Psalm
61 Họn eve mwẹ Osanobua, rhie ehọ ye erhunmwu mwẹ. 2 I gha ke ehe ni ghi rree sẹ vbe agbọn na tu tie ruẹ, vbe I ghaa rre uwu akhiẹ. Gha su mwẹ khian, ne u vbe tọn mwẹ mu yan uhunmwu okuta nọ yo sẹ mwẹ. 3 Rhunmwuda, wẹ ẹre ọ degue mwẹ, Wẹ ọre owa ọkhẹ nọ wegbe nọ gbogba ga mwẹ vbe obọ eghian. 4 Gu mwẹ gha rre ibọkpọ ruẹ vbe ẹdagbọn mwẹ hia, gu mwẹ lẹẹ fe ye ototọ ifuẹn ruẹ. 5 Osanobua, wẹ họn eyan ne I yan rẹn nẹ, wẹ vbe rhie emwi nọ re ọghe iran ni ya ọghọ nuẹn, mẹ nẹ. 6 Fian ukpo nibun ba ẹdagbọn ọba, gi ẹre wa gha tọ khian rhinrin. 7 Gi ẹre gha khaevbisẹ sirra ruẹ ẹdẹdẹmwẹdẹ. Osanobua, gi ahoẹmwọmwa ruẹ nẹi beghe, kevbe aguobọmwa ruẹ degue ẹre. 8 Erriọ I gha so ihuan urhomwẹ ghee ruẹ, vbe I ghaa viọ emwi ne I ve ye urhu guẹ ẹdẹgbegbe.