Psalm
34 I gha kpọnmwẹ Jehova vbe ẹghẹ hia. Mẹ i khian dobọ urhomwẹ ọnrẹn yi ẹdẹ. 2 Te I khian gha ya e Jehova rhuọ. Emwa ọmẹhẹ gha họn, iran ghi gha sọyẹnmwẹ. 3 Wa gu mwẹ wewe ukpọlọmwẹ e Jehova, wa gi ima koko rho eni ẹnrẹn. 4 I na erhunmwu ghe Nọyaẹnmwa, ọ keghi zẹ ẹmwẹ wanniẹn mwẹ; ọ keghi vbe fan mwẹ yotọ vbe obọ ohan hia nọ te mu mwẹ 5 Iran na zẹ kpokpo ya aro kọe, iran keghi ghọghua, ekhue i ra vbe mu iran ẹdẹdẹmwẹdẹ. 6 Iran ne ẹtin fo nẹ kpee tie ẹre, ọ keghi fannọ iran yotọ vbe uwu ọlọghọmwa ọghe iran hia. 7 Avbe odibosa ẹre ọ gbaroghe iran ni ya ọghọ ne Jehova, ọ ghi vbe miẹn iran fan. 8 Wẹ tobọ gualọ otọ ẹre miẹn vbene Jehova maan hẹ. Oghọghọ nọ ne ọmwa nii nọ lẹ gbinnaẹn 9 Wa gha ya ọghọ ne Jehova, wa ne emwa rẹn hia, iran ni mu ẹtin yan rẹn i ra vbabọ emwi ke emwi. 10 Avbe oduma sẹtin gha rre ohanmwẹ, sokpan nọ ne iran ni gualọ e Jehova, emwi nọ maan rhọkpa i khian vbee iran. 11 Wa larre, ivbi mwẹ, wa danmwehọ mwẹ; I gha ma uwa ẹre, vbene uwa khian ya gha mwẹ imuohan ọghe Jehova. 12 Gha nọ vbe uwu uwa nọ hoo nọ sọyẹnmwẹ agbọn, Kevbe nọ hoo nọ tọ vbe agbọn? 13 Adeghẹ erriọ nọ, ghẹ gha ta ẹmwẹ dan, Ghẹ gha ta ohoghe. 14 Fi iyeke gbe emwi dan, gha ru emwi esi, ya ekhọe hia gha gualọ ọfunmwegbe. 15 Aro e Jehova sotọ vbe egbe emwa esi, ọ vbe danmwehọ utumwẹ iran. 16 Sokpan, ọ mu aro daa iran ni ru emwi dan, sẹrriọ wẹẹ, iran gha wu, banbanna, a mianmian iran nẹ. 17 Emwa ata gha kpee tie Jehova, ọ ghi vbe miẹn iran fan, vbe uwu ọlọghọmwa ọghe iran hia. 18 E Jehova sikẹ iran ne agbọn zẹ ọre ẹtin. Ọ vbe miẹn iran hia ne ẹtin emwi hia fo nẹ fan. 19 Ọlọghọmwa nibun, ẹre ọmwa ata miẹn, sokpan, e Jehova ghi miẹn ọnrẹn fan vbe uwu ehia fẹẹrẹ. 20 Te Nọyaẹnmwa wa degue ẹre fo, ai vbe bun ọkpa vbe ugboloko ẹre. 21 Ọkhọ ẹre ọ ra gbe ọmwa dan. Obọ gha vba iran ni khuiwu ọmwa ata. 22 E Jehova gha miẹn emwa rẹn fan, emwi rhọkpa i ra ru iran ni lẹgbinnaẹn.