Itan
26 Uyi na rhie ne akpa, te a muẹn rhia zẹvbe esia vbe ẹghẹ uyunmwu ra amẹ nọ rhọ vbe ẹghẹ emwiorhọ. 2 Ẹbọ na tie ne ọmwa i miẹn emwi ru uwẹ re sokpan a ma wẹ te u gele fidọn. Te iran yevbe ahianmwẹ ni tin gberra vbe ne iran i na vbe tin kan otọ. 3 Te a ya asan gbe ẹsin, te a rrọ ekagha ye ekẹtẹkẹtẹ unu, ugbemwẹ ẹre a gbe ọzuọ. 4 Ghẹ zẹ ewanniẹn ye inọta ne akpa nọ rẹn, nẹ ghẹ do yevbe na miẹn wẹẹ, ọkpa ẹre uwa eva ghi khin. 5 Zẹ ewanniẹn ye inọta ne akpa nọ rẹn, gi ẹre rẹn wẹẹ inọta oya ẹre ọ nọ rẹn, nọ mieke na rẹn wẹẹ, ẹwaẹn i gu irẹn. 6 U gha gie ọzuọ uhunmwu, u sẹtin wa vbe giagia owẹ ruẹ kua rhunmwuda, orueghe ẹre u gualọ. 7 Ọzuọ gha sẹtin loo itan na kpa zẹvbe ne uke gha sẹtin vbe ye owẹ ọre khian. 8 A gha rho ọmwa nọ re ọzuọ, te ọ yevbe na mu okuta gba ye umọvọn. 9 Ọzuọ gha kpa itan ne umẹwaẹn kpae, te ọ ye ọmwa rre vbene ọ ye hẹ vbe ọmwa ne ayọn gbe a gha zẹ igban hin obọ rre. 10 Ọmwa nọ viọ emwa la iwinna, nọ wa rhie ọzuọ nọ rhirhi a rre, te ọ ye egbe wọọ emwa hia nọ mwẹ obọ vbe iwinna nii. 11 Ọzuọ nọ yin uyinmwẹ akpa yan egbe yan egbe, te ọ yevbe ekita nọ vbe rri ekpa nọ kpae. 12 Ọzuọ nọ ghi wa kọn sẹ vbe ehia, ọ maan sẹ ọmwa nọ roro wẹẹ irẹn mwẹ ẹwaẹn gbe. 13 Obẹrure khare wẹẹ: “Oduma rre ode, oduma rre orere ẹvbo!” 14 Ọmwa obẹrure gha werriẹ yo werriẹ rre vbe ukpo ẹre, zẹvbe ne ẹkhu de yo de rre vbe olodo na gbae ginna. 15 Emwa eso mitan sẹrriọ wẹẹ ẹ i sẹtin ya obọ fian evbare rhie ye unu. 16 Ọmwa nọ re obẹrure keghi roro ẹre wẹẹ, irẹn mwẹ ẹwaẹn sẹ orhunmwu ihinrọn ni ya ẹwaẹn guan. 17 Ne ọmwa ya gha fi ukpẹ ye ẹmwẹ nọ ma kaan rẹn, te ọ yevbe ne ọmwa wa la orere, ọ na viọ ekita ehọ ya si ẹre kpa hin otọ rre. 18 Ọmwa nọ mu ogieva ẹre ru, ọ na wẹẹ ọdẹn irẹn gbe, 19 te ọ yevbe ọmwẹmwẹ nọ ye emwi nọ sẹtin kuan ọmwa ku. 20 Erhan gha fo vbe erhẹn, erhẹn ghi dọyọ, ewẹwẹwẹ gha fo vbe ẹzọ, ẹzọ ghi fo.