Psalm
84 A miẹn vbe ọgua Osa ruẹ yẹẹ mwẹ hẹ Jehova ne Osa ọghe ivbiyokuo! 2 Ghee vbene ọ khọn mwẹ hẹ ne I gha rre evba, ọ khọn mwẹ ẹsẹse, ne I gha rre ọgua Osa ọghe Jehova. Ekhọe mwẹ hia ẹre I ya so ihuan oghọghọ ghee Osanobua nọ rrọọ. 3 Avbe ahianmwẹ bọlọ oko, ivbialumẹ vbe mwẹ owa iran, iran viọ ivbi iran negiẹrẹ ye ọkpẹn ogiukpo ruẹ, e Jehova ne Osa ọghe ivbiyokuo, Ọba mwẹ kevbe Osanobua mwẹ. 4 Oghọghọ nọ ne iran ni rre uwu Ọgua Osa ruẹ, ni vbe so ihuan urhomwẹ ghee ruẹ vbe ẹghẹ hia. 5 Oghọghọ nọ ne iran ne ẹtin ẹnrẹn ke ehe ne u ye rre, nọ wa vbe bọbọ ẹre egbe nọ mu okhian gha rrie Oke Zaiọn. 6 Iran gha la iya e Baka nọ kae gberra, ọ ghi khian ẹzẹ nọ lẹ. Amẹ nọ ka rhọọ ghi ya ẹre vọn ne ọghọdọ. 7 Vbene iran ya nana sikẹ odaro, erriọ orhiọn ya la iran iwu. Iran gha miẹn Osanobua vbe Zaiọn. 8 Eo Jehova ne Osa ọghe ivbiyokuo, họn erhunmwu mwẹ; danmwehọ mwẹ, Osanobua e Jekọb. 9 Osanobua, fiangbe ọba mwa, Ọba ne uwẹ hannọ zẹ. 10 Ẹdẹ ọkpa na yae vbe ọgua Osa ruẹ, maan sẹ arriaisẹn na yae vbe ehe ọvbehe! I mudia ye onurho owa Osanobua mwẹ, ẹre ọ maan sẹ ne I gha rre uwu owa emwa dan. 11 Ovẹn kevbe ugue ẹre Jehova ne Osanobua mwa khin. Ọ keghi ya itohan kevbe ọghọ fiangbe emwa. Ẹ i gban emwi nọ maan rhọkpa, hin obọ iran ni ru vbe nọ kere rre. 12 Osa ne Oghodua, afiangbe ọre ọghe iran ni mu ẹtin yan ruẹ.