Psalm

33 Wa hia ni re emwa ata, wa gha wee ne oghọghọ, ye iwinna ne Jehova winnaẹn. Wa rho ẹre, wa hia ni họn ẹmwẹ nẹẹn. 2 Wa ya akpata rhie ekpọnmwẹ gie Jehova; Wa ya emwi ihuan nọ mwẹ irri igbe rho ẹre. 3 Wa so ihuan ọgbọn ghee ẹre, wa ya iguemwi kpee akpata nii, ne uwa wee ne oghọghọ. 4 Ẹmwata ẹre ẹmwẹ e Jehova khin, iwinna rẹn hia gia mu ẹtin yan. 5 E Jehova hoẹmwẹ iruemwiẹse kevbe ibuohiẹn ata. Ahoẹmwọmwa ẹnrẹn nẹi beghe vuọn agbọn na. 6 Ẹmwẹ ne unu ẹre Jehova ya yi ẹrinmwi, orhiọn ọghe unu ẹnrẹn ẹre ọ ya yi owẹn, uki kevbe avbe orhọnmwẹ. 7 Ọ si avbe okun hia koko ye ihe ọkpa, ọ keghi khui avbe odin amẹ okun ye aza ẹre. 8 Wa ya ọghọ ne Jehova, wa ne otọ hia, wa ya ọghọ nẹẹn, wa ne emwa nagbọn hia. 9 Irẹn guan rẹn, a keghi yi agbọn; vbe ẹmwẹ unu ẹnrẹn, emwi hia keghi yegbe ladian. 10 E Jehova ẹre ọ duẹ uma agbẹnvbo hia, ẹi gie iran mu emwamwa iran sẹ. 11 Sokpan, emwamwa ọghe irẹn rrọọ ẹdẹdẹmwẹdẹ, iziro ọghẹe rrọọ etẹbitẹghori. 12 Afiangbe ọrọre ọghe uhunmwu ẹvbo ne Jehova re Osanobua ẹre. Afiangbe ọrọre ọghe emwa ne irẹn zẹ ya ru ọghẹe. 13 E Jehova ke ẹrinmwi ghee otọ. Ọ keghi bẹghe emwa nagbọn hia. 14 Ehe nọ na khaevbisẹ, ẹre ọ ke ghee otọ ghee emwa hia ni rre agbọn. 15 Irẹn mwamwa iziro ekhọe iran, ọ keghi rẹn emwi hia ne iran ru. 16 Ẹ i re rhunmwuda iyokuo ẹre nọ wegbe, ẹre ọba na khọnmiotọ; ẹ i re ekpa ẹtin obọ ọre, ẹre ovbiyokuo ya khọnmiotọ. 17 Avbe ẹsin okuo i mwẹ esa vbe akhọnmiotọ, ẹtin iran nọkhua i sẹtin miẹn ọmwa fan. 18 E Jehova ẹre ọ gbaroghe iran ni ya ọghọ nẹẹn, iran ni diakhẹ ahoẹmwọmwa rẹn nẹi beghe. 19 Ọ miẹn iran fan vbe obọ uwu, ọ gie iran gha rre agbọn, vbe ẹghẹ ukhunmwu. 20 Ma mu ẹtin mwa yan e Jehova, irẹn ọre re nọ degue mwa, kevbe nọ yi ima obọ. 21 Rhunmwuda irẹn ẹre ima na ghọghọ, ma mu ẹtin yan eni ẹnrẹn nọhuanrẹn. 22 Gi ahoẹmwọmwa ruẹ nẹi beghe gu ima gha rrọọ Jehova, zẹvbe ne idaehọ mwa rre uwu uwẹ.