Psalm
37 Ghẹ si osi ba ẹmwẹ ọmwa dan, ghẹ ya aro ye emwi ọmwa nọ rra iyi. 2 A gha ho iran bẹkun ban, zẹvbe ebe nọ kakae. Iran gha wulo, zẹvbe irunmwu nọ luẹluẹ. 3 Mu ẹtin yan e Jehova ne u gha ru emwi esi, vbe gha yin otọ nii vbe nai na mwẹ ẹbe. 4 Gi e Jehova gha ya ruẹ sọyẹnmwẹ; ọ gha ru emwi nọ da ruẹ vbe orhiọn nuẹn. 5 Rhie egbe ruẹ ne Jehova, mu ẹtin yan rẹn, ọ gha yi ruẹ obọ. 6 Ọ gha vbe ya ẹmwata ruẹ wan uwanmwẹ, zẹvbe owẹn oghọghọ. 7 Zin egbe ne u rhie ẹghẹ ne Jehova ya winna. Ghẹ si osi ye ẹmwẹ iran ne agbọn maan rẹn, ra ye emwa ne iro dan ne iran zẹ dunna na. 8 Ghẹ rhie otọ ne ohawa ra ohu, ọlọghọmwa ẹre iran si rre. Ghẹ gi ohu muẹn, ne u do rhunmwuda ọni gha ru emwi dan. 9 Iran ni mu ẹtin yan e Jehova, ẹre ọ khian yan otọ nii, sokpan a gha wabọ emwa dan rua. 10 Vbọ ma he kpẹẹ wan, a gha ho emwa dan bẹkun. U gha gualọ iran, sokpan, u i ra miẹn iran. 11 Sokpan emwa ọmẹhẹ ẹre ọ ra yin otọ nii, iran ghi vbe gha ya ọfunmwegbe zọmọ vbe uwu ẹre. 12 Ọmwa dan khuan khẹ ọmwa esi, ọ keghi vbe ya ikhuiwu gha ghee ẹre kọọn. 13 Sokpan e Jehova gha giẹ emwa dan rhunmwuda, ọ rẹnrẹn ighẹ a gha fuẹn iran rua ban. 14 Avbe emwa dan yuo umozo iran, iran vbe si uhanbọ iran tua, ne iran ya gbe ovbiogue kevbe nẹi mwẹ iyobọ, ne iran lọkọ iran ni ru emwi ẹse. 15 Sokpan, umozo iran tobọ iran ẹre ọ khian gbele iran, a ghi vbiolo uhanbọ iran rua. 16 Ive emwi kherhe ne ọmwata mwẹ, sẹ ẹfe emwa dan hia fẹẹrẹ. 17 Rhunmwuda, e Jehova gha ya ẹtin fuẹn iran ne emwa dan, sokpan, ọ ghi tan obọ gue emwa esi. 18 E Jehova ẹre ọ gbaroghe iran ni họn ẹmwẹ nẹẹn, iran ẹre ọ khian yan otọ nii vbe ẹdẹdẹmwẹdẹ. 19 Ai khian ya ekhue mu iran vbe ẹghẹ oguomiẹrẹ; vbe ẹghẹ ukhunmwu, iran ghi gha mwẹ evbare nibun. 20 Sokpan, avbe emwa dan gha wulo, avbe eghian ọghe Jehova gha hoho rua zẹvbe obobo oha. A gha ho iran bẹkun zẹvbe ighogho. 21 Ọmwa dan mọmọ emwi, sokpan ẹ i hae, sokpan, ọmwa esi ghi gha zẹ emwi obọ. 22 Iran ne Nọyaẹnmwa fiangbe, ẹre ọ yan otọ nii. Sokpan, a gha khulo iran nọ fi ẹre unu ladian. 23 E Jehova ẹre ọ dia ọmwa ye odẹ nọ gha la, ọ ghi vbe gha degue iran ni ru vbene ọ yẹẹ ọre. 24 Deghẹ iran na de, iran i khian wa gha rre evba. Rhunmwuda, e Jehova gha silo iran kpaegbe. 25 Ọmaẹn ẹre I ghi khin na, I kpẹẹ agbọn nẹ, sokpan, I ma he miẹn wẹẹ, e Nọyaẹnmwa fi iyeke gbe ọmwa esi ẹdẹ, ra ne ivbi ẹre gha vbu evbare re. 26 Ẹghẹ hia ẹre ọ ya zẹ emwi obọ, ọ ghi vbe gha rhie ne emwa mọmọ. Ivbi ẹre gha miẹn afiangbe. 28 E Jehova hoẹmwẹ ibuohiẹn ata, ẹ i vbe he emwa ni gu obọ ẹre yotọ, te ọ khian gha gbogba ga iran rhinrin ẹdẹ. Sokpan, a gha guọghọ ivbi uniẹn emwa dan hia rua. 29 Emwa esi ẹre ọ ra yin uhunmwu otagbọn na, iran ghi vbe gha rrọọ vbe etẹbitẹ. 39 E Jehova ẹre ọ miẹn emwata fan, ọ ghi degue iran vbe ẹghẹ orueghe.