. 14 Orhiọn ọghe Jehova keghi kpa sẹ e Sọl rae, orhiọn dan ne Jehova gie rre keghi do gha muẹn rueghe. 18 Ọkpa vbe uwu iran ni mudia ke ẹre keghi kha wẹẹ, “E Jese ne Ovbi e Bẹtlẹhẹm mwẹ ọmọ okpia ọkpa nọ wa guara kpe akpata. Ọmwa nọ din wa nọ, ovbiyokuo ẹmwata, ọmwa ne ẹmwẹ ma ẹre unu, kevbe nọ mose. E Jehova gu ẹre rrọọ.” 19 Ẹre Sọl na gie emwa ya tama e Jese wẹẹ, “Gie ovbuẹ ighẹ e Devid ne ọsuohuan bu mwẹ gha dee.”