Itan
23 U gha tota ne u gu ọmwa kpataki rri evbare, ghẹ mianmian ọmwa ne irẹn khin. 2 Adeghẹ ohanmwẹ wa kakabọ gbuẹ, kuẹn egbe ruẹ rre. 3 Ghẹ fifi ye evbare nọ rhiẹnrhiẹn nọ viọ ye otọ, ughaghe te ọ hẹko rẹrẹ ruẹ. 4 Gi ẹwaẹn gba nuẹn sẹrriọ wẹẹ, u i khian wiẹn egbe ruẹ rua ighẹ te u gualọ ẹfe. 5 Igho ruẹ sẹtin wa ru gbee, vbene a miẹn wẹẹ te ọ zẹ ifuẹn, ọ na tin gha rrie zẹvbe oghohọn. 6 Ghẹ rri evbare vbe eteburu ọkhẹnemwidamwẹ ra ne u gha fifi ye evbare nọ rhiẹnrhiẹn nọ viọ ye otọ. 7 Ọ ghi kha wẹẹ, “Gele rri evbare.” Ọ ma sẹ otọ ẹko. Vbene irẹn ye, ẹre ọ vbe zẹ iro ghee. 8 Te u khian kpa evbare ne u re ladian, utianmwẹ ne u ghaa tian rẹn, te u ru ehia kua kẹkan. 9 Ghẹ gu ọzuọ zẹ iro agbọn, ẹ i zẹ yọ. 10 Ghẹ vbọ emwi na ya vin uwu nẹdẹ, ne u miehe na mu otọ ọmọ nẹi mwẹ erha. 11 E Jehova ọre olẹtin nọ gbinna ne iran, ọ gha guẹ gui ẹzọ iran. 12 Gha danmwehọ ọmwa nọ ma ruẹ emwi, ne u ruẹ emwi hia ne u gha sẹtin ruẹ. 13 Ghẹ kha wẹẹ, u i khian ghi gbe ọmọ hin ọkhọ rre. Ubi ẹmwata vbe ikebe i gbe ẹre rua. 14 Vbene ẹmwata, ọ gha sinmwi ẹre uhunmwu ye agbọn. 15 Ovbi mwẹ, ẹko gha rhiẹnrhiẹn mwẹ gbe adeghẹ u wan. 16 Egbe ghi gha mu mwẹ vbe I gha họn vbe ẹmwẹ ẹwaẹn ke unu ruẹ ladian. 17 Ghẹ gha gbọvo emwa ni ru orukhọ, sokpan gha mwẹ imuohan ọghe Jehova vbe ẹghẹ hia. 18 Ọ ghaa yerriọ, umamwẹ rre odaro khẹ ruẹ. 19 Danmwehọ ovbi mwẹ, gha wan, ne u vbe gha hannọ emwi ru. 20 Ghẹ gu iran ni da ayọn gbe egbe mu obọ, ra iran ni re gbe ẹko rua. 21 Avbe ọdayọn kevbe emwa oregbe, ogue ẹre iran khian gha ye. Adeghẹ u i miẹn emwi ne u rhie ru gberra ne u gha re kevbe ne u gha vbiẹ, osọnmwukpọn ẹre u khian do gha rhuan. 22 Danmwehọ ẹmwẹ ne erhaa tama ruẹ, adeghẹ ẹ i re irẹn, u i te gha rre agbọn na. Iyuẹ gha vbe khian ọmaẹn nẹ, ya obọ enọ rẹn ẹse muẹn. 23 Ha osa ye ẹmwata, ghẹ khiẹn ọnrẹn, Erriọ ẹwaẹn, iruẹmwi kevbe a rẹn otọ emwi vbe ye 24 Erha ọmwa ata wa mwẹ emwi nọ zẹe nọ gha na gha sọyẹnmwẹ. 25 Erhaa kevbe iyuẹ ghi gha sọyẹnmwẹ. Iye nọ biẹ ruẹ ghi vbe gha ghọghọ. 29 De ọmwa ne agbọn khan rẹn, nọ viẹ egbe ẹre, nọ si ẹti khian, kevbe nọ vian vbe ẹghẹ hia? De ọmwa ne aro ẹre vin rua kpan ran? De ọmwa ne ẹtẹ ihuaro gba ẹre egbe hia? 30 Iran ni da ayọn gbe egbe, ni danmwẹ ayọn na gua ẹre ghee. 31 Ghẹ gi ayọn viẹn yọ ruẹ aro, ọ gha khọnrẹn nọ ye yẹnghẹn vbe aro, nọ vbe gha fi wainwain vbe ukpu, ọ na ye vbẹkhẹẹ vbe ẹho. 32 Ẹdẹ gha gbe, ọ ghi do yevbe na miẹn wẹẹ ẹyẹn nọ mwẹ obi ẹre ọ saa. 33 Aro ruẹ ghi gha bẹghe otutu, u i ghi sẹtin roro emwi ẹse ra ne u guan ẹse. 34 Ọ ghi yevbe na miẹn wẹẹ, te u gua okọ ye uwu okun, ọ yevbe ọmwa nọ rre ukpẹ erhan nọ rre uhunmwu okọ. 35 U ghi do kha wẹẹ, “Te iran fi mwẹ emwi, te emwa eso koko gbe mwẹ, I ma ghi yerre. De ẹghẹ ne I khian ya rhiọrre? I ye hoo ne I da ayọn.”