1 Samuẹl

15 E Samuẹl keghi tama e Sọl wẹẹ, “Mẹ ẹre Jehova gie nọ ma uwẹ ọba ọghe ivbi Izrẹl ne emwa rẹn. Banbanna nian, danmwehọ ẹmwẹ ne Jehova khare. 2 E Jehova ne Osa ọghe ivbiyokuo khare wẹẹ: ‘I gha rri ivbi Amalẹk oya rhunmwuda, avbe erha iran odede mu aro igbinna da ivbi Izrẹl vbe ẹghẹ ne iran na gha ke otọ Igipt dee. 3 Gha khian, ya dekun ivbi Amalẹk khọn, ne uwa fuẹn emwi hia ne iran mwẹ rua fẹẹrẹ. Ghẹ sẹ emwi ọkpa rae, wa gbele ehia rua, ikpia, ikhuo, ibiẹka, emọ obọ, ẹmila, ohuan, e kamẹl kevbe ekẹtẹkẹtẹ.’” 4 E Sọl keghi tie iyokuo ẹre si koko, ọ keghi ghee iran ghee vbe Tẹlẹm. Ivbiyokuo ni ke Izrẹl rre kegha re arriaisẹn uri (200,000) iran ni ke Juda rre kegha re arriaisẹn igbe (10,000). 5 Ẹre Sọl vbe emwa rẹn na gha rrie Amalẹk, iran na ya rhuẹ khẹ iran vbe uwu iya ẹzẹ nọ kae. 6 Ọ keghi tama ivbi e Ken wẹẹ, “Uwa ladian ne uwa kpa sẹ ivbi Amalẹk rae, ne I ghẹ gbele uwa ba iran. Rhunmwuda, uwa mwẹ itohan ghee ivbi Izrẹl vbe ẹghẹ ne iran na gha ke Igipt dee.” Ẹre emwa Ken na kpa hin uwu ẹbu ivbi Amalẹk rre. 7 E Sọl keghi khọn ivbi Amalẹk mu otọ ke Havila kpa ya sẹ Siọ vbe ọlarre owẹn ọghe Igipt. 8 Ọ keghi mu Agag ne ọba ọghe Amalẹk oghunmwu kẹ kevbe ẹmwẹ ne unu. Sokpan ọ keghi gbele emwa nekpa hia rua. 9 E Sọl kevbe emwa rẹn keghi sẹ Agag rae ye agbọn, iran ma vbe gbele avbe ohuan ni maan sẹ, avbe ẹmila, avbe ivbi ẹkhuia ẹmila ni maan sẹ kevbe ivbi ohuan ra avbe emwi ọvbehe hia ni rhirhi gha maan. Sokpan, iran keghi fuẹn emwi hia ni kulo kevbe nẹi mwẹ evbọ gia ya ru hia rua. 10 E Jehova keghi tama e Samuẹl wẹẹ: 11 “Ọ da mwẹ ne I na ma e Sọl ọba, ọ fi iyeke gbe mwẹ nẹ, te ọ ghi rra uhi mwẹ.” Ohu keghi mu e Samuẹl, ọ na ya asọn nii hia rinmwian e Jehova. 12 Ẹdẹ ghi gbe vbe owiẹ nọ lelẹe, e Samuẹl keghi gua kpa nọ ya gualọ e Sọl. Ọ keghi họn wẹẹ e Sọl rrie ẹvbo na tie ẹre Kamẹl, ehe nọ na ma orrẹ ọkpa ne egbe ẹre, ọ vbe ke evba kpa gha rrie Gilgal nẹ. 13 E Samuẹl ghi miẹn Sọl, e Sọl keghi tama rẹn wẹẹ. “Te Jehova gha fiangbuẹ. I ru emwi ne Jehova khare nẹ.” 14 Sokpan e Samuẹl keghi nọ wẹẹ, “Vbọzẹ ne imẹ na ye họn utumwẹ ẹmila kevbe ọghe ohuan yi?” 15 E Sọl keghi wanniẹn wẹẹ, “Obọ ivbi Amalẹk ẹre emwa mwẹ na viọ ẹre. Iran viọ avbe ohuan kevbe ẹmila ni maan sẹ hin rre, ne iran ya zọ ese gie Jehova ne Osanobua ruẹ. Ma fuẹn eni ghi dekẹe hia rua fẹẹrẹ.” 16 E Samuẹl keghi tama rẹn wẹẹ, “Wa da obọ yi! I gha tama ruẹ ẹmwẹ ne Jehova tama mwẹ nasọn.” E Sọl keghi kha wẹẹ, “Tae ma mwẹ!” 22 E Samuẹl keghi kha wẹẹ, “De nọ yẹẹ e Jehova sẹ vbọ yi? A họn ẹmwẹ ra ese na zọ? A họn ẹmwẹ nẹẹn, ẹre ọ maan sẹ izọese, na vbe gha danmwehọ ọre, ẹre ọ maan sẹ ẹvbi ohuan. 23 Te ọmwa nọ sọtẹ vbe yevbe ọmwa nọ miẹn aro, kevbe wẹẹ deghẹ ọmwa na gha fian karo, te ọ vbe yevbe ọmwa nọ zẹ imamase kevbe nọ gho ẹbọ. Rhunmwuda ne u ma na rhie ẹmwẹ ọghe Jehova, irẹn rhie ruẹ hin ọba rre nẹ.” 24 Ẹre Sọl na ghi tama e Samuẹl wẹẹ, “I ru orukhọ nẹ, I ma rhie iyi ọghe Jehova kevbe ibude ne u rhie mẹ. Ohan avbe emwa mwẹ ẹre ọ ghaa mu mwẹ, I keghi ru vbene iran hoo.