Psalm
59 Osanobua mwẹ, miẹn mwẹ fan vbe obọ avbe eghian mwẹ, degue mwẹ hin obọ iran ni gu mwẹ gbinna. 2 Miẹn mwẹ fan vbe obọ avbe emwa dan nii, yuo mwẹ hin obọ avbe izigha nii rre! 3 Ghee! Iran ghae ye odẹ ne iran gbe mwẹ rua. Avbe emwa dan gha si uma ga mwẹ, ẹ i re rhunmwuda orukhọ, ra abakuru ne I ru. 4 Agharhemiẹn wẹẹ, I ma ru orukhọ, iran ru emwamwa ẹgiẹgiẹ ne iran khian ya gu mwẹ khọn. I gha tu tie ruẹ, u ghi kpaegbe ne u do ru iyobọ mẹ, ne u vbe ghee emwi nọ sunu. 5 Wẹ ne Jehova ne Osa ọghe ivbiyokuo, wẹ ọre Osanobua ọghe Izrẹl. Rhiọrre, ne u rri avbe agbẹnvbo ni ma yayi oya. Ghẹ tohan emwa dan ni ya ọmwa dẹ. 6 Iran ghi dọlegbe rre vbe ota, iran ghi gha gbọọ vbe na ghee awa, vbe iran ghaa la ẹvbo khian. 7 Gha họn vbene iran tie ihẹn hẹ kevbe vbene iran vbe yan hẹ. Aranmwẹ iran yevbe umozo vbe unu iran, rhunmwuda, te iran ye roro wẹẹ, ọmwa rhọkpa ma rẹn ne iran ye. 8 Sokpan, te uwẹ giẹ iran Jehova, te uwẹ ya iran ni ma yayi hia gbogiẹ. 9 I mu ẹtin yan ẹtin ruẹ Osanobua, wẹ ọre ugue mwẹ. 10 Osanobua mwẹ hoẹmwẹ mwẹ, ọ gha bu mwẹ rre, ọ gha gu mwẹ miẹn iyeke avbe eghian mwẹ. 11 Ghẹ gbele iran rua Osanobua, ne avbe emwa mwẹ ghẹ ya mianmian. Ya ẹtin ruẹ zagha iran rua, ne u khọn iran mutan, Eo Jehova ne ugue mwa. 12 Orukhọ rre aranmwẹ iran, orukhọ ẹre ẹmwẹ ne unu ọghe iran hia khin, te ifi itengbemu ọghe iran gha mu iran, rhunmwuda ne iran na tie ẹbọ, ne iran na vbe ta ohoghe. 13 Fuẹn iran rua vbe ohu ruẹ, wa fuẹn iran rua fẹẹrẹ, ẹghẹ nii, emwa hia ghi rẹn wẹẹ Osanobua ẹre ọ khaevbisẹ vbe Izrẹl kevbe wẹẹ asẹ ọghẹe gba otagbọn hia. 14 Avbe eghian mwẹ dọlegbe rre vbe ota, iran gha gbọọ vbe na ghee awa vbe iran la ẹvbo nii khian. 15 Gi iran gha rriarria gualọ evbare khian; ghẹ gi ẹko vuọn iran ra ne iran miẹn eke ne iran khian dia. 16 Sokpan, mẹ gha so ihuan ẹtin ruẹ. Owiẹ owiẹ, ẹre imẹ gha ya kakabọ so ihuan ahoẹmwọmwa ruẹ nẹi beghe. Wẹ ọre ugue nọ degue mwẹ, ehe ne I lẹre yi vbe ẹghẹ ibaro. 17 I gha rho ruẹ, wẹ nọ gbinna mẹ. Osanobua ọre ugue mwẹ, Osanobua nii nọ hoẹmwẹ mwẹ.