Psalm

60 Osanobua, wẹ he ima nẹ, obọ ruẹ keghi vbe gba ima. U wa mu ohu ima sokpan, werriegbe bu ima rre nian. 2 U mu otọ nii rueghe, u keghi vbe fian uvun gbodoo yọ. Banbanna nian kpe ẹwẹn ọnrẹn rrie, rhunmwuda te ọ ghi ra zagha. 3 U gi avbe emwa ruẹ rri oya ẹsẹsẹmwẹse; te ima ghi ya owẹ ba otọ ku khian, vbe na ghee ọmwa ne ayọn gbe. 4 U bu iran ni ya ọghọ nuẹn ude, ne iran miehe na fe vbe obọ a bu ohiẹn gbe ọmwa. 5 Ya ẹtin ruẹ miẹn ima fan, họn erhunmwu ima, na miẹn ehe na dẹ emwa ne u hoẹmwẹ ọnrẹn werriegbe. 6 Osanobua guan ke uwu ehe nọhuanrẹn ọghẹe rre wẹẹ: “Vbe uwu akhọnmiotọ, I gha ghae Siẹkẹm, I gha vbe ghae Iya e Sukọt ne iran ne emwa mwẹ. 7 Ọghomwẹ ẹre Giliad khin, kevbe Manasẹ. Ifreim ọre ẹrhu mwẹ, e Juda ọre ọkpọ ọba mwẹ. 8 Sokpan I gha ya e Moab ru uwawa akhuẹ mwẹ, I gha vbe bannọ ibata mwẹ yan Idọm ne I ya rhie ma ighẹ mẹ ẹre ọ yan rẹn. Te avbe Filistin roro ighẹ iran gha wee uwemwẹ akhọnmiotọ yan mwẹ ra?” 9 De ọmwa nọ gha rhie mwẹ gha rrie ẹvbo na gbe odin ga nii? De ọmwa nọ gha ma mwẹ odẹ gha rrie Idọm? 10 Te u gele wa he ima yotọ ra? Wẹ i khian ghi lele iyokuo mwa ladian ra? 11 Yi ima obọ vbe uwu ọlọghọmwa ne ima ye; Imiẹnfan nọ ke obọ emwa nagbọn dee i mwẹ esa nọ ye. 12 Osanobua deba ima, ma gha khọnmiotọ, irẹn gha khọn avbe eghian ima.