Job
3 Iyeke ena hia, e Job keghi suẹn gha guan, ọ na gha tie ihẹn ne ẹdẹ na biẹ ọre. 2 “Osanobua, fi ẹdẹ na biẹ mwẹ unu. 3 Fi ẹre unu ighẹ asọn na hanmwa mwẹ. 4 Osanobua, fi ẹdẹ nẹdẹrriọ werriẹ khian ebiebi. Ghẹ dọlegbe ye ẹdẹ nẹdẹrriọ rre. Ghẹ gi uwanmwẹ dọlegbe wan yọ. 5 Gi ẹre khian ẹdẹ akhiẹ kevbe ebiebi nọ mwẹ imi, ya okuku amẹ gue ẹre, ne u khiẹn owẹn fua vbọ. 6 Khiẹn ẹdẹ nẹdẹrriọ hin ukpo rre, ghẹ gia ghi kae ba ẹre ọvbehe. 7 Yae khian asọn ọdihoirua ne ọyẹnmwẹ i ye. 8 Tama iran ni fi ẹdẹ unu, ne iran fi ẹdẹ ne ẹdẹrriọ unu, iran ni mwẹ asẹ vbe uhunmwu avbe ugbogiorinmwi amẹ. 9 Ghẹ gi orhọnmwẹ owiẹ wan uwanmwẹ yọ, rhie idaehọ ẹdẹgbegbe hin asọn nii rre. 10 Fi asọn nii unu, nọ na gia biẹ mwẹ, na na do rhie mwẹ uhunmwu da oya vbe usẹ. 11 “Vbọ rrọọ akpawẹ uwu ẹko iye mwẹ ẹre I wu yi, ra ne I la hin rre vbe a wa da biẹ mwẹ? 12 Vbọzẹ ne iye mwẹ na mu mwẹ yan iguẹ? Vbọzẹ nọ na vbe gha ya mẹ wẹn? 13 Akpawẹ te I wu, uwu ikẹtin ẹre I gha te gha ye nian, 14 I gha te gha vbiẹ zẹvbe avbe ọba kevbe irriegie, ni dọlọ ẹguae ẹghẹ nẹdẹ bọ, 15 I gha te gha vbiẹ zẹvbe ivbi ọba, ni ya igoru kevbe esiliva vuọn owa iran. 16 Ra ne I gha vbiẹ zẹvbe ọmọ ne ọkpa ma gbe ifuẹn na. 17 Uwu idin ẹre emwa dan na dobọ iba yi. Iran ne iwinna wọọ ẹre egbe ghi miẹn ehe na hẹwẹ. 18 Ọfunmwegbe ghi sẹ avbe oleghan obọ, iran fe vbe obọ uvannọmwẹ kevbe uhunmwu ọkpannike. 19 Agbọn hia rre evba, iran ni hin usi kevbe na ma rẹn, avbe eviẹn ghi do khian ni yan egbe iran. 20 “Vbọzẹ na na gi emwa gha tọ ye usẹ yi? Na na vbe rhie uwanmwẹ ne nọ khiẹ? 21 Iran ghi gha khẹ uwu sokpan iran i miẹn. Idin ẹre ọ ghi yẹẹ iran sẹ emwi ighobioye hia. 22 Iran i mwẹ ẹko nọ rhiẹnrhiẹn vbe ẹ i re te iran wu nẹ, na ree iran. 23 Osanobua mu oro ye ẹmwẹ ẹdẹnakhuẹ ọghe iran. Ọ na gbogba ga iran egbe hia. 24 Evbare I gha te re, sokpan I gha khiẹ, mẹ i sẹtin dobọ ikhiẹkhiegbe yi. 25 Emwi hia ne ohan rẹn mu mwẹ, kevbe ne afianma rẹn fian mwẹ hia do sunu. 26 Ọfunmwegbe i rrọọ, ikẹtin i rrọọ mẹ. Ọlọghọmwa mwẹ i vbe mwẹ ufomwẹ.”