Psalm
83 Osanobua, ghẹ hunwan; ghẹ mudia ye ihe ọkpa, ghẹ gbe ẹmwẹ. 2 Ghee! avbe eghian ruẹ si otighi, iran ni khuiwu ruẹ vbe sọtẹ. 3 Iran gha si uma ẹkhokho ga emwa ruẹ, iran gha khuan khẹ emwa ne uwẹ mudia na. 4 Iran khare wẹẹ, “Wa larre, wa gi ima guọghọ uhunmwu ẹvbo iran rua, na wa mianmian Izrẹl ẹdẹdẹmwẹdẹ.” 5 Iro ne iran zẹ gua egbe ro nẹ, iran ku obọ gbe mu aro daa ruẹ. 6 Ivbi Idọm kevbe Ismẹl, Ivbi e Moab kevbe Hagrit, 7 Ivbi e Gẹbal, Amọn kevbe Amalẹk, Filistia kevbe Taia. 8 Asiria vbe ya egbe ba iran, zẹvbe akuobọgbe ọghe Amọn, e Moab kevbe ivbi e Lọt. 9 Ru iran zẹvbe ne u ru Ivbi e Midian, kevbe Sisaria kevbe Jabin vbe Ẹzẹ e Kisọn. 10 U khọn iran mu otọ vbe Endọ, ikun iran keghi kẹkẹ yotọ. 11 Ru avbe ọkaolotu iran, zẹvbe ne u ru ghee Orẹb kevbe Zib, khọn iran ni kha yan iran, zẹvbe ne u ru e Zeba kevbe Zalmuna, 12 Iran ni khare wẹẹ, “Ma gha mu otọ nọ re ọghe Osanobua ya khian ọghe ima.” 13 Zagha iran kua zẹvbe ebe nọ kakae, ne ẹhoho hoho kua. 14 Zẹvbe ne erhẹn giẹn vbe uwu ẹgbo. Zẹvbe ne aranmwẹ erhẹn giẹn uhunmwu oke. 15 Ya okpẹhoho ruẹ khulo iran kua, ne u vbe ya ẹhoho ọhanabe ruẹ runran iran. 16 Ya ekhue gue iran aro Jehova, ne u gi iran miẹnkue wẹẹ, u mwẹ ẹtin. 17 Te obọ gha gba iran, ne iran vbe runran ẹdẹdẹmwẹdẹ. Uwu efaa ẹkẹkhẹrhẹ, ẹre iran gha wulo yi. 18 Te emwa hia gha rẹn wẹẹ, wẹ ne eni ẹnrẹn ọre Jehova, wẹ ọkpa ọre Nọ Yo Sẹ, vbe otagbọn hia fẹẹrẹ.