Psalm

74 Osanobua, vbọzẹ ne u na sẹ ima rae vbenian? U gha wa mu ohu ghee emwa ruẹ rhinrin ẹdẹ ra? 2 Ye avbe emwa ruẹ rre, ne u tobọ ruẹ zẹ ne egbuẹ, ke ẹghẹ nọ kpẹre gha dee, emwa ne uwẹ viọ ke uwu ọviẹn ladian ne iran do gha re ẹwae ruẹ. Ye Oke Zaiọn rre, ehe ne uwẹ ka dia yi. 3 Khian la emwi ni rẹnkhuan na gberra. Avbe eghian mwa rẹnkhẹn emwi ni rre ọgua Osa fo. 4 Avbe eghian ruẹ tu utumwẹ akhọnmiotọ vbe uwu ọgua Osa ruẹ. Iran ya mu afiala ọghe iran ye evba zẹvbe ama akhọnmiotọ. 5 lran yevbe emwa ni gia erhan, iran gha ya ughanmwa iran tọnnọ erhan kua. 6 Iran ya ughanmwa kevbe umọmọ iran, guọghọ avbe uhanhan erhan ni rrọọ. 7 Iran rhia ọgua Osa ruẹ rua, iran keghi mu erhẹn yọ, iran mu awua ye ehe na na ga ruẹ. 8 Iran kevbe ivbi iran kegha tae vbe ekhọe iran wẹẹ: “Te ọ khẹke na giẹn ehe hia na na ga Osanobua nẹ, vbe ẹvbo na mu otọ.” 9 Avbe emwi iruẹmwi ni huanrẹn hia, ne ima mwẹ fo, akhasẹ ma ghi vbe kẹ, orhiọnkpa nọ rẹn vbene ọna gha kpẹẹ sẹ hẹ vbe otọ i rrọọ. 10 Vbe avbe eghian mwa ra giẹ uwẹ kpẹẹ sẹ hẹ vbe otọ yi Nọyaẹnmwa? Iran gha kpa unu ghee eni ruẹ rhinrin ẹdẹ ra? 11 Vbọzẹ ne u na he ne u yi ima obọ yi? Vbua ghi na viọ obọ ghee odẹ iyeke hẹ yi? 12 Sokpan, ke omuhẹn gha dee, wẹ ọre Osanobua ima, ẹghẹ nibun ẹre u he na miẹn ima fan. 13 Ẹtin ruẹ nọkhua ẹre u ya wa okun ye ihe eva, u na salọ uhunmwu avbe ugbogiorinmwi ẹzẹ kua. 14 U guọghọ uhunmwu e Leviatan ne ugbogiorinmwi amẹ, u na ya ikun ẹnrẹn koko aranmwẹ ato. 15 U ru ẹre ne uhunmwu ẹzẹ kevbe ivbi ẹzẹ gha lẹẹ, u na vbe silo avbe ẹzẹ nikhua ka. 16 Wẹ ẹre ọ yi avan kevbe asọn, wẹ ẹre ọ mu owẹn kevbe uki ye ihe iran. 17 Wẹ ẹre ọ mwa ehe ne agbọn sẹ, wẹ ẹre ọ yi ẹghẹ owowo kevbe oni. 18 Sokpan yerre, Eo Jehova wẹẹ avbe eghian wa giọ kevbe wẹẹ iran ma rẹn ruẹ, iran vbe zaan ruẹ. 19 Ghẹ sẹ avbe emwa ruẹ ne ẹtin fo nẹ rae, ne eghian iran ne emwa dan. Ghẹ mianmian emwa ruẹ ne iran zẹ kpokpo. 20 Ye ile ne u gu ima ta rre. Uyinmwẹ ika wa rre ẹkhokho ni so ebiebi hia vbe otọ nii. 21 Ghẹ gi ekhue mu ọmwa na zẹ kpokpo, gi avbe ivbiogue kevbe emwa nẹi mwẹ, gha rho ruẹ. 22 Rhiọrre Osanobua, ne u khọn ekhae ne egbe ruẹ, yerre wẹẹ, avbe emwa ni ma rẹn ruẹ wa giẹ ruẹ ne ebi ro. 23 Ghẹ mianmian uvannọmwẹ ohu ọghe avbe eghian ruẹ, kevbe owogho nai na dobọ yi ne avbe eghian ruẹ gbe.