Job
32 Rhunmwuda ighẹ ekhọe e Job tama rẹn nẹ wẹẹ, irẹn ma rukhọ, ikpia eha nii keghi dobọ yi vbe ewanniẹn ne iran rhie ye ọre ẹmwẹ. 2 Sokpan, orhunmwu ọkpa nọ mudia gha ghee ughe, na tie eni ẹnrẹn Elihu, ma ghi sẹtin zin egbe ohu nọ muẹn, rhunmwuda ne Job na kha ighẹ irẹn rri ase, ọ na gha ba Osanobua ifiẹzọ. (Elihu na, ovbi e Barakẹl nọ, ovbi uniẹn e Buz, ọ keghi vbe gha re ẹwae Ram). 3 Ohu avbe ọsie Job kegha muẹn. Iran ma miẹn ewanniẹn rhie ye Job ẹmwẹ, ọ na keghi do yevbe na miẹn wẹẹ Osanobua ẹre ọ rri abe. 4 Rhunmwuda ne Elihu na re ọvbokhan vbe evba, ọ keghi zin egbe ne emwa hia guan fo nẹ. 5 Ọ ghi miẹn wẹẹ iran eha ma sẹtin rhie ewanniẹn ne Job, ohu keghi muẹn. 6 Ẹre ọ na suẹn gha guan, ọ wẹẹ, “Ọvbokhan mẹ khin, eniwanrẹn wa khin, rhunmwuda ọni, ohan ma gu mwẹ tama uwa vbene imẹ roro ẹre yi. 7 I kegha tae ma egbe mwẹ wẹẹ, ọ kere ne uwa guan, wẹẹ ọ kere ne uwa ne eniwanrẹn san ibo ma egbe. 8 Sokpan, orhiọn Osanobua ne Udazi ẹre ọ bu emwa rre, ọ ghi rhie ẹwaẹn ne iran. 9 Ẹ i re a khian enọwanrẹn, ẹre ọ rhie ẹwaẹn ne ọmwa, ra nọ ya emwa rẹn emwi nọ gbae. 10 Rhunmwuda ọni nian, I hoo ne uwa danmwehọ mwẹ, I hoo ne I tama uwa vbene imẹ roro ẹre yi. 11 “Te I wa hẹko gbe ehọ kotọ gha danmwehọ vbe uwa guan, I keghi mudia vbe uwa ya ekhọe gualọ ẹmwẹ ẹwaẹn na guan. 12 I kakabọ danmwehọ, I keghi họn vbe uwa baeku; wa ma sẹtin rhie ma wẹẹ ohoghe ẹre ẹmwẹ ne Job tae khin. 13 Vbe uwa ghi na kha hẹ yi ighẹ uwa waan? Osanobua, ẹre ọ khian ghi zẹ ẹmwẹ wanniẹn e Job, rhunmwuda, wa baeku nẹ. 14 Wa ẹre Job ghaa gu guan ighẹ ẹ i re imẹ. Sokpan, ẹ i re vbene uwa tae nii, ẹre imẹ gha ya zẹ ẹmwẹ wanniẹn ọnrẹn. 15 E Job, iran ma ghi miẹn ẹmwẹ ta, iran ma miẹn ẹmwẹ zẹ wanniẹn ọn. 16 Te imẹ gha te ye gha khẹ ra, ugbẹnvbe iran gue unu nẹ? Iran mudia vbe evba, vbene iran i ghi na mwẹ ẹmwẹ ọkpa, ne iran gha ta. 17 Ẹo, I gha rhie ewanniẹn obọ mwẹ yọ nian, ne I tama ruẹ vbene imẹ roro ẹre yi. 18 I i ghi sẹtin mudia ne I ghẹ guan, I i ghi sẹtin khui ẹmwẹ nii ye unu. 19 Adeghẹ I ma miẹn otọ na guan, I gha sa fua vbe ọgọ ohian na mu ayọn ọmutuo yi. 20 Egbe mwẹ i guae, I gha guan. 21 Mẹ i ra gbe ghee obọ ọkpa vbe imuanẹmwẹ na, mẹ i ra vbe kpe ọmwa rhọkpa ye ewọwọ, 22 I gha vbe ru ẹre, te Osanobua rria mwẹ ikhi ẹgiẹgiẹ.